Тталаткьини, мартрал 10-нний, «Дагестан» РИА-лул залдануву хьунни «Зарница 2.0» тIисса щалагу Аьрасатнал военно-патриотическая акциялул хIакъиравусса пресс-конференция.
Конференциялул спикертал бия Дагъусттаннал жагьилтурал иширттал министр Камил Саидов, «Движение первых» тIисса Аьрасатнал оьрчIал ва жагьилтурал суккушиннарал региондалул отделениялул председательнал хъиривчу Рашид Аьбдуллаев. Вайннал бувсунни акциялул мурадрая, Дагъусттаннал командарттая ва миннал хIадуршиннарал даражалия. Оьвчаву дунни оьрчIайн ва жагьилтурайн ТIуркIулуву гьуртту хьун.
Региондалийсса «Зарница 2.0» тIуркIулул сакиншинначитал бур «Движение первых» ва «Юнармия» тIисса щалагу Аьра­сатнал оьрчIал ва жагьилтурал суккушиннардал региондалул отделенияртту ва Дагъусттаннал Жагьилтурал иширттал министерство.
ТIуркIулуву гьуртту хьунтIи­ссар школардай, техникумирттаву, колледжирттаву ва училищардаву дуклакисса 10 оьрчIая сакин хьусса кьюкьри. Гьарица кьюкьлуву чара бакъа 2 душ бикIан аьркинну бур. Оьрмулул шинну хIисавравун ларсун, ТIуркIулуву гьуртту хъанахъими бавчIуну буссар мукьва бутIуйх: 7-10 , 11-13, 14-17 ва 18-20 шиннавусса.ТIуркIу наниссар цаппара ятIапирттай:
отборочный – 23-мур февральдания 31-мур мартрайн бияннин;
муниципал ятIап – 1-мур апрельдания 16-мур апрельданийн бияннин;
зоналул ятIап – 17-мур апрельдания 30-мур апрельданийн бияннин;
региондалулсса – 1-мур майрая 10-мур июньдалийн бияннин;
округралсса (полуфинал) – июль-август зурдардий;
финал – сентябрьданий.
ТIуркIулувун бухлахиссар кьюкьрал дянивсса бяст-ччал ва оьрчIал хIал ххал бансса хасъсса заданияртту.
Отборочный ятIапрай мюрщими оьрчIан (7-9 шин) бантIий бур спортрал тIуркIурду, викторинарду,строевой хIадуршиннарал даража ва цалчинсса кумаг бан кIулшиву ххал буллалисса бяст-ччал. Дянивсса (10-12 шин) ва хъуними оьрчIан (13-17 шин) дикIантIий дур условно-военный специальностьрал ( шивун бухлай бур командиртал, медиктал, связистътал, штурмовиктал, беспилотный летательный аппаратирттал оператортал, инженер-сапертал ва военкортал) зачетру. Отборочный турданий гьуртту къавхьуминнаща гайми турдайн буккан къахьун тIий бур.
Камил Саэдовлул бувсунни ларгсса шинал Дагъусттаннал командарттал региондалул ва округрал ятIапирттай ххуйсса ккаккияртту чIалачIи дуршиву. Хаснура кIицI ларгунни Къизлардал райондалиясса командартту.
Ванал бувсунни ТIуркIулуву гьуртту хъанахъисса оьрчIру-душру ялу-ялун чIяву хъанай бушиву. Зоналул ва региондалул ятIапирттай ххув хьуми щалагу Аьрасатнал бяст-ччаллаву гьуртту хьун гьантIишиву. Ххув хьуминнан ва хьхьичIунсса кIанттурду бувгьуминнан ххуйсса бахшишру дикIантIишиву.
Андриана Аьбдуллаева