ЦIуну дуллалисса чIявуквартирартту бусса къатраву квартира ласунсса пикри бусса гьарца инсаннан аьркинссар цала арцу мюхчан дувансса давуртту бартдигьин.
Цукун ххал уван аьркинссар застройщик?
Застройщик цу уссарив кIул аншиврул аьркинссар кIул дуван къатри дуллалиманал идаралул балжисса цIа ва ИНН (налогру дулайманал идентификациялул номер) ягу ОГРН (основной государственный регистрационный номер).
«Прозрачный бизнес» тIисса сервисрал кумаграйну Федерал Налогирттал къуллугърал сайтрай кIул бан хьунтIиссар балжисса налогру дулайманал хIакъиравусса информация, тикку буссар цу уссарив генеральный директор, цуксса дуссарив уставной капитал, сакиншиндарал балжисса цIа ва цаймигу затру.
Застройщикнаятусса информация балжи бан хьунтIиссар https://наш.дом.рф. порталданий, ваний буссар застройщикнацIунсса яла щаллумур ва агьаммур информация.
Застройщик гьурттусса судрал ишру хьуну бивкIшивриясса информация ххал бан бюхъантIиссар арбитражрал иширттал картотекалий судирттал официал сайтирдай.
Дагъусттаннал Минстройрал сайтрай дуссар «светофорданул» принцип ишла дурсса чIявуквартирартту бусса къатрал реестр, микку буссар кIива зона – щюллимур ва ятIулмур. Миннущал гьартану кIул хьун бюхъантIиссар мува Минстрой
рал сайтрай.
ЗастройщикначIа цачIава кIул хьун бюхъантIиссар проектрал документациялущал, къатри дувансса ва аьрщарал участокрансса ихтиярдащал.
Зувагу аьркинссар лавгун буруган, къатри чув дуллай бурив, тиччаллил чIалачIин цукунсса дурив.
Цукун чичин
аьркинссар кьутIи?
Градостроительствалул иширттал закондалийн бувну, долевой строительствалуву гьуртту шаврил хIакъиравусса договор (ДДУ) цIакь дайссар чичрулул журалий, мугу аьркинссар Росреестрданий паччахIлугърал регистрациялийн ласун (мукун барчан, ца квартира кIилва баххан къашайссар). Росреестрданийн лавсун махъ кьутIи цIакь дурссаннун ккаллиссар. КьутIи бюхъайссар цIакь дуван электрон журалул документрайнугу, мукунсса документ цIакь буван аьркинссар электрон журалул къулбасрайну.
Квартира машан ласайни дольщиктал хъяврин баврия буруччайсса ца мухIлу-хIинну хъанахъиссар эскроу-счет. Къатта бувну, халкь ганивун бизаннин строительствалуву гьуртту хъанахъисса инсантурал арцу дишайссар банкирдал эскроу-счетирдай.
КьутIилий чара бакъа ккаккан бувну
бикIан аьркинссар:
– къулагъас дуван аьркинссар кьутIилул цIаних – ванил цIа дикIан аьркинссар долевой строительствалий гьуртту шаврил хIакъиравусса договор (договор участия в долевом строительстве), микку цайми цIарду дикIан къабучIиссар;
– кьутIилул предмет – гьартану ккаккан бувну бикIан аьркинссар машан ласласисса объект (балжисса адрес, зиву, лагру, агана отделка дансса ният духьурча, ккаккан дуван аьркинссар отделкарттайн дагьайсса давуртту, ишла дуллалисса материаллал качество, ранг ва м.ц.);
– строительство къуртал шаврил ва объект булаврил чIун;
– договорданул багьа, му булаврил чIун ва низам;
– долевой строительствалул объектрал гарантиялул чIун – къатта буллусса чIумуя махъ диялдакъашивуртту духлаган даврил чIун (ккаккан дайссар договорданий, амма шанна шинаяр чансса дикIан къабюхъайссар инженер оборудованиялун ва квартиралун, отделкалун – ца шинаяр къачансса).
Цукун кьамул буван аьркинссар долевой строительствалул
объект?
Застройщикнал чIявуквартирартту бусса къатта ягу цамур объект бувну махъ, га зузи бан булунсса (ввод на эксплуатацию) ихтияр ларсувкун, застройщик буржлувссар долевой строительствалул объект булун договорданий ккаккан дурсса чIумуя чIал бакъа.
Объект кьамул баврил актрай къулбас дан хьхьичI аьркинссар личIлулну ххал буван га объект, мукIру хьуншиврул ганий цукунчIавсса дефектру дакъашиврий, агана диялдакъашивуртту лякъирча, ми душивурул хIакъираву чичру дуван аьркинссар актрай.
Строительствалул гьурттучинахь ихтияр дуссар цала тIалавшиндарая бусан ягу масъала судрайн бутан. Агана застройщик инкар дуллай ухьурча диялдакъашивуртту духлаган даву, кьутIи лиян дуван аьркинссар ва махъуннай тIалав дуван хьхьичIра дуллусса арцу ва процентру.
ХIасан Аьдилов
