Хъунисса гъараллу багьана хьуну, Дагъусттаннал агьалинайн кьини дурксса ппурттуву кумаграл ка тIитIинмигу анавар бувккунни, миннал бувсса кумагругу ва аварасса ппурттуву хъинну бусравгу хьунни.
«Русский Крест» тIисса кумаграл фондрал Дагъусттаннайн диян дунни 40-нниха лирчусса тоннарду хIачIайсса щинал, 1000-нниха лирчусса синттул усру, ххассалбувултрансса ва волонтертурансса экипировка. Агьалинащалсса хьунабакьаврий гьуртту хьунни кIицI лавгсса фондрал каялувчи Евгений Благов ва машгьурсса спотрсментал : ХIайдарбаг ХIайдарбагов, Альберт Салимов, Альберт Батиргъазиев. Евгений Благовлул кIицI лавгунни, Дагъусттаннал агьалинал бакIрачIан кьини дуркIсса хавар баяйхту, гассят хIукму бувшиву кумаг биян буван.
Аьрасатнал коммунистътурал партиялул (КПРФ) ЦК-лул председатель Геннадий Зюгановлул тапшур бувну, Ставропольлал крайрал коммунистътурал гьан дурну, МахIачкъалалив дуркIунни 20 тонна марцIсса щинал. Вай дарчIунни Каспийскаллал «Кемпинг» микрорайондалул агьалинайх, 10 тонна диян дунни МахIачкъалаллал азарханардайн. Вай кумагру бувкIссар цалчин щинал мугьалтту бувксса ппурттуву. КIилчингу гъаралуннил аьтартту бувксса чIумалгу, Ставропольлал крайрал губернатор Владимир Владимировлул цала Телеграм-каналданий чивчунни: «Ялув магъи дакъа ливчIсса инсантуран щингу, чара бакъамургу гьан дувантIишиву ва цал гьан дуваврий гьашиву къадувантIишиву».
Вара КПРФ-лул фракциялул Нальчик Шагьрулул Мажлисрал депутатътуралгу гацIана транспортрай хIачIайсса щин тIайла дувккуна Дагъусттаннайн. Ва иширал сиптачи ПатIимат Хаджиевал кIицI лавгуна Ухссавнил Ккавкказуллал агьалинал мудангу цайнна дурксса кьини цачIу-чIарав бавцIуну лахъайшиву, тавакъю бувна цайми республикарттал агьалинахьгу кумаграл давурттавух шайкун хIала буххан.
Къабардин-Балкьарнал 60 тонна щинал гьан дуршиву ва уттиния тинмайгу чIарав бацIан хIадурну бушиву бувсунни республикалул бакIчи Казбек Коковлул.
ЦIанакул инсантуран яла аьркинмур марцIсса щин духьувкун, регионнал хIарачат бур щин тIайла дуккан жучIанна.
Кьура тонна марцIсса щинал, медикаментру, лаххия, дуки-хIачIия дуркIунни Ухссавнил АьсатIиннавагу. Гуманитар кумаг бавтIун бур республикалул дакIру цIимисса агьалинал, жяматийсса ккураннал ва волонтертурал.
Къарачай-Чаргаснал Республикалиягу бувкIунни щинайнусса кумаг: кIива хъуни машина МахIачкъалалийн, ца – Каспийскалийн, цагу – Хасавюртлийн 80 тонна щинал. Ингушетиянал ва Чачаннал 70 тонна щинал диян дунни Дагестанские Огни шагьрулийн. Ингушетиянава дуркIунни 50 тонна щинал, «Народный проект «Безликие» тIисса идаралул гьан дурну. Чачаннава Аьрасатнал Виричу АхIмад-ХIажи Кьадировлул цIанийсса фондрал 20 тонна дуркIунни.
Шиккува кIицI лаганну, цалчинсса гъараллу ларчIсса ппурттуву Ингушетиянал Ххассалбувултрал колледжраву дуклакисса студентъталгу цивппа хушрай кумаг буван бувкIшиву ва щинахьхьун лавгсса къатрава инсантал буккан буллай бивкIшиву.
Кумагру буллай бия инсантал цивппа-цивппалугу. Аьрасатнал телеведущая Виктория Бонял ца миллион гьан бунни кумагран. Ванил тавакъю бунни Аьрасатнал агьалинахь, Дагъусттаннал чIарав бацIияра куну. Шиккува кIицI лаганну, ванил 12 миллион подписчиктурал бушиву. Кумаграя бусанну гихунмайгу.
