ЦIуссалакрал райондалийгу, гьар мудан кунна, тяхъану, яргну кIицI ларгунни буттал буттахъая шихуннай нанисса «Интнил хьхьунил» байран. Дунни ва байрандалуцIун, интницIун, тIабиаьт цIудуккаврицIун дархIусса жула аьдатру.

Байрандалий гьуртту хьунни цинявппагу райондалийсса культуралул идарарттал зузалт. Миллатрал лаххиярттаву, авурсса лачакирттаву, байрандалул ца яла яргмур лишанну хъанахъисса, цаннаяр ца ялтту буккан хIарачат бувну, чIюлу дурсса бартращал бувккунни хъами-душру. «Барта мяш» – вари байрандалул яла яргмур лахIза. Аьдатрайн бувну бивчуну бия хьхьахьхьари, бувну бия ккунукрал ххункIру. Бивчуна хъунмасса къавтIигу. Мюрщи-хъуни къаувкуну, цинявппа ххяхлай бия цIарал ялтту. Вагу «Интнил хьхьунил» байрандалул аьдатирттавасса цар. Дурна байрандалуцIун дархIусса дуаьрду: ттул цIуцIаву цIарахьхьун, цIуллушиву чурххахьхьун, цIуллушиву дулуннав, цIарал лама гуж хьуннав! «Интнил хьхьунил» байран дур тIабиаьт чантI учаврицIун, аьрщи цIудуккаврицIун, къурнил давуртту дайдишаврицIун дархIусса байран. Аьрщарал, хъу-лухччинулли жула халкь мудангу бакI буккан буллай бивкIсса. Дуллалисса дуаьрдугу муницIун дархIусса дур.

Баргъ-гъарагъи дакьиннав, къатта къалмул буцIиннав, лухччинул чIан дуцIиннав, чIаллул бакI дуцIиннав, хъу дюхъаннав, тта бюхъаннав, къурагьшиву къахьуннав!
«Интнил хьхьунил» байран дур миллатрал культура ядаврил, му ирсирай диян даврил байран. Балайрду, къавтIавуртту, тяхъасса тIуркIурду…
ЦIуссалакрал райондалул культуралул зузалтрал хъунмасса хIарачат бувну бия байран дакIний личIансса хьун.

Андриана Аьбдуллаева