Уттигъанну МахIачкъалалив Расул ХIамзатовлул цIанийсса Миллатрал библиотекалуву хьунни Беларусь АьрасатнацIун цачIун хьуну 30 шин шаврин хас бувсса, «Беларусь – Дагестан: духовное родство» тIисса цIанилусса Щалагу Аьрасатнал VII-мур форум. Мероприятие сакин дурну дия «Уздени Дагестана» ДРОО-лул ва ДР-лул Миллатрал политикалул ва диннал иширттал министерствалул чIарав бацIаврийну.
Шикку гьуртту хьунни властьрал органнал, рувхIанийсса, жяматийсса идарарттал вакилтал, Беларусьнавасса хъамал, чил билаятирттаясса студентътал, искусствалул ва культуралул ишккаккулт.
Форум наниссаксса хIаллай библиотекалул жанахIраву тIиртIуну дия «Вижу Беларусь такой» тIисса цIанилусса Беларусьнал фотохудожник, Беларусьнал Чичултрал союзрал член Владислав Цыдиклул фотовыставка.
Мажлис тIитIлай, ихтилат бувна Миллатрал библиотекалул директорнал хъиривчу МахIаммадрасул МахIаммадрасуловлул. Ванал кIицI лавгуна форумрал мурад Аьрасатнал ва Беларусьнал дянивсса хIала-гьурттушиврийсса ва дусшиврийсса арарду цIакь даву душиву.
ДР-лул миллатрал политикалул ва диннал иширттал министрнал хъиривчу Камал ГъалбацIовлул бувсуна, билаятрай захIматсса тагьар хIасул хьусса ппурттуву, Беларусьнал халкьуннал жула миллатирттал дянивсса тарихрал, культуралул ва патриот тарбия дулаврил кьиматрай дурмур лайкьну дуручлай бушиву. Ванал мукунма бувсуна, Дагъусттаннал Муфтиятрал ва Беларусьнал Бусурмантурал рувхIанийсса управлениялул дянивсса хIала-гьурттушиврийсса кьутIи дурну душиву. Беларусьнал рувхIанийсса управлениялул вакилтал мудангу гьуртту хъанай бур Дагъусттаннай буллалисса Дунияллул халкьуннал дянивсса жагьилтурал диндалул форумирттай.
Форумрал агьамшиву кIицI лаглагисса ихтилатру бунни «Уздени Дагестана» ДРОО-лул председатель Керимхан Умахановлул, Дагъусттаннайсса Аьрасатнал аьралий тарихрал суккушиннарал отделениялул каялувчи Энрик Муслимовлул, Дагъусттаннал Хъаннил союзрал председатель Хасайбат Валиевал, «Республиканский центр русского языка и культуры» ГБУ РД-лул директор Руслан Луговойлул, МахIачкъала шагьрулул Жагьилтурал парламентрал председательнал хъиривмур Ххадижат МахIаммадовал, региондалул Ветерантурал советрал председатель МахIарам Аьлиджановлул, Дагъусттаннал Музыкантътурал союзрал правлениялул председатель Хан Башировлул ва м. ц.
Форумрал лагрулий «Уздени Дагестана» ДРОО-лул чулухасса хIурматрал грамотартту дуллунни Хасайбат Валиеван, аьралийтал мюхчан бан ишла дайсса къертту щашлашисса «Диалог» тIисса центрданул каялувчи Зайнаб Рашидован ва Р. ХIамазатовлул цIанийсса Миллатрал библиотекалул чил билаятирттал мазурдил литературалул отделданул хъунмур Зарина Къажлаеван.
Хъамаллуран ва форумрал гьурттучитуран культуралул программа ккаккан дурна Дагъусттаннал халкьуннал артист МухIсим Камаловлул, Аьрасатнал искусствалул лайкь хьусса ишккакку Хан Башировлул, Дагъусттаннал халкьуннал артистка Зульфия Илиясовал, МахIачкъала шагьрулул 4-мур оьрчIал искусствалул школалул ансамбльданул къавтIалтрал. ДГМУ-раву дуклакисса чил билаятирттаясса судентътурал бувккуна ингилис мазрайсса шеърирду.
Форумрал лагрулий ккаккан дурна Беларусьнал культуралия ва рувхIанийсса ирсирая, хIала-гьурттусса дахIавурттая бусласисса видеофильм.
Имара Саидова
