Дахьрая марххалттанил ясирдануща ххассал хьусса Ккуллал райондалийсса шяраваллу. Шикку ялапар хъанахъисса инсантуран хъунисса зараллу хьуну буссия. Республикалий хьусса ишругу чIалай, къабигьасса зунттал кIанттай ялапар хъанай аьдат хьусса инсантал, цала яхIирай лахълай бия цайнна дурксса кьини.
Шанма-мукьва гьантлий ттукI бакъа, муницIун бавхIуну связьгу дакъа, инсантурая ябувцун бия. Балчант бюкьануксса марххала бувсса чIумал, цуксса захIматну бухьунссия зунттай, мащай ризкьи ябуллалисса инсантуран. Цалчин бувсса марххала бассаннин, ванила ялун кIилчингу хъиннува хъунмасса марххала бувну, инсантурал къатта-къушлил магъив, чIиртту левкьун, зараллу хьуну бур. Райцентрданий Ваччаврагу связь дакъа, цукун-бунугу Гъумукун бувкIун, МахIачкъалалив телефоннавух оьвчин занай бия Ккуллал жямат.
Вана уттигу сайки нюжмар шавай дур Ккуллал район цивилизациялия арх дурцун, я оьвчин, я чунчIав буккан къахъанай. Мюрщисса оьрчIан, бугьараминнан ва мушакъатминнан медициналул кумаг банссарагу сант дакъа ливчIун инсантал. Цинявннан ккарксса видеороликрай ххал хьухьунссар Хъусращиял шяравалу марххалттанилу лирчIсса куц.
– Нюжмар хьунни шяраву ттукI бакъа, чунчIав оьвчин, буккан къахъанай. Ттучанну зий бакъар, дуки-хIачIия духлаглай дур. Шаймур буллай буру, инсантурал къатрал магъая марххала бичлай, ка хъирив лаллай дакъар. Мадарасса халкьуннал къатрал магъив леркьунни. Шинмай личин бюхъайма бухьхьияра зула къатрал ци тагьар дурив ххал дан, – тIий, оьвтIий ур Хъусращиял шяраваллил администрациялул бакIчи Арсен Аьлларазуев.
Цаппара гьантрал хьхьичI щархъавусса ттукIрал ци тагьар дурив ххал дан на оьвкуссия «Россети Северный Кавказ» ПАО-лул Ккуллал райондалийсса участокрал хъунама мастер Серегин Щамхаловлуйн.
– Инттухунмай Ккуллал райондалул щархъавун бунни кIира-шанна метра шавайсса марххала. Гьарица марххала бувтари, марч бивщутари, буруккин багьай, вай ттукIрал тталлу зизинссар, ххаллу руцари хьунссар, щалла район ттукI бакъа личIанссар тIисса. Сайки цинярда шяраваллаву мукун хьугу-хьунни. Ттула даврийн ачин машина марххалттанила буккан бан къахъанай ливчIра. ХIакьинусса кьини жул участокрайн хъар хъанай дур щархъавусса ттукIрал дузалшинна. ЧIяруми ттукIрал линиярттайсса ххаллу хIурану дуну, ччя-ччяни руцлан дикIай. Марххала бакъанийвагу захIмат-жапасса ххуллурду бусса шяраваллавун ххуллу ласунсса техника, машина жучIа бакъар, – тIий ур ва.
Серегиннул каялувшиндаралусса участокрал зузалтрал шанма гьантлул мутталий марххалттанивух хьхьу-кьини дакъа зий, райондалул цинярдагу щархъавун чани бучIан бувссия. Вайннал захIмат зиялий лавгунни. Цала даву дакIнийхтуну дуллалисса зузалт уттигу техника къалагайсса зунттал щархъавусса ххуллурдайх занай, аварияртту хьусса участокру дакьин дуллай бур.
Серегиннущал ва ванал зузалтращал хьусса ттула ихтилатраву цIухху-бусу буллай, вай кIицI лаглай бур трансформаторду, ттукIрал линияртту дакьин дуллалисса яла бигьа дакъамур участокрай цивппа зий бушиву. Укунсса чIумал вай бур цала кIулминнахь, гьалмахтурахь зунттал щархъавун гьансса машинартту булара тIийгума занай. Буниялагу, вай цимурца иширттан аьркинну дур хасъсса техника, хьхьичIва-хьхьичI машина ва цала давриву ишла бансса ярагъ.
Вайннал мюхтажшин щаллу дан аьркинни ва даврил жаваб дулайсса хасъсса къуллугъирттал, вайннал чIарав ацIан аьркинни цума ухьурчагу ка-кумаг бан бюхъайма, каши дума.
Имара Саидова
