МахIачкъалаллал ОьрчIал художествалул школалун дирзунни оьруснал цIа дурксса художник Евгений Лансерел цIа. Ванин хас дурсса батIаврий гьуртту хьунни чIявусса инсантал, бусравсса хъамал, вайннавух хасну ва иширал цIаний республикалийн увкIсса художникнал правнук Павел Сергеевич Павлиновгу.

Ва батIаврин сававну цагу-кIивагу иш бакъая: Евгений Лансерен 150 шин, Дагъусттаннал цалчинма-цалчинсса художествалул школалун 100 шин ва МахIачкъала шагьрулул ОьрчIал художествалул школалун 50 шин.
БатIаврий махъ лавхъунни МахIачкъалаллал шагьрулул депутатътурал мажлисрал председатель Хиби Аьлиевлул, шагьрулул Культуралул управлениялул начальник Фарид Абалаевлул, ва школалул директор Гульнара Мамашевал, искусствоведениялул доктор, В.И. Суриковлул цIанийсса МГАХИ-лул доцент Павел Павлиновлул ва цайминнал.
Школалул лажинчIирай художникнал цIанищалсса ула тIиртIунни Павел Павлиновлул.

Школалул хIадур дурну дия художникнал суратращалсса стенд ва художникнал суратирттая оьрчIал дирхьусса суратру дусса выставка.
ЦIа дурксса художникнал цIа школалун дизаврия ххарину бия педагогтал ва оьрчIру. Ва кьинилух ялугьлай вайннал цукссагу хIал хьуссар, ва ххуллий къачIивисса захIматгу бивхьуссар. Мяйжаннугу, багьавай, лайкьну дурсса давур ва хъанахъисса, цанчирчан Евгений Лансерел цIа цIакьну дархIуну дуну тIий жулла республикалуцIун. Хасну ванал хIарачатрайн бувнур республикалул пишакарсса цалчинсса художниктал бувксса: Муэтдин-Араби Джемал ва Хасбулат Аскар-Сарыджа. Ванияр ттуршлийхъайсса шиннардил хьхьичI Лансере ялапар хъанайгу, зийгу ивкIссар Дагъусттаннай, Щурагь, ваналли тIивтIусса республикалий сурат дишаврил цалчинсса курсругу.
МахIачкъалаллал ОьрчIал художествалул школалул директор, жулва лаккудуш Гульнара Нажмуттиновнащалсса ихтилат бищунну кказитрал цания-ца номерданий.

Бадрижамал Аьлиева