Аьлибаглул арс Аьмаев КьурбанмахIаммад
Вай гьантрай, оьрмулул 95 шинаву, цIуцIи шанийгу лахъи къалавгун, аьпалухьхьун лавгунни ЧIурттащиял шяравасса махъа-махъсса Хъунмасса Буттал КIанттул цIанийсса дяъвилул гьурттучи, захIматрал ветеран, шяраву сий дусса хъунмасса Аьмахъал тухумраясса Аьлибаглул ва Калиматуллагьлул арс Аьмаев КьурбанмахIаммад.
Увну ур МахIаммад 1921 шинал ЧIурттащиял шяраву, оьрчIшиву ларгун дур шяравура. Къуртал бувну бур Грозненскалийсса авиациялул училище ва Ттуплисливсса артиллериялул училище. Дяъвилий щаву дирну дур. СССР-данул аьралуннава лавгссар 1948 шинал. 1953 шинал къуртал бувну бур Ленинградуллал паччахIлугърал университетрал, юридический факультет. 1953-1957 шиннардий зий ивкIссар МахIачкъалаллал Ленинский райондалул прокуратуралул халкьуннал силисттачину, прокурорнал кумагчину, Дагъусттаннал прокуратуралул силистталул отделданул прокурорну.
1957-1981 шиннардий зий ивкIссар Ленинград шагьрулул Фрунзенский райондалул прокуратуралул следовательну, Фрунзенский райондалул прокурорнал кумагчину, судрай уголовный деларду ххал дигьаврил ялув бацIаврил отделданул прокурорну. 1973 шиная 1981 шинайн ияннин ивкIссар Фрунзенский райондалул прокурорнал хъиривчуну.
Лайкь хьуссар «ЯтIул Ттугълил» ва «ЯтIул ЦIукул» орденнан, Хъун дяъвилул I ва II степеннал орденнан, «За Победу над Германией», «За доблестный труд» ва Жуковлул медаллан ва «ЗахIматрал ветеран» тIисса цIанин.
Оьрус миллатрал кулпатгу бувну, цала буттал кIанттуя архну унугу, КьурбанмахIаммадлул цала уссурссуннащалсса, жяматращалсса дахIаву тачIав хIура къадурссар. Махъсса шиннардий тIурча ванал буттал кIанттухсса ччаву хъиннура ягин хьуна. Цала гъан-маччанал кумаграйну шяраву га яла ххуймур кIанай къатта бувна, шагьрулий куннасса шартIругу дурну, Аллагьнал цIимилийну ивтунни цала къатлуву гьантта-кIива бангу, лакку гьаварая, тIабиаьтрая неъмат ласунгу. КIийла гьуртту хьуну (69-мур ва 70-мур) Лакрал райондалий дуллалисса Ххувшаврил байраннай, вайннул сий бюхттул дурна. Цала оьрмулуву махъра-махъсса увсса кьини (95 шин) дуллай, Санкт-Петербурглив бавтIсса шагьрулул прокуратуралул, силистталул къуллугърал зузалтрал ххуйсса махъругу лавхъун, багьлул ларайсса бахшишругу пишкаш дурну, шиха буттауссил кьини хъун дан лавгсса уссил душнихь куну бия: «Передайте Дагестану, что мы его любим, ценим, уважаем, учимся у него, для нас он эксклюзив», — куну. ДучIай тава-тагу инсаннал оьрмулул ахир. Лахъа-хъунну ларгсса цала юбилейрал хъирив лахъи-утта къалавгун лавгунни ахиратравун щала цала оьрму низам дуруччай къуллугъран харж бувсса КьурбанмахIаммадгу.
КьурбанмахIаммад махъва-махъсса ххуллийн тIайла уккангу бавтIун бия шагьрурдай буссар кусса ЧIурттащиял жямат, администрациялия, райондалул, республикалул прокуратуралия.
Бусраврай, лахъа-хъунну тIайла увккунни, циняв лагма лавгун. Барчаллагь жяматрангу, душнингу, аьрххилул захIматшиврух къабурувгун, цала буттал махъва-махъсса аманат щаллу бувсса. Оьрму архну гьан барчагу, цала нитти-буттачIа ахират хьуну, рухI паракьатну духьунссар. Шяраву ва цинявннан ххирассия, гьарцаннал ванайн ттюнгъану «дедушка» чайссия, цала ттаттаха кунма хIурматгу байссия. ХIайп, лавгунни узданшиврул хъунмасса бутIа буллусса, цIимилул дакI дурцIусса, гъилишиврул дазу-зума дакъасса, цува чув унугу, зунтталчунал яхIгу, къириятгу ядурсса ххаллилсса чув-адамина. КьурбанмахIаммадлул бивкIулул хъуннасса кьурчIишиву кIидачIлай, жижара буллай буру душнихь, куявнахь, уссил оьрчIахь, ссурахъаврахь, гъан-маччанахь, агьлу-авладрахь цинявннахьвагу. Цал гьав нурданул дуцIиннав, алжаннул ххари аннав, махънал оьрмурдай барачат бишиннав.
