Мунил лагрулий МахIачкъалаллал цIусса никирал оьрчIал библиотекалуву хьунни Дагъусттаннал Росгвардиялул управлениялул вневедомственный къаралданул зузала, полициялул майор Эрзиман Эмирбаговлул шагьрулул дуклаки оьрчIащалсса хьунабакьаву. ХIаписарнал бувсунни оьрчIахь ведомствалул тарихрая ва зузалтрал бигардая.
Мукунма ванал бувсунни хасъсса аьралий операциялий Ватандалул мурадру буручлачисса росгвардиялул зузалтрая, миннал чувшиврия.
Хьунабакьаврий ххал бивгьунни терроризмалул масъалагу. Майорнал бувсунни терроризмалуцIун ва экстремизмалуцIун дархIусса ттизаманнул нигьачIаврия, бувцунни му исват буллалисса мисаллу. Ванал маслихIат бунни оьрчIан мукунсса тагьарданий цукун занакьулу бикIанссарив ва кумагран чун оьвчинссарив.
Дуклаки оьрчIал барчаллагь увкунни хъамаличунахь мюнпатсса ихтилатрахлу ва маслихIатирттахлу.
Лажин хIадур дурссар Андриана Аьбдуллаевал
