ЦIуссалакрал райондалийсса цаппара шяраваллаву, хъунмурчIин ЦIуссаккуллал шяраву, чIярусса гъараллу ларчIун, щин ялтту ларгун, баян бунни ЛяличIисса тагьар (ЧС).
Гъараллал хъунмасса зарал биян бунни инфраструктуралун ва коммуникациялун. Мунийну кIанттул инсантурал цIуллу-сагъшиврун нигьачIисса тагьар хIасул хьунни.
Ва тагьарданий ци зунссарив, цукун зунссарив, ссая байбишинссарив ххал бигьин райондалул бакIчи МаматIи ХIамзатовлул райондалул администрациялий, «Трестрал» къатраву, мугьлат бакъа совещание дунни. Шикку гьуртту хьунни профильданул подразделениярттал ва къуллугъирттал жаваблувсса зузалт. Хьунабакьаврил хIасиллайн бувну, ккаккан бунни хьхьичI ххуттайн ласунсса масъалартту. Инсантурал къатран, социал объектирдан ва инфраструктуралун бивсса зараллал хIисав-сан даву мурадрай, хасъсса группардал ххал бан зарал бивсса кIанттурду. Къатран хъунмасса зарал бивсса инсантал чIумуй бацIансса, ялапаршиннарал шартIру дусса кIанттурду щаллу бан, агьали хIачIансса щинал дузал бан, зарал бивсса инфраструктура цIу дуккан дан.
Вай масъалартту щаллу баву мурадрай сакин бувну бур профильданул идарарттал вакилтураясса зузи группа. Группалувуминнал гьарица кьини баян буллантIиссар райондалул каялувчи МаматIи ХIамзатовлуйн дуллалисса давурттая. Ванал бувсунни анаварсса мутталий тагьар къулай дансса ва зарал бивсса шяраваллал агьулданун кумаг бансса чаран ляхълай бушиву.
Андриана Аьбдуллаева
