Гьашину, 2026-ку шиналсса, щалагу Ккуллал райондалул цачIусса «Интнил хьхьу» дуван пикри хьуну бия Вихьуллал шяраву.
Хъинну ххуйсса пикри хьуну бия.
Байран цурдагу хьунни мартрал 25-нний, Вихьуллал шяраваллил хьхьичIсса ттизаманнул бигьалагай багъраву. Дурая уттигу зунттавун гъилишиву дагьангу. Буллайнма бия кIинтнил зурдардийвагу къабувсса марххалагу. Зунттавусса инсантуран инттусса марххалагу ччиссар лухччи щинал дурччуну дикIаншиврул.
Интнил цила гъилишиву жунна чIал къархьуну бахшиш дулланшиврия буслай бия мурхьирдая мурхьирдайн, магъая магъайн лехлай, янилун багьлагьисса вяркъултрал, чIелмултрал, хьхьируннал ва цаймигу лелуххантрал. Бия янилун багьлай чIимучIалттугума. Байран дулламиннахун дахкъачин бухьунссия, тIабиаьтралгу дарусса, даркьусса кьини бахшин дурну дия.
Тамаша банмурдив «Интнил хьхьунил» байрандалий чансса дакъая. Лагмава райондалийсса 14-гу шяраваллил цала-цала къушру бивщуну бия. Байрандалий гьуртту хъанахъиминнава чIявумигу бия шяраваллал культуралул къатрал ва библиотекарттал зузалт, школардал дуклаки оьрчIру.
Шиккува кIицI буван, ца миллатрал бухьурчагу, жула гьарцагу шяраваллил цила-цила дахханашивуртту дикIай.
Шяраваллал гьарца къушлил хьхьичIух ранг-рангсса хъаттирдал ссупрардай дирхьуну дия личIи-личIисса лакку дукрарду ва хьхьичIара ишла дуллай бивкIсса тIахIни-кIичIу.
Шяраваллал гьурттучитал цала-цала къушличIа бацIайхту, «Интнил хьхьунил» байран тIиртIушиву баян бувуна Хъусрал шяраваллил Халкьуннал театрданул режиссер Марсел Сулаймановлул. Яла, циняв лавай бавцIуну, вичIи дирхьуна Аьрасатнал ва Дагъусттаннал гимнрах. Инт дайдишаврил шадлугъ барча дуллалисса махъ лавхъуна Ккуллал райондалул бакIчинал хъиривчу Анатолий Давдиевлул. Хъирив байран барча дуруна Вихьуллал шяраваллил администрациялул бакIчи СайкIу Сулаймановлул.
Муния махъ дайдирхьуна аьдатру ккаккан дуллалисса шадлугъ. Цалчин майданнив бувккуна Вихьуллал коллектив. Ца ххуйну чIалай бия чIинчIурдаву ва бакIвахIурттаву Вихьуллал хъами. Вихьуллал Культуралул къатлул худрук Оьмариева Камилатлул хIадур дурну дия авадансса программа. КъавтIавривух гьуртту хъанахъисса школалул душваврахь дия царай авурну чIюлу дурсса бартри. Щаллу бувуна вайннал интнихасса балайрду, дурккуна саннарду. Вайннал хъирив ирглий ккаккан дуруна цалла-цалла шяраваллан хасъсса, лакрал миллатран аьмсса «Интнил хьхьуницIунсса» аьдатру 2-мур ЦувкIуллал, ЦIущаннил, Къяннал, ЦIуйшиял, Хъювхъиял, Хъюйннал, ЧIяйннал, Ваччиял, СунбатIуллал, Ккуллал, Хъусращиял районнал культуралул къатрал зузалтрал. 1-мур ЦIувкIуллал пагьламантуралгу, машгьурсса пагьламан Маммаев Камиллулгу дия маразирттайх ччиманаща лахъан шайсса пагьланну дархIуну. Миннуй цала гьунарду ккаккан буллай бия ЦIувкIуллал школалул дуклаки оьрчIру.
Байран лахъи ларгуна кIира-шанна ссятрай. Ахирданий гьурттучитал цачIу бавцIуну, хъамакъабитулунсса суратругу рирщуна.
Р.S. Махъсса гьантрай бувсса марххала сававну, шяравун нанисса ттукIрал тталлу гъавгъун, чани бакъа сайки ххюва гьанттар. Мунияту чIал хьунни ва макьала кказитрайн гьан дувангу.
Нагу зул хIурматрайсса ХIажимурад ХIусайнов,
ш. Вихьул
