Вай махъсса иширттал цал ххишалану ккаккан бунни ччимур чIумал ччимур хьун бюхъайшиву, инсангу, бюхъавай, укунсса иширттайн хIадурну икIан аьркиншиву. Цимурцаннуйн хIадурну бикIан къахьурчангу, жунмагу, цайминнангу кумаг буван хьуншиврул, цаппарасса маслихIатру бучIину лякъинссар.

* * *
Аьркин хьунгу, къахьунгу, мудангу хIадурну бикIан аьркинссар щин къадуххайсса кьуцурттуву ягу цамур затраву бивхьусса документру, фонарик, аптечка, гъилисса янна, арцу…

* * *
Бюхъавай, телефонгу, фонарикругу, цайми-цайми ва журалул затругу зарядкалул чулуха щаллуну диртун хъинссар.

* * *
Къатлувун щин дачирчан, мугьлат бакъа буккан аьркинссар мюхчансса кIанайн, хIадур бувсса чантайгу лавсун.

* * *
Къатлул чIирай ягу лагма-ялттусса аьрщарай хъякру хIисав хьурчан, къатлуву думур ххассал къадуллай, зува ххассал хьунмур буван аьркинссар.

* * *
Агана щин ягу лекьру сававну къатлува буккан къавхьуну личIарчан, муххал затрайн (батареярттайн, турбардайн) кьутIа тIун аьркинссар, лагма-ялттуминнан, ххассал бувултран баяншиврул.
Укунсса чIумал хьхьурай фонарик лахъан, дяхтта зулла янналувасса яргсса чаннасса ци-дунугу ттугъ кунна лахъну гьаз дуван аьркинссар, зува хIисав хьуншиврул.

* * *
Укунний, гьанавиххул къавхьуну, вев-гьарайлун дакIнилмургу, чурххалмургу гужгу харж къабувну хъинссар.

* * *
Къахьунмур хьусса чIумал, 112 номерданийн оьвкуну, зунма хьумур, зува бусса кIану бусан аьркинссар.
ДакIний битира ва ­номерданийн интернет дакъанийгу, хIатта телефондалуву сим-карта дакъанийгу оьвчин шайшиву.

* * *
Бала-апатIсса тагьар хIасул хъанахъисса чIумал хьхьичIва-хьхьичI лещан аьркинссар къатлувусса газ, чани ва щин.

* * *
Щин дарцIусса кIанттурду машиналий лахъанмур мабулларди, 20-30 см лахъсса щин дусса кIанай машина лавсун бачайссар. Ялагу, ялун буруган куртIну къачIаларчангу, щин дарцIусса кIанай, лувату аьрщи щинал ларсун, куртIсса ва дачIрасса кьакьа дикIангу бюхъайссар.

* * *
Нехру, мугьалтту буккан бюхъайсса неххамачIая, вивппай лавгсса кIанттурдая архну бикIан аьркинссар.

* * *
Щинаву левщун, къур буван къахъанахъисса машиналува буккан аьркинссар. Ялун щин диллай, му бюкьансса ягу лавсун гьансса хъуннасса нигь дуссар.

* * *
Щинаву личIарчан, кIусса янналуцIа ва уссацIа мурахас хьуну хъинссар. Щинал лавсун бачирчан, хIарачат буван аьркинссар зумардачIан гъан хьун, миккумур щинал гуж чанссар. Мукунма ссацIун-бунугу лачIун.
* * *
Зунттул хъачI, валт лекьлакьийни чIарав хьурчан, янналух, жиплуву карщух майгу, кьацIгу бащан аьркинссар ххиттуя.

***
Къатрава щин ларгун, зува зана хьуну махъ ххал бувара гьану щябивкIунмагу бакъарив, хъякрурду хьунурагу дакъарив. ТIитIин ­думур тIиртIуну, къатри кьакьанмур, гьава бухханмур бувара.

* * *
Къатрава щин ларгун махъ хасъсса пишакартурал ххал къабувна малахъари я газ, я чани. Экьинай ягу замыкание хьуну дикIан бюхъайссар.

* * *
Къатран, машиналун, цамургу хъуслин бивсса заралданухсса компенсация ласуншиврул, хьумур лакьланнин, дуккан дулланнин, цал цимурцаннул сурат рищун, видео ласун аьркинссар. Администрациялийн буккан аьркинссар зарал бивминнал сияхIравун зувагу бичиншиврул.

* * *
Агана страховка духьурча, бала-апатI хьусса хьхьу-кьинилул дянив страховой агентнайн оьвчин аьркинссар. Харж хьумунихсса чекругу диртун хъинссар.

* * *
АцIрахъул шиннардий, хIатта бусса оьрмулий, дуллай бивкIсса къатрацIа шаву бигьасса иш бакъассар, щин-бухьурчангу. Мукуннугу, бумунийн щукру бувну, зулла дакI зура дуван аьркинссар. Зул паракьатшиву – оьрчIалгу, махъминналгу паракьатшивур.

* * *
Лирну ларгмур ца кьини дазин, дакьин дуван хIарачат мабулларди, оьрмунияр, цIуллушивунияр ларайсса цичIар дакъассар. Дуваймур паракьатну, чан-чанну дуллай дувара, зущава шайсса ка-кумаг чIаххув-чIарахнангу буллай. АрхIал дуллалисса даврил лагма-ялттуминнащалсса арардугу цIакь дувайссар, дакIгу паракьат дувайссар.
Буруччиннав Хъунасса Аллагьнал жува цинявппагу оьмунища, бала-апатIирттаща.

ХIадур бувссар
Бадрижамал Аьлиевал