АлхIаткьини Дагъусттаннал МЧС-рал министрнал хъиривчу Эльдар Атаев даврил аьрххилий увкIунни Лакрал райондалийн.

Ванал каялувшиндаралусса совещаниялий гьуртту хьунни райондалул бакIчи Зураб Куччаев, ДР-лул Халкьуннал Мажлисрал депутат Марат Илиясов.
Ваний ххал бигьлай бия тIабиаьтрал апатIирттал биян бувсса зараллу бухлаган бансса, агьалинал мюхчаншиву дуруччинсса чаранну.

Райондалул ЧС-рал отделданул каялувчи Надир ХIасановлул, электросетирдал ва ххуллурдал идарарттал каялувчитурал бувсунни щархъаву хIасул хьусса тагьардания, тIабиаьтрал апатIрайну бивсса зараллу бухлаган баврил ххуллий дуллалисса давурттая.

«Агьаммур мурад – цинявппа анаварсса къуллугъру куннищал кув дахIаву дуну зузаву. Агьалинал оьрмулул шартIру къулайшиндарава къадуккансса мурадрай, къулагъасралу дикIан багьлай бур ххуллурдал тагьар ва ттукIрал дузалшинна», – увкунни Эльдар Атаевлул.

Совещаниялия махъ Элдар Атаев ва Марат Илиясов Зураб Куччаевлущал лавгунни тIабиаьтрал апатIрайну лахIунтту дагьсса ххуллурдал тагьар ххал дан. Вай бивунни Лахъирдал ва БахIикуллал шяраваллавун нанисса ххуллурдайн.

Зулайхат Тахакьаева