Уттигъанну ца мукунсса байран хьунни ГьунчIукьатIрал шяравугу. Ва ххуллухь хъув уклакисса Хъузала ия ГьунчIукьатIрал школалий оьрмулухун зий ивкIccа учитель Исубуттаев АьбдулхIамидлул ва Багъдал арс АхIмад. Ванал лагма лавгун бия къутанная, шагьрурдая бувкIсса уссур-ссу, гъан-маччами, шяраваллил ххаллилсса жямат, дустал-гьалмахтал.

КIюрххицIунмай ккунуккирттал ххунчIайн бисмиллагьгу бувну, дукьрахIанттил кьурттигу хIавчIун, дуаьрдугу дуллай, Карашрал гаражрал ялтту чулийсса ГьунчIукьатIрал хъуруннайн бавчуна агьали. ГьунчIукьатIрал гьармудангу чайри щайсса хъарас. Ва ххуллухьгу бия чугу, ттуккугу чIюлу бувну. Аьрщаравун бивчусса гьаннарал кIурхру ччяни дучIан, аьдатрайн бувну, Хъузала атил уллай, хIаз ласлай булувкьуна цинявппагу. Хъузалащал хъарасрал кIамайму бугьлай, ла-яла аьрщаравун хъарас кьутIин дуллай, интнил ссихI, аьрщарал кьанкь лагма-ялтту ппив дуллай бия жагьи-жугьулт. Биялсса захIматгу бивхьуну, дялахъру дан хъунмур хъар цийнна ларсъсса чугу бигьалаган итабавкьуну, байбивхьуна спортрал тIуркIурду: дучри ххяххан баву, арамтал ва хъами, оьрчIру ва душру бястлий лечин баву.

Ахттакьунмай дукрардал гъагъавайсса ссупралухун бавтIна Хъунил хъатIуйн бувкIсса жямат ва хъамал. Тямадашиву дуллай ия Зиябуттин ХIажимирзаев. Мажлис бачIи хьувкун, цайвасса буржгу лавхъун, АхIмад Исубуттаевлул хъирив кьуру тапшур бувна ялунчIил хъув уккансса хъузалайн – Аьбдуллагьлул арс МахIаммад МахIаммадовлуйн. Барачатну лавсъсса кьуру хьуннав!

Махъру лахълай, балайрду тIий, тяхъашивуртту лахъи ларгуна хьхьудядизаннин.
Гъар-гъарагъи даркьусса, авадансса, дюрхъусса шин хьуннав! Дангу, ­дукангу цIуллушиву дулуннав! Зунна дитангу, чин дулунгу бюхълай личIаннав! Дурцири дуаьрду Заннал кьамул даннав! Дуниялгу паракьатну, ­кьисматгу гьарзану, цIуллу-цIакьну яхъанан цума-цаннахьхьунгу Заннал тавпикь дулуннав!

Руслан Къардашов