Жаруллагьлул арс КьурбанмахIаммад Каримов увну ур 1951 шинал УзбакIнал ССР-данул Бухардал областьрай Каган шагьрулий. Дянивмур даражалул школа къуртал бувну бур 1968 шинал Гъумук арцул медальданий. 1976 шинал Москавуллал архитектуралул институт бувккуну махъ 8 шинай зий ивкIун ур МахIачкъалалив «Даггражданпроект» институтраву.
Ванал проектирдайну бувну бур патир «Приморская», оьрчIал спортрал школа ва цаймигу. Ванал каялувшиврий хIадур дурну дур «Схема развития и размещения объектов туризма в Дагестанской АССР» тIисса элмийсса проектру.
1984-1988 шиннардий бувккуну бур аспирантура МАРХИ, микку ванал дурурччуну дур кандидатшиврул диссертация: «Архитектурно-композиционные закономерности формирования поселений в горном ландшафте». 1988-1989 шиннардий зий ивкIун ур элму ахттар даврил, педагогнал ва проектру бартдигьаврил давурттаха СССР-данул Элмурдал Академиялул Дагъусттаннал филиалдануву. Ванал дур цаппара элмийсса публикациярттугу. Кь. Каримов проектру хIадур дуллай ивкIун ур 1989 шиная шинай цува заллусса архитектуралул мастерскойлуву. Ва хIарачат буллай ур ттинияр тихунмайгу ябуван архитектуралул ирс, дузал дуван жула культуралул ляличIишиврул образру. Яла-яла, ва щаллуну чIалай дур Гъуниннал райондалий дурсса «Ватан» мемориалданул проектраву. Ва мемориал дурну дур Надир-шагьнал аьралуннащалсса талатавриву Дагъусттаннал ополчентурал ххувшаву ларсъсса кIанай. Мемориал дурну диркIссар 2011 шинал Дагъусттаннал Миллатирттал цашиврул кьинилун хас дурну.
Ва мемориалданун бивщуссар хъунмасса кьимат – «Камень в архитектуре 21 века .Традиции и новаторство» тIисса Щалагу Аьрасатнал смотр-конкурсрай Москавлив дуллуну дур Цалчинмур премия ва Цалчинмур даражалул диплом, «Зодчество – 2024» тIисса дунияллул халкьуннал дянивсса фестивальданий – Арцул диплом, Аьрасатнал Архитектуралул ва строительствалул элмурдал академиялул Диплом (2007 ш.).
«Ватан» мемориалданун ва Кь. Каримовлул дурсса цаймигу проектирдан цалчинмур даражалул дипломру буллуну бур 2015 шинал Ухссавнил Ккавкказуллал ва Кьиблалул Аьрасатнал фестивальданий.
КьурбанмахIаммад Каримовлул дуллай ур мукунна ттизаманнул къатрал ва комплексирттал проектругу. Ванал дурну дур МахIачкъалаллал хъун мизитрал проектгу, 3-5 зивулийсса къатрал проектругу, МахIачкъалалив ХIамзатовлул проспектрайсса хъуни къатрал проектругу, МахIачкъалалив 280 инсаннансса кIану бусса 10 зивулийсса патир, Каспийск шагьрулий Приморский паркираву культуралул центр «Дагестан». Кь.Каримов ур МахIачкъалалив Тарки-Тау зунттуйсса «Белые журавли» архитектуралул мемориалданул автор.
Ялагу Каримовлул дурну дур чIярусса проектру МахIачкъалаливгу, Каспийскалийгу, цайми кIанттурдайгу.
1999-2009 ш.ш. Кь.Керимов зий ивкIун ур МахIачкъалаллал Администрациялул архитектуралул ва градостроительствалул управлениялул хъунаманал хьиривчуну, га чIумал ванал тамансса захIмат бивхьуну бур шагьрулул Генеральный план хIадур давривугу, га дузрайн дуккан дангу.
КьурбанмахIаммад Каримов зий ивкIссар мукуна жяматийсса давурттайгу. 1981 шиная шинай – Аьрасатнал Архитектортурал союзрал член, 1995–2000 шиннардий – АьФ-лул Архитектортурал союзрал Дагъусттаннал сакиншиндарал правлениялул бакIчи. Ва хъанахъиссар МахIачкъалаллал АдминистрациялучIасса Градостроительствалул советрал членгу.
ЗахIматраву ва творчествалуву хьун дурсса хьхьичIуннайшивурттахлу Кь.Каримов лайкь хьуну ур «Заслуженный деятель искусств Республики Дагестан», «Почетный архитектор Республики Дагестан» тIисса хIурматрал цIардан. Ванан дуллуну дур ДР-лул паччахIлугърал премия «Ватан» тIисса мемориалданул архитектура даврихлу, ДР-лул президентнал цIа чирчусса ссят, МахIачкъалаллал администрациялул ХIурматрал грамотартту.
Кь. Каримовлул творчествалул давурттан лавайсса кьимат бивщуну бур Аьрасатнал ва Ухссавнил Ккавкказуллал архитектуралул сообществалул. Ванан дуллуну дур «За верность содружеству зодчих», «ХХХ лет Союзу архитекторов России» тIисса медальлу. 2023 шинал КьурбанмахIаммад Каримовлун дуллуну дур «За высокое зодческое мастерство» тIисса В. И. Баженовлул цIанийсса медаль. Ва медаль хъанахъиссар ванал давурттан бивщусса кьиматирттавасса ца яла бюхттулмурну.
ЦIанагу Кь. Каримов дакI тIайлану ур цала пишалийн, зий ур цащава шайсса хIарачат буллай, цIусса проектирдаха.
