«КIива гьунар – ца Ватан». Укунсса цIанилу Москавливсса Дагъусттаннал культуралул центрдануву хьунни Ватан дуруччул кьинилун хас дурсса хъуннасса мероприятие, СВО-лий гьуртту хьуминнайн ва миннал кулпатирттайн, гъанцириннайнгу оьвкуну. Дагъусттанная бувкIсса хъамаллуравух бия Аьрасатнал Вирттаврал ниттихъул: НурмахIаммад ХIажимахIаммадовлул нину Сапижат Мазаева ва МахIаммад Исбакиевлул нину Марина Исбакиева.

КIицI лавгсса центрданул президент, профессор Арсен ХIусайновлул бавтIцири барча буллай, бувсунни Ватан дуруччул байрандалул кьимат мудангу лахъну бивкIшиву ва бикIантIишиву, бюхттулсса ппухълуннал цIа-кьинигу, Ватандалул мурадругу буручлай СВО-лий язисса чиваркI талай бушиву. Вава мяъна-мурадрайсса, СВО-лул вир­ттаврахь, миннал нитти-буттахь, ичIувацириннахь барчаллагь тIисса ихтилат бунни цалчинмур ранграл капитан, профессор ХIусман-ХIажи Аьлиевлулгу.
Аьралий иширттал ветерантурал, СВО-лул гьурттучитурал ихтилатругу бия Ватандалул бакIрачIан кьини дурксса ппурттуву кьянкьану бацIансса чарабакъашиву душиврия, ялун нанисса никгу Ватандалух ччаву дуну тарбия дуллан аьркиншиврия.
Вирттаврал ниттихъалгу кIицI лавгуна, «Дагъусттан» МЦК-лул мудангу хъуннасса къулагъас душиву СВО-лул талаталтрах ва миннал кулпатир­ттах, лахъсса даражалий дувайшиву миннан хас дурсса мероприятиярттугу.
«Дагъусттаннал диаспоралул ттул щавулий ка дишин шаймур мудангу бувай, чIарав бацIай, на уттинингу гьуртту хьура зу дуллалисса мероприятиярттай. Асар шай нава аякьалийн лавсъсса хIурматгу, ттула арснал аьпалул хIурматгу. Жул гьанумур мурадвагу жулва арсру хъама къабитавур, уттигу талайминнал чIарав бацIавур. Жулла Ватан цар, жулва мурадругу аьмссар, на зуйн цинявннайн барчаллагьрай бура хъиншиврул ххуллий ва вирттаврал аьпа буруччаврил ххуллий зу дуллалисса давурттахлу», – увкунни Марина Исбакиевал.
Хъуннасса концертгу дия программалуву. Дагъусттаннал халкьуннал артистътал Рашид Багатаев, Рукьият ХIамзатова, Зульфия Илиясова бувкIун бия Дагъусттанная ва мероприятие хъун дуван. Балайрду увкуна машгьурсса балайчи Селим Алахяровлулгу. Патриот темалул назмурду дурккуна Саэд Батдаловлул, София Бетсбебил, Лев Дулевлул ва цаймигу дуклаки оьрчIал.
Ккаккан дурна Ккавкказу­ллал миллатирттал лаххияртту.
«Рассвет» ансамбльданул дурна халкьуннал къавтIавуртту. Мероприятие дачин дурнугу ия театрданул ва кинорал актер Ислам ИсабахIандов.
Шиккува кIицI лаганна, «Дагъусттан» МЦК-лул ва Мариян Илиясовал цIанийсса «Дараччи» фондрал Москавливсса филиалданул вакилтал мудангу аякьа дуллай бушиву СВО-лий щавурду дирсса аьралийтурахагу, жанну дуллусса шагьидтурал кулпатирттаха ва оьрчIахагу. Ккаккан дурна ми кумаграл давурттаягу, фронтрансса кумаграягу бусласисса видеороликгу.

Ва мероприятиялия цила Телеграм-каналданий укун чичлай бур Сапижат Мазаева: «Хъиншиврул, гъилишиврул хIахI бусса мероприятие дия, цал ттигу исватну чIалачIи буллай бия, цуксса жулва зунттая архну бунугу, хIакьсса патриотътурал дакIурдиву Дагъусттан цIакьну бушиву. Циняв бавтIцири гъан буллайгу бия, бавхIунугу бия ца ччаврил – жула билаятрахсса, Аьрасатнахсса. КIива гьунар – ца Ватан. Вай так махъру бакъар, вайннуву жулва яхIлил, цашиврул лишан дуссар. Ва калималул Буттал кIанттул цIанийсса Хъунмасса дяъвилул ппурттуву кунма, Афганистта­ннайсса иширттал чIумал кунма, уттигу ярагъ кIунттил бувгьуну талатисса вирттаврал цивппа бюхттулсса ппухълуннал наслу бушиву ккаккан буллалиссар. ЛичIинува барчаллагь учин ччай бура Центрданул президент Арсен ХIусайновлухь. Москавливгу буттал аьрщарал гъилишивугу, миллатрал культуралул, аьдатирттал аьзизшиву асар хьун­сса куццуйсса мероприятияртту дувай ванал каялувшиврийну. Ванащал махъ ца бувну къуццу тIисса, лагма лавгсса патриотътурал дуллацири давурттугу мура ххуллийсса дур, барча­ллагь цинявннан зул захIматрахлу ва хIарачатрахлу.
Мероприятиялул жул дакIру мяйжаннугу жура-журасса асардал дуцIин дунни. СахIналийн бувккунни Дагъусттаннал машгьурсса артистътал. Програ­ммалул гьарцагу номер Ватандалухсса ччаврил вибувцIусса бия. Гьай-гьай, бусалардавун багьсса «Кьурукьирттаясса» балайлул жул дакIру личIинура хъюлчай учин дунни, видеолий кка­ккан буллалисса, кIяла кьурукьирттайн кIура бавсса шагьидтал ссавруннайн гьаз хъанахъи­сса лахIзардах иттав макь дакъа бурган хъанай бакъая. Хъи­нну асар хьунсса видео дия, барчаллагь укун къюкIливун ду­ххансса памятьрахлу. Цамургу хъинну асар хьунсса иш хьунни, ттучIан гъан хьуну жулва аьралийтал, яхIлувсса, къирият ду­сса чиваркI барчаллагь тIий бия НурмахIаммадлул гьунарданухлу. Ттухь чIявуну аьралийтал цIухлан бикIай: «Мукун­сса арснацIа хьусса ина регионнайх буклансса гуж ча ласара», – тIий. НурмахIаммадлун ччан бикIайва, илданун кка­ккан бан Дагъусттан цукун ххуй­сса билаят буссарив. Жулва халкь цукун чувшиву дусса, нигь къакIулсса, хъамал ххирасса, дакIру тIиртIусса буссарив.

СВО-лий цалва хиял бартбивгьунни мунал, чувшиврух чивчусса гьунарданийну бувсунни илданухь Дагъустта­нная. На мудангу аьрая бувкIсса чиваркIуннахь учара: «Бюхъай зун хъинну захIматну бикIан, ка дакъа, ччан бакъа ливчIун…Так кIулну бикIи, зува жун хъинну аьркиншиву. На кунмасса ниттихъан. Зуву гьарцаннаву жулва арсру чIалай бунутIий. ЯхI бу­ллан багьантIиссар зун, вирттаврал аьпагу хIурматрай ябуллай. Жулва гуж – цашиврувур. Так ца хьуну, куннал кув бувгьунур жущава жулла республикалул, жулва билаятрал гужгу, цIакьгу буруччин хьунтIисса!».

ПатIимат Рамазанова