Апрельданул 9-нний МахIачкъалалив, Поэзиялул театрдануву, машгьурсса чичу, таржумачи, сценарист Нураттин Юсуповлул 95 шинал юбилейран хас дурсса аьпалул вечер дунни. Ванил сиптачитал ва сакиншинначиталгу бия Нураттин Юсуповлул цIанийсса Республикалул оьрчIансса библиотека ва Дагъусттаннал Чичултрал союз.
Дайдихьу дуллалисса хьхьичIмукъуву Поэзиялул театрданул директор Елена Гьаруновал бавтIцири барча буллай, кIицI лавгуна Нураттин Юсуповлул творчествалул кьимат мудангу лахъсса бивкIшиву ва ванал шеърирдай уттигу цимирагу ник тарбия хьунтIишиву.
Вечер дачин дурну бия Дагъусттаннал Чичултрал союзрал председатель Марина АхIмадова-Колюбакина. Ванил кIицI лавгуна Нураттин Юсупов щалагу Совет Союзрай цила чIумал оьрчIансса шаэртураву ца яла машгьурма ва хьхьичIунма ивкIшиву, Дальний Востокрай, Узбакисттаннай, гьар кIанай ванал луттирду ккалай бивкIшиву.
«Ттул хъуннасса ххаришиву дур залдануву чIявусса оьрчIру чIалай. ХIакьсса дагъусттанлувталлу зу, Дагъусттаннал литература ххирасса, муния хавар бусса бунутIий. ОьрчIан луттирдахсса ччаву рутлатисса библиотекалунгу багьавайри Нураттин Юсуповлул цIа дирзсса, лайкьссар укунссагу, ванияр хъунмургу хIурматран», – увкунни ванил.
Нураттин Юсуповлул оьрмулул ххуллия ва творчествалия бусласисса, уттизаманнул технологиялул кумаграйну хIасул дурсса документал журалул видеофильмгу ккаккан дунни.
КIицI лавгсса библиотекалул директор СолтIанат Загьидовал бувсунни Нураттин Юсуповлул творчествалун лахъсса кьимат бивщушиву машгьурсса чичултрал: Корней Чуковскийл, Сергей Михалковлул, Агния Бартол, Валентин Берестовлул, Расул ХIамзатовлул. Бувсунни шаэрнал назмурду дунияллул халкьуннал тамансса мазурдийн таржума дурну душиву ва ванал сценариярдайн бувну ххюра киносурат ларсшиву.
«Нураттин Юсуповлул лакку мазрайн таржума бувссар М. Лермонтовлул, В.Короленкол, А. Чеховлул А. Пушкиннул, С. Есениннул, Батырайл ва цаймигу чичултрал произведенияртту. Лайкь хьуссар Н. Крупскаял цIанийсса ПаччахIлугърал премиялун, РСФСР-данул чичултрал ва Сулайман Стальскийл цIанийсса республикалул премиялун», – увкунни ванил. Бувсунни гьашину февральданул 20-нния мартрал 20-ннийнин най диркIшиву шаэрнал юбилейран хас дурсса Всероссийский Юсуповский диктант, ванил лагрулий гьуртту хьуминнал Нураттин Юсуповлул творчествалул хIакъиравусса суаллахьхьун жавабру дуллушиву. КIицI лавгунни гьуртту хьуминнал географиягу авадансса бивкIшиву, аьмну 1800 инсан гьуртту хьушиву. Шаэрнащалсса дусшиврия ва даврия бувсунни халкьуннал шаэр Мирза Давыдовлул, творчествалия бувсунни «Илчилул» хъунама редактор Руслан Къардашовлул.
Махъру лавхъунни Дагъусттаннал Чичултрал союзрал лакрал секциялул каялувчи Супиян Оьмаровлул, къумукьналмур секциялул хъунама Багьауттин Аджиевлул, даргиялмур секциялул хъунама Муса БахIаммадовлул ва цайминналгу. Оьрус ва лакку мазурдийсса назмурду дурккунни МахIачкъалаллал 39 -мур школалул дуклаки душру Мудунова Самиял ва Рабаданова Амирал , 71-мур школалул дуклаки оьрчI Макьаев Аьлиллул, ДГУ-лул культуралул факультетрал студентка ХIасанова Дианал. Дагъусттаннал Ссихьрал театрданул литературалул «Креатив» тIисса клубрал шаэрнал произведениялийн бувсса постановка ккаккан бунни. Вайннал каялувчи бур Злата Щамхалаева.
Ниттил мазрай дурккунни назмурду Ися Аьбдуллаевлул цIанийсса Лакку мазрал центрданул учениктурал: Гаммацаева Амирал, Сагидова Дианал, Рамазанова Кабиратлул ва Оьмарова Шагьуннул. Бувккунни сахIналийн назму дуккин Нураттин Юсуповлул арснал арснал душ Мариянгу. Ахирданий юбилярнал арснал оьрчI Нураттин Юсуповлул барчаллагь увкунни лавайсса даражалий мероприятие тIайла дуккан хIарачат бувцириннахь ва залданувун бавтIцириннахь.
ПатIимат Рамазанова
