КIива гьантлий бакъавцIуну буллалисса марххалттал,
Лакку кIану кIучI бувуна, магъив чIаланну къатрал.
Лагьний тIурча так бургъурду чIалай бия къирагърай,
Леххаврил ттугъру ми хханссар, оьвтIутIисса кумаграйн.

КIива гьантлий буллай, гьанай, кьурукIи дакъанува
Уттигу буссар буллайнма, бакъаний бишин кунма.
Къанихшиву занч-марххалттал, зунттурдай буртти бикIан,
Къазразанну ризкьичитал чIатIри кIунттил дугьан бан.

Тайнна дучри яхI буллай най, марххалттава итххяхлай,
ЛахIлай, багьлай, башттан бюкьлай, багьния бизлай, занай.
ТIабиаьт гьалак дуркшиву бувчIлай, мадад къабуллай,
Залуннал дакI къума къахьун, чувшиврий кьини лахълай.

Тана ххюнчIа щиллив магъуй кьарчIгу бивкIун микIлачIлай,
Инсантурайн ливкмур цирив, хьумур цирив къабувчIлай.
Зунттурдал зурзу-кувкулул дакI хъячин бувсса кьули,
Ццаххандарал хьуну буссар, оьлил чулухун лякIлай.

Циксса нехру зумардава личинссарив щин кIулли,
ЛахIунттугу тасса-танийн дуцланссарив къакIулли,
Аьтарттугу, лахIунттугу бяст-ччаллий дурксса кунма,
Къирмишанну, ччарду дуллай, аьрщи-ххюл муркIа буллай.

Къуллугъчима уссар занай, цIайтIи ттуплив ябуллай,
ТIабиаьтрал цIунцIиягу касивнайн тIайладацIай.
Бяравсса бульдозерданул бурхIай тана чак буллай,
ГьарзатрацIа хьусса инсан, Аллагьнайн щукру буллай.

Аьрщарайн ливксса сситара хIаллицIух лагь хьунтIиссар,
Чан-чанну тIий дуниялгу, ссавгу чанна хьунтIиссар.
Щавурдари хьусса аьрщи ва зивзусса зунттурду,
ТIутIан кIутIу тIунтIиссаркьай, дазлай щявсса хъяклурду.

ПатIимат Рамазанова

15 апрель, 2026 шин.