Ларгсса нюжмардий, мартрал 27-нний Москавлив, «Каспиан» тIисса ресторандалуву Совет Союзрал Виричу, космонавт-рекордсмен, бусалардавун агьсса Муса Маннаровлул 75 шинал юбилей дунни лахъсса даражалий. Ва даврил сиптачитал ва сакиншинначитал бия Москавливсса Дагъусттаннал культуралул центр.

Мероприятие дачин дурсса артист Ислам Исябагъандовлул бувсунни космос ва космосрацIун дархIусса элму ахттар дуллай оьрму гьан бувсса жула дагъусттанчунал ­оьрмулул ххуллия. Ккаккан дунни космонавтнал оьрмулиясса видеороликгу.

Юбиляр барча уллай, ­«Дагестан» МЦК-лул президент, профессор, академик Арсен ХIусайновлул кIицI лавгунни, 1988 -1991 шиннардий МЦК-лул сипталийну «ЦУП-МИР» космосрал жамилул экипажралщалсса космосрайхчIин связьрайн буккаву ва Москавливсса Дагъусттаннал агьали 1989 шинал Муса Маннаровлущал хьунабакьаву цинявннан дакIний личIансса хьушиву ва чIявусса бусравсса хъамалгу бавтIун ­дунияллийх цIа ларгсса ватанлув лахъа-хъун уваву багьавайсса барчаллагьрал даву хъанахъишиву.

Космонавт барча унни, 2022-2025 шиннардий Хабаровский крайрал ХIукуматрал хъунаманал хъиривчуну зий ивкIсса, Дагъусттаннал лайкь хьусса строитель Керим Ссунгъуровлул, Аьрасатнал Конституционный Судрал судья ХIадис ХIажиевлул, медициналул ­элмурдал доктор, профессор Сяъдуллагь Абакаровлул, Аьрасатнал Жяматийсса Палаталул вакил Айгун МахIаммадовлул, физикалул-математикалул элмурдал доктор Вали Магатаевлул, жяматийсса ишккакку Шарип Сайдуевлул, Аьрасатнал ПрезидентнацIунсса Дагъусттаннал Постпредствалул вакил Зоя Хановал, «Лианозовский электромеханический заводрал» хъунама директор ­Сулайман ХIусайновлул.
Москавуллал хьхьичIунсса стоматологтурал,медициналул элмулул вакилтурал ­Аьшуев ­Жаруллагьлул, Къапланов ­Шамиллул, Ильдаров Ризваннул, Кутараев Маликлул цIанияту барча унни МЦК-лул вице-президент, профессор Астемир Шайхалиевлул.

Мероприятиялул сакиншинначитурал цIанияту барча унни МЦК –лул Президиумрал члентурал Абас Аьлишаевлул ва Даниял Шабановлул. Мукунма МЦК-лул ва Мариян Илиясовал цIанийсса «Дараччи» фондрал Москавливсса филиалданул вакилтурал ПатIимат Садикьовал, психологиялул элмурдал кандидат Гулизар Башанаевал, Шовлухъ Илиясовал ва Саибет Аьлиевал. Ва кIицI лавгсса идарарттал-ккураннал вакил, поэтесса Ххадижат ЦIаххаевал бувккунни цилва Муса ­Маннаровлун хас бувсса шеъригу.
Махъру лавхъцириннал кIицI лавгунни, Муса Маннаровлул космосравусса рекордру, ­элмийсса хьхьичIуннайшивуртту дунияллул тарихраву личIантIишиву. КIицI лаглай бия, цIурттачIан гьаз хьусса ушивруцIун, бюхттулсса даражалул пишакар унугу, тачIав цичIав тIалав къадайсса, пахру-ххара бакъасса, адаврай къуццу тIисса ушивугу, ванал юбилей республикалул хIукуматралгу лахъсса даражалий дуванссар тIисса умудрай бушиву.

