Гьашинусса шин жула «Илчи» кказитрал юбилейрал шинни.1991-ку шинал январь зурул 8-нний бувкссар жул цалчинсса номер.
Муния шиннай 35 шин хьунни. Ва чIумул дянив жул чIявусса дустал хьунни. Кказитрал подписчиктал, буккулт кувний чIяву, кувний чан хъанарчагу, буссар кказит буклан бивкIния шинмай, 1- мур номердания тIайла хьуну, 35-гу шинал лажиндарай, кказит чичлачисса ва ца хха къакьабивтун ккалаккисса патриотътал.
Утти, соцсетирдал чагъарданий буккайми кказит-журналлу бас бантIиссар, цаппара шиннардива миллатирттал мазурдийсса кказит-журналлу буккайми къабикIантIиссар тIисса къатIааьнсса прогнозру бусласими чан бакъасса чIумал, укунсса буккултрайн дур жул вихшалагу, минная дур жул ххаришивугу. Мукунсса, кказитрал вихшаласса, дакI тIайласса дус ва хIакьсса патриот бур ЦIуссачIурттащиял шяравасса ТIагьирдул ва Нинул душ Халисат Аьмаева. Шиккува кIицI лаган, кказитрал 20 шинал юбилей дуллалисса чIумал, ванин Дагъусттаннал Печатьрал ва массовый коммуникациялул комитетрал чулуха ХIурматрал грамотагу дуллуссия. ХIакьинугу Халисат му пахрулий ядуллай бур. Хъунна дурну, хахливу дирхьусса «Илчи» кказитрал коллективрал суратгу чIарав лархъун.
Бувну бур Халисат ЦIуссачIурттащиял шяраву. Тийх мяйва классгу бувккуну, школа ЦIуссалакрал шяраву къуртал бувну бур. Ва дуккаврил гьунар бусса, школалул жяматийсса давурттавух чялишну гьуртту шайсса душ бивкIун бур. ХIакьинусса кьинигу барчаллагьрай дакIнин бутлай бур цила учительтал.
Буттан ТIагьирдун ва учительница хьуну ччай, Халисат бувкIун бур Буйнакскаллал 1-мур педагогикалул училищалувун документру булун. Нюжмар ххишалагу хьуну дур училищалул директор Балкалая Елизавета Савишнал ми кьамул къабуллай. Ванил аттестатгу, кIулшивурттал даражагу чIалай, ина шивун мабуххара, институтравун, ччимур факультетрайн була документру, на кумаг банна тIий.
Амма Халисат мютIи бан къавхьуну бур цила дусшиву дусса душнищал архIал ччай. Педучилище къуртал буллалисса ­шинал щар хьуну, махъра-махъсса шинал кьаритан багьну бур ­дуккаву. Щар хьуну махъ бувххун бур Политехнический техникумрал бухгалтертурал факультетрайн, экономикалул отделениялийн. Му ппурттуву цуппагу Автобусный паркраву экономистну зий бивкIун бур. АрхIала практикагу дуну, дуккин бигьану бивкIун бур. Техникум ванил лавайсса кьиматирттай къуртал бувну бур.
Кьунияхъайсса шинну дурну дур Халисатлул Автобусный паркраву зий. Цила даву ххуйну кIулсса, жаваблувшиву дусса, хасиятралгу бавкьусса Халисатлул хIурмат хъунмасса бивкIун бур хъуниминначIагу, даврил уртакьтурачIагу.
Ттула коллега Тамара ХIажиевайхчIин кIул хьуну, Халисатлущал ттул ччянияцIара дусшиву дуссар. Ванил цукунсса аякьа диркIссарив дугьара хьуну, шанин дагьсса, оьрмулул 95 шинавусса ниттих, буслай бусан къахьунссар. Ччимур ниттил цила душ хьурдай учинссия. НахIу-хIалимну, цаннан ца бувчIлай бувтунни ванил цила ласнащал Жабирдущалсса ­оьрмугу. МукьцIаллий шанна шин дурну дур вайннал цачIу оьрму бутлай.
– Алжан булайсса бухьурча, ганан булунссар Аллагьнал. АцIра шин дурссар ниттил ттучIа, цалагу къаччишиву, рязи акъашиву къаккаркссар ласнал чулуха, – тIий бур Халисат. Жабир, аьпа биву, мяйжаннугу дакI хъинсса, аьчухсса, хъамал ххирасса инсан ия. Жу хъамалу бучIайхтугу, Халисатлуйн яржа бакъа, чялиш увккун жул хIурмат буллан икIайва.
