Аьтарттал, мугьалттал жюружантталу МахIачкъала ливчIсса кьинирдай хасну ттунма заралгу, асаргу хьусса иширая.
БакIрайва, найбунува учинна, ттунма кIулцириннавугума цикссагу бушиву «сагъну личIаврийн щукру!» тIутIисса. Щин сававну ялун бивсса бала-мусиватраща ххассал шаврияр хъуннасса тирхханну дикIан къабюхъайссар тIутIисса. ТIайлар. Рязийра.
Жула инсантурал ссавургу ил-аьлам махIаттал бувансса дур. МуницIухва, ялун ливксса балардугу ччяни ялатугу ласуннав, инсантурал дакIурдива къумашивугу ччяни дукканнав, зараллу бивминнахьхьун ссавур Заннал дулуннав тIий, ккуру ританна ттулламур гурга. Шагьрулул дязаннивсса квартира бавххуну, Редукторный поселокрайн, давричIан гъанну лавсун, бивзссияв.
«Приморская» тIисса подстанция, цахъис гужсса гъарал дуний мудан щинаву личIлачIисса аваралул гавацIана гьанагьи бувна бакIраву суаллу: циванни хьхьирил зума-къирагърайсса къаучирча, хьхьиричIан гъансса подстанция бюкъакьанну лахъну къабишайсса? Щин къадацIайсса шяраваллал кIанттурдайгума подстанциярду мудан гьазнурхха бишайсса бивкIсса. Гьазнур бусса буттал шяраву ЦIувкIрав трансформатор.
Ва ххуллухьгу мукьва гьантлий чани бакъа бивкIру, щин дакъа бивкIру. Инсантуран хъуни-хъунисса зараллу хьуний, ламусри укунсса иширттая гъалгъавагу сукку буллан. Амма, ва базилухь, щил ци учирчангу, ламусрахун бувтун, ванияр хъунисса зараллу хьуссагу бурхха куну, кьабагьайсса иш бакъар. Вава иш кIилчингу тикрал хьунутIийгу ва, гихунмайгу тикрал хъананссар тIисса нигь дунутIийгу. КIилчинсса гьанттар уттигу цIуницIа чани бакъа. Хьхьу-кьини цIуницIа щин дуккан дуллай зий бушиву баян бунни энергетиктал ва МЧС-рал зузалт. Щин дуккан дайхту, оборудование кьакьан дуванссар.
Гьаннайсса, кказит буккултрачIан бияннин, булунссар чани. Булунссар тIисса тамахI бур.
БукъавчIаймурдив чIявур. Дунияллул цумур-бунугу мурцIний ца бала хьурча, Дагъусттаннал агьали хьхьичIва-хьхьичI бивзун, ххявххун бачай. Аьрасатнал МЧС-рал, цайми регионнал ххассалбувултрал кумаграя ттун къабавунни. Ялун бучIарча къакIулли.
На гуманитар кумаграя ва Ккавкказуллал халкьуннал кумаграя бакъара тIутIисса. Ми кумагирттая личIину макьала чичлай бура. Ихтилат хасну МЧС-рал цIакьлияр. Жулла республикалий щин лябуккулий, сантирай дуккан дайсса техника чанну духьурча, му тIалав дуван, дучIан дувансса сантрив къадиркIсса? Мукьва гьантлий ца подстанциялиягума щин дуккан дуван къархьунни, хьхьу-кьини захIматкаш-энергетиктал зий бунува. Ларайсса технологиярттал заманнай укунсса ишру къабикIан аьркинни. ЧIявусса оьрчIру бусса кулпатирттан холодильникирттавумур экьиличин багьунни. Бия дякъий бакъа ябан къабучIисса ххирасса даруртту экьиличин багьунни тIутIиссагу. Яла-яларив, дакъая связь. «Анаварсса кумаграл» машиналийнмагу оьвчин хъанай бакъая, хIаятравун бувккун тихунмай-шихунмай лечлай, оьвчинсса хIарачат буллай бия. Щинайнусса, тIабиаьтрайнусса баларду ялун бивний дикIан аьркиннихха связь. Ялагума укунний аьркин хъанайгу духьувкун!
