Вай гьантрай «Илчи» кказитрал хъунама редактор Руслан Къардашовгу, нагу лавгру Мамедкъалаллал шяравун. Жущала ласарду тIабиаьтрал зарал биян бувминнал тIювардай дезинфекция дувансса дезрастворду, Аьрасатнал цалчинма Виричу НурмахIаммад ХIажимахIаммадовлул цIанийсса «Патриот» тIисса ихIсандалул фондрал чулухатусса.
Жу хьунабавкьуру тIювардан зараллу бивсса Цалчинмур ЦIувкIратусса Загьидат Аьлиловащал ва ихтилат барду мукунма вайннал чIаххувчу Ражав Исмяиловлущал. Вайннал къатрайсса хIал ккавккукун, жу махIаттал хьунав: хIаятравусса ва къатравусса буза чIалай бакъая, аьтарттул лавсун бия, цаппара затру дия хIаятравух ппив хьуну, кIива къатта гьануцIакул лекьан бувну бия, эяллурагу лирчIун дакъая.
Вай дия Аьлиловхъал къатри. Чансса тихуннайну диркIун дур Исмяилов Ражавлул къатри, тиккугу мура тагьар дия.
Яла Загьидатлул жу бувцунну, гава кучалий, ца ттуршраксса метралул архну ялапар хъанахъисса, СунбатIуллал шяравасса АьбдулхIалимова Розахъал къатравун. Вайннан зарал чанну хьуну бия, Загьидатхъалминнух бурувгун. ЛувчIиннийсса гьарзат аьтарттул ларсун дия, цалчинмур зивулийсса къатран тамансса зарал биян бувну бия.
Вайннал тIимунийну, цивппагума аьтарттул ласунтIий бивкIун бур, агарда ца 20-30 минутIрал хьхьичI полициялул зузалт бувкIун, къатравату буккан къабувссания.
ЦIухху-бусу бувну, кIул хьунни зараллу бивминнан кумаг буллай бушиву гара шяравусса мизитравугу, школалийгу зузисса ихIсандарал фондирттал. Мичча дучIан дуллай бур инсантуран дуки-хIачIия.
Зараллу бивсса къатран кьимат бивщуну бур хIукуматрал комиссиялул. Миннан кумаг буван бакIрайн лавсун бур.
ХIасан Аьдилов
Аьрххи—ххуллия балжину буссанну хъиривмур номерданий.
