«Дагестан» РИА-лий хьунни республикалий хIасул хьусса захIматсса тагьардануцIун бавхIусса масъаларттал хIакъиравусса пресс-конференция. Спикертал бия Дагъусттаннал цIуллу-сагъшиву дуруччаврил министрнал хъиривчу Патхула Патхулаев, ЦIуллу-сагъшиву дуруччаврил ва медициналул профилактикалул республикалул жяматийсса центрданул хъунаманал хъиривмур Элеонора Аьлиева.
Вайннал бувсунни хIакьинусса кьини щин ялтту лагаврицIун бавхIуну республикалий хIасул хьусса захIматсса тагьардания, хаснува щинал марцI-чапалшиврул тагьардания, маслихIат бунни укунсса шартIирдай лахъай азарду ппив къахьун, жула цIуллу-сагъшиву дуруччаву мурадрай цукун занакьулу бикIан, ци чаран лякъин аьркинссарив. Патхула Патхулаевлул бусласимунийн бувну, хIукуматрал аьркинсса кумаг бантIиссар балаллул зарал биян бувминнан. МахIачкъалаливсса ва Дарбантливсса бала-апатI хьусса кIанттурдаясса пациентътуран бивхьуну бур ххишаласса 180 койка. Салкьи дурну дур дарурттал ва вакцинардал луртан. ХIасил, региондалул медициналул система хIадурну дур иш багьний кумаг бан. Вакцинация цIанасса тагьарданий агьалинал цIуллу-сагъшиву дурччинсса, инфекциялул азарду ппив хьун къаритансса чаран хъанай бур. Патхула Патхулаевлул оьвчаву дуллай ур агьалинайн загьрулул хьусса ишру хьурча, цалва чаран къаляхълай, мугьлат бакъа пишакартурайн буккан.
– Жува чаран ляхълай, тагьар хъиннура оьнивун дутан бюхъайссар, – увкунни ванал. Мукуна ва ур нитти-буттайн оьвчаву дуллай, оьрчIан вакцинация дара тIий. Патхула Патхулаевлул барчаллагь баян бунни Дагъусттаннайн кьини дурксса чIумал, кумаграл ка тIиртIусса чIаххуврайсса республикалул агьалинайн
– Гьарица кьини жучIанна дукIлай дия 20 тонналия 50-ннийн дияннинсса щин Чачаннава, Къарачай-Чаргаснава. ЦIанагу щалагу билаятрая жунма кумагру най бур, – увкунни ванал.
Спикертурал къадагъа дунни республикалул агьалинай так щара лархъсса ва шушравасса щин хIачIан. Щин чара бакъа шанна минутрайсса, ххишалагу щарай дитан аьркинссар ягу шамийла щаращи дан аьркинссар, цанчирча цаппара инфекцияртту мукун дакъа дирчIан дан къахьунтIиссар. – Токрайсса чайник ацIния ххюра секундрава лещайссар, му чIун къагьассар инфекция дирчIан дан,– бувчIин бунни ванал. Элеонора Аьлиевал кIицI лавгунни азардая мюхчан хьун бигьашиву, ми хъин даннияр. Ванил ккаккан дунни республикалий электрон журалий ппив дурсса агитациялул материал: памяткарду, буклетру, листовкарду, санитар плакатру.
Ванил бусласимунийн бувну, цинявппагу шагьрурдайсса ва районнайсса азарханардай зий бур медициналул профилактикалул кабинетру, профилактикалул давуртту дуллай бур оьрчIал поликлиникардал мюрщиминнансса ва дуклаки оьрчIансса отделениярттащал, мукунма студентътурал поликлиникардащал цачIу. Патхула Патхулаевлул бувсунни региондалул медициналул система хIадурну душиву агьалинан кумаг бан. Ванал бувчIин бунни, цIухху-бусу бан ччиминнан, цивппа цIакь бувсса поликлиникарду бушиву. Пишакартурал бувчIинбавуртту дантIиссар вакцинациялул хIакъираву. Зарал бивсса районнайн мугьлат бакъа гьансса фельдшертурал ва хIакинтурал бригадарду сакин бувну бушиву.
Андриана Аьбдуллаева
