Махъсса шиннардий щалагу республикалийгу, жула лакрал шаннагу райондалийгу хъуннасса къулагъасрайн лавсун бур ялун нанисса ник Ватан ххирану тарбия даврил масъала.ЧIярусса хьунни му мурадрайсса личIи-личIисса мероприятиярттугу жула районнай.

Вай гьантрай Гъумук, апрельданул 8-нний кIицI лагайсса ­Аьралий комиссариатрал зузалтрал кьинилун хасну, Лакрал ва Ккуллал районнал цачIусса аьралий комиссариатрал сипталий ва сакиншиннарай, кIирагу райондалул школардал директортуралгу кабакьулий хьунни аьралий комиссар, майор Аьли ГъазимахIаммадовлул завалунсса спортрал бяст-ччал. Военкоматрал къатрал хьхьичIсса майданнив дартIун дия районнал школардал командартту, аьмну 9 команда, военкоматрал зузалт, кIулшивуртту дулаврил управлениялул вакилтал, школалул директортал ва ­учительтал. Бяст-ччаллу хьунни спортрал арулва журалул.
Ми байбишин хьхьичI ихтилатру бунни аьралий комиссар Аьли ГъазимахIаммадовлул, ЧIяйннал школалул директор Альбина Гаммакуевал, КIундиннал школалул директор Абакар Гуйдалаевлул, Ккуллал 1-мур школалул директор МахIаммад Чариновлул, мероприятиялий гьурттушинна дан оьвкусса хасъсса аьралий операциялул гьурттучитурал.
Бюххансса ихтилат бунни Хъунайннал школалул директор, аьралий иширттал гьурттучи МахIаммад Хъунбуттаевлул. КIицI лаган, хIакьину ванал кIиягу арс буссар хасъсса аьралий операциялий Ватандалул мурадру буручлай.
Бяст-ччал хьунни хъинну ягинсса. Гьарица журалул бяст-ччаллил судьятал бия военкоматрал зузалт. Судьятурал хIасиллайн бувну, 1-мур кIану буллунни Ккуллал 1-мур школалул командалун, 2-мур ­- ­Ваччиял ­школалун, ­3-мур – Гъумучиял школалун. Цинявппагу хьхьичIунсса кIанттурду бувгьуминнан буллунни дипломру, медальлу, арцуйнусса бахшишру ва багьлул ххирасса ттупру. Ва мероприятие аьдатравун дуртун, гьарица шинах дуллансса пикри бур сакиншинначитуран.
Ва кьини мероприятиялул лагрулий аьралий комиссарнал бусраврай дуллунни хасъсса ­аьралий операциялий Ватандалул мурадру буручлай, ятIа-тIар бакъа акъа хьусса Гъумучасса Айдамир ХIажиевлул награда – медаль «За отвагу» – ванал буттахьхьун ХIажинахьхьун.
Аьралий комиссарнал барчаллагь увкунни ХIажинахь ххаллилсса арс тарбия аврихлу, мукунма барчаллагь увкунни мероприятиялул сакиншинначитурахь. КIицI лаган, мероприятие лавайсса даражалий тIайла дуккан хъунмур хъар лархъунни Лакрал ва Ккуллал цачIусса ­аьралий комиссариатрал призыврал ва аьралуннаву къуллугъ бан хIадур баврил отделениялул хъунама Ажуб Юсуповлул.
Шиккува кIицI лаган, ва мероприятиялул хьхьичIсса гьантрайгу Лакрал райондалул администрациялул актовый залдануву 11-ми классирттал дуклаки оьрчIащал, кIирагу райондалул КIулшивуртту дулаврил управлениярттугу гьуртту хьуну, вайннал дурссия «Чувшиврул дарс» акция. Шиккугу ихтилатру хьуна Ватан ххирашиврия, хасъсса аьралий операциялий дагъусттанлувтурал ккаккан дуллалисса чувшиврия, цIанасса чIумал хьхьичI ххуттай бавцIуну Ватандалул мурадру буручлачиминная.

Андриана Аьбдуллаева