Инсаннан цIусса оьрму байбишинсса гъира яла хъинну сукку шайсса чIун инт духьунссар. Амма, дяркъусса ва шанюркьусса кIинтнивагу бувккун, вагу дуванна, тагу дуванна тIисса пикрирдай бунува, интгу къуртал хьуну, гъигу дязаннавун дирну лякъай. Укун къахьуншиврул, яланин, гьунттийнин къаритлай, шиккува, цIанава байбишинну жулва оьрму хъин чулийнмай баххана буллай. ЧIярумур чIумал оьрмулувусса дахханашивуртту цирдагу, хъунисса иширттая дакъача, мюрш-кьюршлияр дайдишайсса.

* * *
ЧIумуй уттубивхьуну, цIан-чаннаву бивзун, кIюрх хьунадакьин буккира кьатIушав – хьхьирил зуманицIун ягу зунттул хъачIрайн, щябикIира паракьатний, ссав чан-чанну тIий чанна хъанахъисса куццуй тамашагу буллай. Кьини телевизорданувухсса къаххуйсса хавардаянияр, дуниял зущалла архIал чантIа тIисса чаннасса пикрилия дайдирхьуну хъинссар. Гьай, балики, цал-кIил лавгун, вания ­оьрмулухунсса ва мюнпатсса ­аьдат хьун.

* * *
Каруннища телефонгу дуркьун, щябикIира багъраву, тIутIайх бивчусса мурхьирдал лув, вичIи дишира лелуххантрал чIурдах. Хъунма хIаллай лахъи къалагайсса мурхьру тIутIайх бивчусса лахIзалия неъмат ласира.

* * *
Шагьрулул кьатIув, тIабиаьтрайн буккансса мажал хьуннин къаялугьлай, хъунмасса хIаллай ­бюхълай ­бакъахьурчагума, дачIи ссятрайсса бунугу, буккира чIаравсса паркравун, скверданийн пикник дуван, лув дутансса пледгу, чяйлул ягу кофелул термосгу, ахъулссагу ларсун.

* * *
Кьабивтун машинагу, ягу маршруткалийсса, автобусрайсса аьрххигу, зува мудан машиналий лагайнийн (ттучанналийн, даврийн, спортзалданувун) насира бахьтта, укунманий зува чIарах ссур хьуну лагайсса къатрах, ттучаннах, уртту-тIутIах паракьатну бугу-буруглай. Тамаша бувара мурхьирдай, щяв ликказан дурсса бургъил тIинттай.

* * *
Цал-цал язи дулугьира аварашиву дакъасса кIюрх. ЧунчIав анавар къабувккун, паракьатну дувара кIюрххилсса, тIивтIуну чIавахьулу, буххан бувара къатлувун интнил дюхлулсса гьава.

* * *
Гьан дувара кьини телевизор ва соцсети дакъа ягу вай шайссаксса чанну ишла дурну.

* * *
Шяравалу, шагьру чIалачIинийн лавхъун, лахъния тамаша бувара, хьхьичI бацIан бувара ва ппурттуву гилу цал архIал цими журасса ва циксса оьрмурду щуруй бурив. Лахъния хъунисса буруккинттугу мюрщину чIалантIиссар.

* * *
Къатраву ттигу пачурдиясса гъилишиву дусса, кьатIувсса гьавагу щаллуну гъили хьун бувасса чIумал, тIивтIусса чIавахьулттичIа бувккусса луттирал, кказитрал, журналданул хъунмасса хIаллай личIансса асарду кьабитантIиссар.

* * *
Зула шагьрулучIан, шяравалличIан гъансса кIану (шагьру, шяравалу, бяр, вацIа, зунтту) язи бувгьуну, миккунсса чIиви экскурсия бувара, бити дачIи кьинисса, ца кьинисса ягу ца хьхьу-кьинисса бикIан. Арх бакъасса манзилданийсса, хъун дакъасса чIумуйнусса дахханашиврулгума кумаг бувантIиссар бакI аьчух буккан буван, «перезагрузка» дуван. НахIакь дан бакъар хасъсса пишакартурал маслихIат буллалисса даврийн ва махъунмай гайва гай кIичIирттавух къазанан, мудан къалагайнийх занан.

* * *
Интнил гъилисса гъарая най буна ххютлилун малабикIларди, битира гъаралуннил кIунтIру лажиндаравун, янналийн багьан. Гъарая ливхъун къанай, хъартсса аьрщарая нанисса гьаварая неъмат ласира. Яла, бувкIун шаппай, яннагу даххана дурну, увкусса кIирисса чяйлул ххувлул дакI ва чурх хъиннува гъили бувантIиссар.

* * *
ТIивтIуну чIавахьулттугу, лавхъун зунма ххирасса музыкагу, лакьира шардалу, мурахас дувара чIамурду ва дакIру кIинттул салкьи хьусса аьркин дакъамунища, кIушивруща, буххаврища.

Гихунмайгу буссар
ХIадур бувссар
Бадрижамал Аьлиевал