Мартрал 28-нний хьхьувайния кIюрххилнин бакъацIавай бивщусса мурчацIун дакъацIавай ларчIсса гъаралуннил республикалул шагьрурдан ва шяраваллан хъунисса зараллу биян бунни. Нехру дурккун, кIичIиртту, инсантурал къатри, хIаятру, социал ва коммерциялул объектру щиналу ливчIун, ххуллурду левкьун, муниципалитетирттал инфраструктура цилла ххуттава дурккунни.
Республикалул ххюва шагьрулий ва шанна райондалий ЧС-рал режимгума дия зузи дурну. Яла захIматмур тагьар МахIачкъалалив дия, чIярусса къатравун щин ххярххун, чIявусса машинартту неххардил лавсун. Чани, щин, гъилишиву, интернет дакъа лирчIунни шагьрулул цимирагу район, 400 азаруннийн биявайсса инсантал.
Синоптиктурал тIимунийн бувну, ва ххуллухьсса гъарал, 107 шинай цалий дарцIуну диркIсса рекорд личин дурну, цурда хьуну дур рекордрал заллу.
Тарнаирка ва Черкес-Озень неххардил щинал, ялтту ларгун, тагьар хъиннура оьлуккин дунни. Жиндрал хьусса щинал ххуллий цинна хьунадаркьумур (машинартту, бетонналул блокру, тталлу, инсантал) рахIму бакъа ларсун най дия.
«Махачкала-110», «Восточная», «Приморская» подстанцияртту щинахьхьун лавгун, вай марцI буваннин, кьакьан буваннин, ххювахъул гьантрайгума инсантал чани бакъа ливчIунни. Щин ттигу-шилагу дакъасса кIанттурдугу чIявур, та дулунтIиссарив кIулссагу акъар. Щин духьурчангума, хIачIан чуври, цичIав шюшингума къабучIисса даражалул дур.
ЦIусса Хушет поселокрай, Тарки станциялий, Хасаврай «Хасав-Юрт – Кади-Юрт» участокрай, муххал ххуллун зарал хьуну, поездру чIумуйнусса къазанай бия.
Республикалул 21 муниципалитетрал ххуллурдал 50-ннийн дирсса участокрай лавкьунни ххуллурду. МахIачкъалалия чIараввасса Щурагьунгума буккан бюхълай бакъая, ххяли, валтру дагьну, Щурагьиял лахъазан ва Талги шяравухсса ххуллурду лавкьуну. Мукунма чIараввасса Каспийск шагьрулийнсса ххуллу щинахьхьун лавгун, МахIачкъалалия Каспийскалийн биян мукьра-ххюра ссят хъанай дия.
Гъаралунния хъунмасса зарал бивунни Хасавюрт шагьрулунгу, райондалунгу, левкьунни муххал ххуллул ва автомобиллал ламурду. Хасавюртуллал райондалийсса мукьра шяравалу (Адильотар, Кадыротар, Тутлар ва ЦIусса Цилитьл) сайки щаллунна щинахьхьун ларгун, шиккусса инсантал эвакуациялий бизан бунни.
Дарбант шагьрулийгу ва кьини цачIун хьуну дия лагма-ялттусса зунттава, хъачI-бакIава нанисса нехру. Республикалул муниципалитетру интнил гъаралуннил биян бувсса зараллая махъ ттигу цайнма цивппа бучIан къачансса хIал хьунссар. Къачансса къатри (инсантал ялапар хъанахъисса ва коммерциялул) дур дакьин дуваннурагу къалирчIсса. Дакьин дуванминнунгу къачансса чIунгу, харж-хуржгу аьркин хьунссар. Гъарал ларчIун гьантри лавгун махъгу щин шагьрурдал кIичIирттава дуккан анавар дуклай дакъар. Щинащал дуркIсса ччюрклил ва гьагълил бувцIусса кIичIирттугу ччя-ччяни марцI къабукканссар.
ДакI ххари данмурдив анжагъ ца бур – жулва инсантал куннал чIарав кув бацIайсса бушиву ва ххуллухьсса гъаралуннилгу цал ххишалану тасттикь баву. Къатри бухханну къаливчIминнайн цачIанма оьвтIисса таксса инсантал ва гостиницарду, машинарттан зараллу хьуминнан уква кумаг буванну тIисса электриктал ва цаймигу пишакартал, зарал бивсса хъуслихлу багьайсса компенсация ласуншиврул юридий журалул кумаг буванну тIисса юристътал ва адвокатътал, укра щинну дачIлачIими ва цаймигу дакI цIуцIисса, чIарах бацIлацIисса инсантал вай гьантрай чIявуссава бур.
Дагъусттаннал ХIукуматрал председатель Аьбдулмуслим Аьбдулмуслимов, Сергей Меликовлул тапшурданийн бувну, гъарая зараллу бивсса Хасавюртуллал райондалийсса шяраваллавун ивунни.
Бадрижамал Аьлиева