ЧIурттащиял жямат
МахIаммадлул арс Тямадаев Шарапуттин
Июль зурул 22-нний, захIматсса цIуцIаврища ххассал къавхьуну, оьрмулул 79 шинаву жуятува лавгунни ххаллилсса хъанаричу Тямядахъал Шарапуттин.
Шарапуттин увну ур апрель зурул 17-нний 1937 шинал Хъанардал шяраву. Заводрайгу зий, къуртал бувссар 10 класс.
Гания мукьах, дяхтта зий, хьхьувай дуклай, къуртал бувна политехнический институтрал строительный факультет.
Гания махъ цала касмулий зий хьуна 30 шин ххишалагу.
Ванал ур шама ххаллилсса арс. Шамагу зий ур заргалталну: Костромалий, цагу — Петербурграй. Шарапуттин ия дустурал дянив бусравсса, хIурмат бусса, хъатIай ва хъиншивурттай акъа чара бакъасса, тIайламур ххирасса, кару мусилсса адамина, захIматрал ветеран.
Шарапуттин дунияллия лагаврил кьурчIишиву кIидачIлай, дакIнийхтунусса жижара буллай буру ванал кулпатрахь Розахь, оьрчIахь ва оьрчIал оьрчIахь.
Цал гьав нурдалул дуцIиннав, алжаннул къапурду тIивтIуну лякъиннав.
Хъанардал
ва Ккурккуллал жямат
Залкиприл арс Аьлиханов ХIажиатта
ЗахIматсса цIуцIаврища ххассал хьун къавхьуну июль зурул 20-нний оьрмулул 61 шинаву аьпалухьхьун лавгунни Залкиприл арс Аьлиханов ХIажиатта.
ХIажиатта увну ур 22-мур мартрай 1955 шинал Хъурхърал шяраву.
Цала чIумал школагу къуртал бувну, армиягу лавхъуну, нитти-буттал хъар дугьан зун айивхьуну ур. Ванал оьрмулуву яла хъунмур тIайлабацIугу, талихIгу хьуну бур цанма оьрмулул дусну, кулпатну, уздансса нитти-буттал душ, дакIнил аьмал ххуйсса, хасиятрал бавкьусса Камилат бакIрайн багьаву.
Цува ХIажиаттагу оьрмулуву гьарцаннащал хIал бавкьусса, дакI-аьмал уздансса, жяматраву хIурмат бусса хIакьсса захIматчи ия.
ХIайп, иминсса кулпатрал заллу, ххуйсса оьрчIал ппу, мачча-гъаннан вихшаласса чув, чIун дакъа лавгунни дунияллия. Ванал бивкIулул хъуннасса кьурчIишиву кIидачIлай, дакIнихтунусса жижара буллай буру ванал кулпатрахь, наслулухь уссурваврахь ва махъсса гъан-маччанахь.
Цал бунагьирттал аьпа баннав, рухI бигьаний дишиннав!
Хъурхърал жяматрал цIания Гуржигьан Къараева
МахIаммадлул арс ХIусманов ХIусман
Хар-хавар бакъасса апатI хьуну, оьрмулул уччиннин къаивтун дунияллия лавгунни ххаллилсса ккуркличу, ттул одноклассник ХIусманхъал МахIаммадлул арс ХIусманов ХIусман.
Увну ур ХIусман май зурул 18-нний 1963 шинал Ккурккуллал шяраву дяъвилул участник ХIусманхъал МахIаммадлул ва учительница Марияннул кулпатраву. Ряхва оьрчI бусса хъунмасса кулпатраву ХIусман чIана-чIивима ия.
Ккурккуллал школа къуртал бувну махъ МахIачкъалалив механический техникум ва Дагъусттаннал педуниверситетрал историялул факультетгу бувккуну, ХIусман зий икIайссия личIи-личIисса давурттай колхозраву. Махъсса шиннардий ва зий уссия Лакрал райондалул агьали давурттал дузал баврил центрданий. Хъунма хIал къавхьуссия ва Лакрал райондалул ЦСОН-лул хъунаманал хъиривчуну ивтун.