Утти на зухь бусанна ХалисатлуцIун бавхIусса хIаз бизансса ва махIаттал бансса ца ишираягу. Халисатлул лакку мазрай гъалгъа тIутIи бувссар цила тутукъуш (попугай). Ва хавар бусласиний чIявуми вих къахъанан бикIай, амма му тIайласса затри. Нава бара хьуссара.
Халисатлул чIаххувщарнил чIивисса арснан ччай буну, лавсун бур тутукъуш. Ганангу га ччяни бизар хьуну, чIаххуврал къатравугу ремонт най дуну, тявх-шявхлил чIурдая нигьа буслай бурча тIий, Халисатлухь тавакъю бувну бур чIумуйсса цичIанма буца куну. Барз хьуннин Халисатлул му гъалгъатIи бувну бур, цуппагу лакку мазрай. Аьзиз Дагъусттан, Лакку билаят. Вай бия тутукъушлин яла ххирами ва чIявуну тикрал байми махъру. Ца ппурттуву ХалисатлучIан хъамалу бувкIун бур ванил гъанчув – жагьилсса оьрчIру. Тутукъушлия бавсса га цаннал увкуну бур: «Халисат ниттилссий, цукунчIав къавихра, му гъалгъа тIун бикIайссар тIий, лакку мазрай гъалгъа тIун бикIайссар тIий хъиннува къавихра». Ца лахIзалува тутукъуш цила зумуну лакку махъру тIий булувкьуну бур. Каругу гьаз дурну, ухра, ухра, Халисат ­ниттилссий, багъишла, тIун ивкIун ур махIаттал хьусса жагьил.
– Хъинну аьдат хьуна га ттуцIун. Жул квартира шамилчинмур зивулий бур. Ганин на подъездравун буххайхтува кIул шайвав нанишиву. Вев-гьарай тIий, аьлагъужа гьаз байва. Лас икIайва, ина нанишиву кIул шай ванил ххаришиврийну, щил бунугу буслай, вих къахьунссияв тIий.
Нуз тIитIайхту, щябивкIун хъачIрайгу, цила къеппух ппай-ппай тIун бикIайва. Гьарица увкумур бувчIайва, ба кумур байва, мютIисса бия. Шамийла квартиралува хIаятравун левхссар. Утти бакъа шавай бур тIий нигьачIи буссияв. – ­Ромка, Ромка, шаппай нану тIий, оьвтIун бивкIра. Га цIана левххун бувкIунни, – буслай бур Халисат.
КIира шинал хьхьичI къашай хьуну бивкIуссар Халисатлул Ромка. Буссаксса хIаллай га лакку мазрай гъалгъа тIий буссия.
ХIакьинусса кьинигу Халисат цинявппагу лакку мазрай буккайсса кказит-журналлал подписчикри, «Илчилущалмур» дусшивугу дуцан къариртссар. Ванил столданий мудан буссар «Илчи» кказитрал цIуну бувксса номер.
– Халисат, мяйжаннугу, гужсса патриотри. Чув-бунугу, лак хьхьичIунмайну, минная ххуйсса чивчуну ккаккарча, дакIнийхтуну ххаригу хьуну, га цIана цинявнначIан гьан дуллантIиссар ккаккан. Шяраваллил гьарица бивкIу-буккулучIа, хъатIи-хъиншивурттай буссар. Гьарнан шайсса ка-кумаг бан чялиш буккайссар. Аьчухсса, хIал бавкьусса буссар. Ца ппурттуву, ковидрал чIумал ттун пикри багьуна Буттал кIанттул цIанийсса Хъунмасса дяъвилий гьуртту хьусса чIурттащиян хас бувсса лу итабакьин. Жул шярава Хъун дяъвилий гьуртту хьуну ур 151 инсан. Вайнная гьарицанная, гъан-маччаная гьарта-гьарзасса информация батIин багьлай бия. Му бигьасса зат бакъая. Ва давриву ттун урчIа кану хьунни Халисат. Нальчикрайн, Ашхабадрайн, Москавлийн бияннин оьвтIун, цIухху-бусу буллан багьлай бия. Халисатлул кумаграцIух ва даву анавар дуккан дан бювхъунни. Иншаллагь, июльданий, ЧIурттащиял шяраваллил кьинилийнин итабакьинсса пикри буссар, – буслай бур Халисатлул маччадуш Гульшан Хасаева.
Халисат, цIуллушиву дулуннав вихьхьун. Ина кунмасса вихшаласса дустал чIяву хьуннав «Илчилул».
Андриана Аьбдуллаева