Апрельданул 7-нний ВКС-рал низамрай хьунни Аьра­сатнал президент Владимир Путиннул каялувшиврийсса Дагъусттаннайсса тагьарданул хIакъиравусса батIаву.

Дагъусттаннал бакIчи Сергей Меликовлул президентнахь бувсунни яла гьарзану зараллу бивсса муниципалитетирттайсса тагьардая. ТIабиаьтрал апатIрал цалчинмур щатIи лавгукун, тагьар цалийн дуцин бювхъуну бур, амма ялагу ларчIун диркIсса гужсса гъараллая махъ цIунилгу захIматсса тагьар хIасул хьуну дур. Цуксса хIайпнугу, ­ливтIуссагу бур.

Зараллу бухлаган баврил давуртту ттигу найнна дур, зий бур зараллан кьимат бищаврил комиссия, зий бур тамансса инсантал ва техника – 1,3 азара инсан ва 241 техника, Аьрасатнал МЧС-рал вертолет.

Аьрасатнал министртурал бувсунни тIабиаьтрал апатIрал биян бувсса зараллу бухлаган баврицIунсса давуртту дуллай бушиву. Аьрасатнал президентнащалсса ихтилатравух гьуртту хьунни АьФ-лул строительствалул ва ЖКХ-лул министр Ирек Файзуллин, АьФ-лул цIуллу-сагъшиву дуруччаврил министр Михаил Мурашко, АьФ-лул транспортрал министр Андрей Никитин, АьФ-лул шяраваллил хозяйствалул министр Оксана Лут, АьФ-лул тIабиаьтрал луртаннал министр Александр Козлов.
Ахирданий Владимир Путиннул хIукму бунни ДР-лий тIабиаьтрал апатIрал биян був­сса зараллу бухлаган баврин хасъсса хIукуматрал комиссия дузал буван.