Иттав макь дучIан дуллалисса бия инсантурал куннал куннан буллалисса кумаг. Даруртту, хIачIайсса щин аьркинсса кулпатирттал хавар бувара тIий бия. Щин ххилай бия жул хIаятравунгу. Лаващиял райондалиягума бувкIуна зунттал щаращул щинал хъун кьали бувцIуну. Лавайсса зивурдай, мюрщисса оьрчIру буминначIан ххилай бия чIаххув-чIарахми.
Телефонну зарядить дуван дулара, шагьрулувун мачча-гъанначIан най ура, бура тIисса бия. Мукунма, лага-учIансса кIану бакъахьурча, дачалий , чунмай-бунугу цачIанма нанияра, цала квартира гьантта бикIан булунну тIутIиссагу бия. Балаллул инсантурал дакIру цачIун дурну дия. ЧIаравсса къатлуву (депутатътурал дом учайнуккар) дукрагума хIаятраву цIарай дуллай бия. Циняв ца урцIух ккуркки лавгун, хъатIан чIумал цачIу-чIарав чIун гьан дуллай бия. Укунсса суратирттал ххуйшивугу дакIурдиву кюртти бувну личIантIиссар. Хъиншиву, хъинбала буван хъит тIий бивкIминнал чаннасса симаннугу. Укунмирив республикалий чан бакъар, щукру Заннайн.
«Талгинкалия» тIайла хьуну, цалчин дакъар ратIругу, нехругу зумардава личлачисса. «Илчилий» зий бивкIсса, цIана на кунма Редукторныйлив «Приморская» подстанция бюкьлакьаву бухIлан багьсса АьтIикат ХасмахIаммадовал къаучирчангу, ва Редукторный поселокраймур «Талгинка» ратIнил бутIа, шивун дичлачисса цIинцIал бувцIуну бия. Сайрданий бувкний ратIнил чIарах гьан къашайва, гивасса кьункьал оьккишиврул. «Гьавалул тагьарданийну вакссава баларду къаликкантIиссия, шагьрурдай ливневкарду дурну диркIссания, хъунисса трассардай щинаххуллурду бувну, щин неххардийн тIайла дарча, багьайсса кIанттурдай чIивиличIлачIисса Каспий хьхьирийн тIайла дарча», – укун тIий бур АьтIикат.
Ливневкарду къадурну ляркъусса ( ягу жипаву дурну ляркъусса) чиновниктал бувгьушиву баян бунни. Гьаннайсса, цимил учирчангу, кьини дурккунни инсантурайн. ХIучI тIий дур ттул дакI утти. Хъун гъарал къадуркния тIисса дуаь дуллан багьлай бур. Ливнеркарду кунма сейсмопоясругу къабувну (ягу жипаву бувну) къалякъин. Гъарал мугьалттал гьалакIу дурсса къатри, ца-кIива балланул зарзала хьувкунгу, къалекьан аьркинсса къатри леркьувкун, бан шайсса цичIав бакъанутIий. Буруччиннав бакьин буван къашаймур гъалатIрая, балардая, бюджетру жипаву бишин къисттанал къанихшиврия. Гьарца бала-апатIрая Аллагьнал цинявппа бурувччуну лякъиннав! Балаллухьхьун биривмигу ччяни чаннайн букканнав! «Хьумур хьунни, хьулуцIух бавцIунни» тикрал къахьуннав. Ягу : «Урша гъавгъунни, щин экьиларгунни» къахьуннав. Лякъинхьуви уттивагу чаранну.
Аьрасатнал Президентнал СКФО-лул Полпред Юрий Чайкал «Приморская» станциялийн ияйту, вагу, «Халимбекаул» тIисса подстанциягу ливневкалул дузал буван тапшургу бувнавхьур.
На ва макьала чирчуну хъирив кьини Аьрасатнал президент Владимир Путиннул МЧС-рал хъунама Александр Куренковлуйн ва Дагъусттаннал бакIчи Сергей Меликовлуйн тапшур бунни зараллу бивсса Дагъусттаннал агьалинан чIумуй кумаг буван ва апрельданул 7-нний хасну Дагъусттаннайсса иш-тагьар ххал дигьинтIисса совещание дуван.
