Июльданул 13-нний МахIачкъалалив хьунни Дагъусттаннал Миллатрал цалчинсса кинопремия дуллалисса батIаву. Мунивух гьуртту хьунни ДР-лул Халкьуннал Мажлисрал председатель Хизри Шихсаидовгу.
Бадрижамал Аьлиева
КутIасса (короткометражный) документал фильмрал конкурс цурда сакин дурну дия «Арси-групп», «CINEMA HALL» (хьхьичIвасса «Пирамида»), «MTV-столица» компаниярттал кабакьаврийну, Дагъусттан Республикалул Жагьилтурал иширтталсса байсса министерствалул чIаравбацIаврийну.
Конкурсраву гьуртту хьун язи дургьуну дур 10 кутIасса документал фильм. Миннун кьиматру бивщуну бур «лучшая режиссура», «лучший сценарий», «лучшая операторская работа», «лучшая женская роль», «лучшая мужская роль» номинациярттай.
Ва конкурсрал сиптачи Далгат Далгатовлул бувсунни ва даврил агьамми мурадру бушиву гьунар бусса жагьилтал ялун личин баву, миннал чIарав бацIаву.
АцIрагу фильм ккаккан дурну махъ Хизри Шихсаидовлул, ва конкурс сакин дурминнахь ва ванил спонсортурахь барчаллагьгу увкуну, чIа увкунни цинявннанмагу гихунмайгу тIайлабацIу.
— Хъинну тIааьнни жулва жагьилтал буттал улклул тарихрал, культуралул, багьу-бизулул, аьдатирттал ва тIабиаьтрал хъирив багьлай, ми лахьлансса гъирарай бушиву, республикалун мюнпатрансса давуртту дуллан гъирарай бушиву. Жува пахру буванмур къачанни. Жулва буржри гьунар бусса жагьилтурал чIарав бацIлан, цивгу, ттул пикрилий, жулла республика хьхьичIуннай дачаврил локомотивну хьунтIисса, — увкунни Хизри Исяевичлул.
Хъирив ва конкурсраву ххув хьуминнан дуллунни бахшишру.
«Арси-групп» къатри бувай компаниялул генеральный директор Расул Аьбдуллаевлул ва конкурсрал Гран-при – видеокамера ва арцуйнусса бахшиш, дуллунни «Кунак» фильм ларсминнан. Ва ссаятусса дуссарив цIанил цилва буслай бур.
Язимур сценарийрахсса бахшиш ва «МТV-столица» медиахолдингращал уртакьшиврийсса зузаврил сертификат дуллунни «Лимма» компаниялун, «Возвращение» фильмрахлу.
Операторнал язисса даврихлусса бахшиш дуллунни Нариман Гъапуровлун, Дагъусттаннал ххуйшивурттая бусласисса «The Land of Mountains» фильмрахлу.
Язима режиссернан ккалли увунни Мухтар Махтибеков («Жуламур» тIисса фильм).
«Лучшая женская роль» номинациялуву бахшиш дуллунни Зарина Пашнинан («Кунак» фильм), «лучшая мужская роль» номинациялуву бахшишран лайкь хьунни Карим Темирханов (фильм «Жуламур»).
Дагъусттаннал миллатрал I кинопремиялул шадлугъ къуртал хьунни фейерверкрайну.
Шиккува ца-кIива махъ лакку мазрайсса цIанищалсса «Жуламур» фильмрая. Ванил сиптачи ур лакку оьрчI Шамил Гъазиев. Клипрал хъун дакъасса сюжетраву мафиягу, полицагу луглай бур ца ссигъасса кейсрах, му ахиргу бириллай бур цамур мафиялухьхьун. Ва клипрал продюсер ур республикалул жагьилтуран, рэп ххираминнан ххуйну кIулсса Тимур Умаров (Тимаро). Ва фильмрая ихтилат буллалийни, Тимур тIий ур: «Ванийн фильм учин захIматри, ва дур художествалул содержаниялул элементругу бусса видеоролик», — тIий.
Клиправух гьурттуну ур чIявучин кIулсса хъярчъчи Оьмар Аьлибуттаевгу. Ва клиправусса балай чивчуну бур цинявппагу цачIун хьуну, припевравугу бур лакку мазрайсса махъру: «Жуламур жула жиплуву». Балай чивчуну махъ клипралсса буллан бивкIун бур.
