ХIажибуттал арс ХуцIаев Надиршагь
Ттигъанну аьпалул хьунни КIундиннал шяравасса ххаллилсса инсан, хIакьсса зунттал чув, бусалардавун багьсса совет заманалул интеллигенциялува ливчIсса нажагьссаннавасса ца, Дагъусттан Республикалул лайкь хьусса учитель, лавайсса категориялул учитель, захIматрал ветеран ХуцIаев Надиршагь ХIажибуттал арс.
Увну ур Надиршагь декабрьданул 16-нний 1939-ку шинал КIундиннал шяраву. Буттал шяраву мяйра шинал школагу къуртал бувну, увххун ур Щурагьиял педагогический училищалувун. Вагу къуртал бувну, зана хьуну буттал шяравун, жагьилсса учитель зун ивкIун ур школалий. Махъ бувккуну бур Дагъусттаннал паччахIлугърал педагогический институтгу. Школалия Надиршагь увцуну ур Гъумукун райком партиялул инструкторну. Шикку зузиссаксса хIаллай райондалунгу, цала буттал шяраваллингу мюнпатсса къачансса давуртту дурну дур. Махъ Надиршагь ивтун ур «Дагъусттан» колхозрал парторгну. Райцентрну хъанахъисса Гъумучиял шяраваллия махъ райондалий инсантурал ккал хIисавну кIилчинмур кIанайсса КIундиннал шяраву хъуннасса парторганизация диркIссар. Шяраву зий унугу, райондалия Надиршагьлуйн оьвчайсса бивкIссар республикалул хъун шагьрулийн, личIи-личIисса министерстварттайн гьан буваннин документру ххал буван, вайннул ялтту уккан. Хъинну за кIулсса, грамотныйсса, сакиншинначинал гьунаргу ххину ххисса Надиршагьлул, чув зурчангу, цалла даву багьайкун дувайсса диркIссар, шяравугу, райондалийгу ва мудангу тIалавну ивкIссар.
ХьхьичI Свердловлул цIанийсса, махъату шанна шяравалу (КIундими, ЧIари, Шахьуйми) цачIун дурну хьусса КIундиннал хъуннасса «Дагъусттан» колхозрал председательну зийгу чIярусса шинну дурссар Надиршагьлул. Вай шиннардийгу хъунмасса хIарачат бувссар колхозран аьркинмур, техника тIий, цамур тIий, щаллу дуллай. Махъ зий ивкIссар шяраваллил администрациялул бакIчинугу.
Надиршагь махъсса шиннардий зана ивкIссар бакIрайра цалла язи дургьуну ивкIсса учительнал даврийн. Пенсиялийн укканнин зий ивкIссар школалий оьрус мазрал ва литературалул дарсру дихьлай. Ва ивкIссар хIакьсса учитель, ванал ялунцIагу дикIайссия «Учитель» тIисса.
Бувсса захIматрахлу Надиршагь лайкь хьуссар «Дагъусттан Республикалул лайкь хьусса учитель», «ЗахIматрал ветеран» цIардан ва «За трудовое отличие» медальданун.
Надиршагь икIайссия тIайлашиву ххирасса, инсаннан кумаг буван анавар уккайсса. МаслихIат аьркинсса, цалийн бучIан къахъанахъисса чIумал ваначIан бучIайссия. Усттарну, цIу буну махъ бусан кIулсса Надиршагь акъа шяраву га чIумал царагу батIаву-буккаву къашайссия. Гьарца хъатIий тямаданугу итайссия.
Ванан кулпатнугу нясив бувссар цала чIарав гьарцагу чулуха бавкьуну чIалачIисса ПатIимат тIисса душ. Вайннал къушлий тачIавгу чан къашайссия бухху-букку. ПатIиматлул, ваца цилва гъансса инсантал кунма, ненттабакI тIивтIуну хьунабакьайссия ласнал чIяву хъамал.
Надиршагьлул ва ПатIиматлул дянив хьуссар мукьва оьрчI, вай, ххаллилсса тарбиягу дуллуну, дуккингу бувну, цалва-цалва оьрмулул ххуллийн бивчуссар. ХIакьину вай бур шяраваллил агьалиналгу, кIулминналгу дянив бусравну, лайкьну оьрму бутлатисса инсантал.
Надиршагь аьпалул шаврил кьурчIишивугу кIидачIлай, жижара буллай буру кулпатрахь ПатIиматлухь, уссихь Якьювлухь, арсурваврахь МахIаммадлухь, МахIаммадаьлихь, душварахь ПатIиматлухь ва Раисатлухь, куявтурахь Геннадийхь ва Шамиллухь, махъсса цинявппагу гъан-маччаминнахь. Надиршагьлул барачат махъ ливчIун лякъиннав, махъминнал оьрмурдугу лахъи баннав.
КIундиннал жямат
МухIадлул арс Ванатиев КьурамахIаммад
Оьрмулул 87 шинаву аьпалухьхьун лавгунни ххаллилсса, яхI-намусрал увччусса чув, дакI-аьмал авадансса инсан, Хьурттал шяравасса Ванатиев КьурамахIаммад. КьурамахIаммад увну ур Хьурив 1938-кусса шинал. Цал буттал шяраву, яла Гъумук арулва класс къуртал бувну махъ, автошколагу бувккуну, КьурамахIаммад зун айивхьуссар Лакрал райондалул азарханалий анаварсса кумаграл шоферну. Ва лакъавгсса лакрал царагу шяравалу дакъассия. 1959-ку шинал армиялийн лавгун, къуллугъ буллай ивкIссар Германнаву, тикку автополкраву шоферну зий ивкIссар. Зузиссаксса хIаллай ванал хIалал дурссар, цала даву кIулну тIий, «Значок боевой и политической подготовки» ваная хьуссар 1-мур классрал шофер.
Армиялия зана хьуну махъ КьурамахIаммад, кулпатгу бувну, зий ивкIссар чIярусса шиннардий колхозрал-совхозрал давурттай шоферну. Кулпат Магьижамаллущал вайннал хъуни бувссар лайкьсса кIия арс ва кIива душ.
КьурамахIаммад дунияллия лагаврил кьурчIишивугу кIидачIлай, жижара буллай буру ванал кулпат Магьижамаллухь, арснахь Асланнухь, душваврахь Суржанатлухь, ПатIиматлухь, ссил душнихь Рамеллахь, оьрчIал оьрчIарахь ва махъсса цинявппагу мачча-гъанминнахь, агьлу-авладрахь. Аллагьнал цан алжан нясив баннав, рухI хъинний дишиннав. Махъминнал оьрмурду лахъи баннав.
Хьурттал жяматрал цIания Шамил Кьурбанов