Бюхттулсса арс лахъа-хъун уван бувкIун бия Дагъусттаннаясса делегациягу. Кьунниха лирчусса шинну Лакрал райондалул хъунаману дурсса, Муса ­Маннаровлущал дусшивугу дусса Юсуп МахIаммадов ва вара Лакрал райондалул уттисса хъунама Зураб Куччаев, Дагъус­ттаннал Халкьуннал ­Мажлисрал депутат Артур Исрапилов. ­Лакрал райндалул цIаниятусса Барчаллагьрал чагъар буллунни юбилярнахьхьун Зураб ­Куччаевлул. Шиккува кIицI лаганна, Аьрасатнал президентнал Адиминистрациялул бакIчинал хъиривма МахIаммадссалам МахIаммадовлул цIаниятусса Барчаллагьрал чагъар буллушиву юбилярнахьхьун политикалул элмурдал доктор, профессор МахIаммад Оьмаровлул, Аьрасатнал Жяматийсса палаталул цIаниясса Барчаллагьрал ­чагъар – Айгун МахIаммадовлулгу.

Артур Исрапиловлул кIицI лавгунни, Муса Маннаров космосравун левхсса чIун щалва Дагъусттаннал агьали цачIунмай бувсса ва ххари бувсса чIун диркIшиву, та чIумал куннасса цашиву ва агьалинал ххаришиву цанна къаккаркшиву. «Юбилейрду уттигу дуллантIиссару жува. Муса Маннаров лахъа-хъун уллалисса давурттугу чIярусса шиннардий уттигу дуллантIиссару. Амма Дагъусттаннал тарихраву цIакьну личIантIиссар ва космосравун гьаз хьусса мутта, агьалинал дакIру ххаришиврул ва пахрулул дуцIин дурсса тай ххарисса чIунну», – увкунни ванал.

Арсен ХIусайновлул кIицI лавгунни Муса Маннаров барча уван бувкIцириннаву бушиву «Мосгаз» Акционерный Обществалул гендиректор ХIасан ХIасанхIажиев, СССР-данул ва Аьрасатнал хьхьирил флотрал ветеран, капитан дальнего плавания Умар Абасов, цалчинмур ранграл капитан, профессор ХIусман-ХIажи Аьлиев, низам дуруччай органнал ветеран Абас Аьлишаев ва цаймигу захIматрал ветерантал, ялун нанисса никиран чувшиврул, яхI-къириятрал эбратруну хьусса инсантал бушиву. Укун эбрат ласунминнаву хьхьичI ххуттай душиву Муса Маннаровлулмур цIагу.

Культуралулмур программа диялну ярг-авадан дурна Дагъусттаннал халкьуннал артистътал Лариса ХIажиевал ва Рашид Багатаевлул балайрдал.
Ахирданий Муса Маннаровлул дакIнийхтунусса барчаллагь увкуна, цува лахъа-хъун уллалисса мероприятиялул сиптачитурахь ва му лавайсса даражалий тIайла дуккан биялсса захIмат бивхьуцириннахь, цалва чIарав бацIан, барча уван бавтцIириннахь.

Мяйжаннугу, вагу хьунни лакрал тарихраву личIантIисса кьини. Дагъусттаннал цалчинсса ва увагу усса космонавт, цувагу космонавт-рекордсмен Маннархъал Муса лайкьсса даражалий лахъа-хъун увсса кьини.

Ххибуван ливчIунни, «Дагестан» РГВК-лул ведущая Тамари Аьлиевагу ва юбилейрая Дагъусттаннал агьалинахь бусаншиврул гьуртту хьушиву юбилейрал мажлисрай, ванил Муса Маннаровлуща интервьюгу ларсшиву ва чIал къархьуну телевидениялий жула язисса арснал оьрмулиясса документал журалул цIусса киносуратгу ххал дувантIишиву.

ПатIимат Рамазанова