Шанна-мукьра шинал хьхьичI кулпатгу аьпалул хьуну, шанма-шанма оьрчIалсса буллай уссия. Лавгунни мигу ятинтал бувну. ХIусман икIайссия дакI хъинсса, аьмал-хIал бавкьусса, хъярч-махсара бусса. Ванал тачIав щинчIав къаччан бикIан бувшиву къакIулли. Жун, ванащал ца классраву дуклай бивкIсса оьрчIан ва душваран, щалагу Ккурккуллал жяматран хъинну кьувтIунни ХIусманнул бивкIу.
Ва хъуннасса кьурчIишиву кIидачIлай, жижара буллай буру ванал ссурваврахь, оьрчIахь, махъсса-гъан маччанахь. Цал рухI алжаннул ххари даннав, гьав нурданул дуцIиннав. Ванал къабуллусса оьрму ванал оьрчIан булуннав.
АрхIал дуклай бикIминнал цIанияту
Андриана Аьбдуллаева
____________________________________________________________
Аьмаева Зугьра Аьбдулмажидлул душ
Вай гъинтнил кIирисса гьантрал къия диян дурссарив къюкIлийн, Аллагьу тааьланал буллусса итабавкьусса гьантта бухлавгссарив, аьпалувух бивхьунни ххаллилсса хъамитайпа, ласнан бакъа чара бакъасса кулпат, цилваминналгу, ласнал ляхъиндалулгу хIурмат лавайсса инсан Аьмаева Зугьра Аьбдулмажидлул душ.
Зугьра бувну бур ГьунчIукьатIрал шяраву Аьбдулмажидлул ва Аьишатлул кулпатраву 1948 шинал. Дуккавугу дурну, жагьилсса, ябацIансса Зугьрал оьрмулул дус хьуну ур КIямашрал шяраватусса Аьмахъал ЯхIия. Ласнал хъунмасса ляхъиндалунгу хъинну ххирая, хIурматрай бия Зугьра. Аьмаев ЯхIиянал хъаралу Зугьрал хъуни бувна шанма оьрчI: ца арс, кIива душ. Зугьран багьуна жагьилсса арснал щар аьпалувух бивхьуну шиннардил хьхьичI миннал шанма мюрщисса душварангу буттал нинушиву дакъа, нинушивугу дуллан. Вайннангу чIалачIин дакъая буттал ниттиха. КIилчингу щаву дурунни вайннал дакIний, дакъасса ниттицIун буттал нинугу ларсун мажал бакъасса ажалуннил.
Зугьра зий бикIайссия Совет хIукуматрал чIумал ресторандаву дукрадувуну, ттучандалий машачину. Чув, ци даврий зурчагу, Зугьра бия даву чIануйн дагьан дурну, урувгма мяш хьунну дайсса хъамитайпа, зунттал яхI-къирият оьрмулухун дакIниву ларсун нанисса инсан. Зугьрал чIун дакъасса бивкIулул кьурчIишиву кIидачIлай, жижара буллай бур ласнахь ЯхIиянахь, арснахь Абсалуттиннухь, душварахь, арснал душварахь, уссихь, ссурваврахь, ласналгу, цилвагу ссурахъаврахь, куявтурахь ва щалвагу агьлу-авладрахь. Зугьран бакъасса оьрмулул бутIа вания бивзминнан ххи бувну лякъиннав. Гьав нурданул дуцIиннав, алжаннул ххари баннав.
Амин! КIямашрал
ва ГьунчIукьатIрал жямат
———————————————————————————————————————————-
Шяъваннул аьпалун
Ва зурул ахирданий мукьцIал лахълай бур ШавкIратусса Рамазаннул ва Аминатлул арс Шяъван жуятува личIи увну хар-хавар бакъасса бивкIулул.
Шяъван ия ШавкIуллал жяматрал чирахъ, шяраваллил ттарцI, хъинну хъунмасса яхI-къириятрал заллу, лакраву ххаллилсса лаккучу.
Кумаг аьркиннал чIарах къауккайсса, яхI-къириятрал увцIусса Шяъван дунияллия лагаву хъинну кьурчIи бивзунни цинявннанмагу.
Шяъван тIи чаннацIукуй,
ЛухIи паранну щурив,
ШавкIуллал мусил зунттуй,
Мусиват вийн ливкссарив?
БивкIулул цIу лещан дан
Махъру чув лякъинтIиссар,
Зул дакIру рахIат дуван
Дуаь щил чичинтIиссар?
Шяъван, ина лахъарчан,
Бюхттул зунтту кьа шайва,
МикIларчI ратIух ачирчан,
МикIру баслан бикIайва.
Лавмартсса му бивкIулухь
Ссавур дува куния,
Ххиранахь барчаллагь чин
Мутта була куния.
Агь, лавгссарив, лавгссарив,
Ина акъа мукьцIалгу,
Дягъулий кьабивтссарив
Щаллу къавхьу хияллу.
Мачча душ Сурая
