Мартрал 28-нний Дагъусттаннал бакIчи Сергей Меликовлул дунни чявхъа-гъараллал щинал биян бувсса зараллу бухлаган баврил оператив штабрал батIаву.
Муний гьуртту хьунни властьрал циняв органну, МЧС-рал вакилтал, шагьрурдал ва районнал бакIчитал. МЧС-рал каялувчитурал ва шагьрурдал бакIчитурал бувсунни дуллалисса давурттал хIакъираву.
ЦIанасса ппурттуву властьрал циняв органну ва анаварсса (экстренные) къуллугъру зий бур чярхнийсса низамрай, бухлаган буллай бур зараллу, дузал бувну бур зарал бивминнансса кумаг.
Дагъусттаннал МЧС-рал управлениялул хъунама Муслим Давришбековлул бувсунни цIанасса ппурттувусса тагьардания ва дуллалисса давурттая. Ванал бусаврийну, гужсса чявхъа-гъараллу лачIунтIишиврул хIакъираву МЧС-рал баян бувну бия РСЧС-рал управлениярттал органнайн, прогнозрая бувсун бия муниципалитетирттал сакиншиннардал бакIчитурахь, смс информация бувсун бия сайки 2 млн абонентътурахь.
Яла чIярусса гъараллу ларчIун дия МахIачкъалалив, Ахттав, Кьасумкантлив, Избербашлив, Гъумук. Ми кIанттурдайсса РСЧС-ру ва управлениялул органну бучIан бувну бивкIссар «лахъсса хIадуршиндарал» низамрайн.
ТIабиаьтрал оьдикIаврийну чани левщуну бия МахIачкъалалив ва 22 муниципал райондалий, 300 лабизаву дуркIун дия МахIачкъалаллал ялапарлувтал къатраву чани бакъа ливчIун бушиврул хIакъираву.
МахIачкъалалив баян бувну бия ляличIисса тагьарданул низам, шагьрулий щинахьхьун лавгун бия сайки 20 къатта, цаппара кIанттурдай щин гьаз хьуну дия 1,5 метралий. МахIачкъалаллал мэр Жамбулат Салавовлул бусаврийну, мэриялул сайки 150 кIану хIадур бувну бия зарал бивми чIумуйсса паракьат баншиврул.
Сергей Меликовлул тапшур бунни энергетикалул ва газоснабжениялул объектру бусса кIанттурду буруччаву гужлан буван.
Вай гьантрай «Дагэнерго» зий бур гужлансса низамрай – зий бур 80 бригада.
Дагъусттаннай ххуллурдал тагьардания ва транспортрал давурттая бувсунни вице-премьер Ризван ГъазимахIаммадовлул
Республикалул Роспотребнадзорданул бусаврийну, къатравун нанисса щин оьлуркъусса дунутIий, щара лархъсса ягу ттучанная ларсъсса шушравасса щин ишла дуллан аьркинну дур.
Сергей Меликовлул тапшулугърайну, зараллу бивсса циняв муниципалитетирттай сакин бувну бур оператив штабру, миннул кумаграйну ччаннай дацIан дуллай бур лирсса инфраструктура ва кумаг буллй бур зараллу бивминнан.
