Ватан дуруччул байрандалул гьантрай дакIнин утан ччай бур фронтовик, захIматкаш, цIанихсса спортсмен, Хъусращиял шяравасса Щамхал Раджабов.
Хъусращиял Щамхаллуя чIявуссаннан къабавну, къакIулну бакъахьунссар. Вай гьантрай ттун хьунаавкьунни Щамхаллул арс База Раджабов. Ттула макьалалувугу бусан ччай ура арснан цала буттая дакIний ливчIмур ва Щамхаллуя ттунма бавмур.

Ражавлул арс Щамхал увну ур 1924 шинал Хъусращиял шяраву. Буттал шяраву школагу къуртал бувну, ацIния шанна, мукьра шинавусса чIава жагьил Азирбижаннаву къалайчинал, чагуртнал пиша лахьлай, зий ивкIун ур. 1941-1942 шиннардий Щамхал гьуртту хьуну ур захIматрал фронтрай. Душманная ватан дуруччинсса дайгьузанну дуллай, къанавртту дуклай ивкIун ур Къаякантлив ва Ленинкантлив. 1943 шинал, цала оьрмугу кIира шинал хъунма бувну, буттахлу аьрайн лавгун ур. Сивсусса, кьянкьа-кьурчIисса зунтталчу шиккугу командиртурал итталу ивкIун ур. Ванайн тапшур байсса бивкIун бур ясирну бувгьуми ца кIанава цамур кIанттайн биян буван.
Щамхал гьуртту шайсса ивкIун ур аьралийтал бигьалаган баву мурадрайсса циркравухгу. Чурххай кьуват бусса Щамхаллул кIира пут кIушиврул дусса гира карунниву тIуркIутIутIи дурну, аьралийтал махIаттал байсса бивкIун бур. Ва цувагу чурххай 2 метра ва 4 сантиметра лахъшиврул ва 140-150 кило кIушиврул дусса загълунсса адамина ивкIун ур.
Буттал КIанттул цIанийсса Хъунмасса дяъвилия зана хьуну ур 1945 шинал тамансса орденнащал, медальлащал ва командованиялул чулухасса Барчаллагьрал чагъардащал. ­Аьрая увкIун махъ Щамхал ризкьилул фермалий каялувшиву дуллай ивкIун ур. Мунияр махъ зий ивкIун ур комсомол организациялул секретарьну, Хъусращиял колхозрал председательнал хъиривчуну.
Щамхаллул арийлла лайкь дурну дур Дагъусттаннал лачIун уккаврил чемпионнал цIа. Ванал ялунцIагу диркIун дур «Дикий борец» тIисса. Щамхаллуйн чIявуну оьвчайсса бивкIун бур МахIачкъалаливсса соревнованиярттайн ва байраннайн. Шиккугу пут гьаз давриву ва чару личавриву хьхьичIунсса кIанттурду бувгьуну зана шайсса ивкIун ур.
1949 шинал Щамхаллул бувцуну бур цанма ччан хьусса душ. Вайнная бивзун бур 12 оьрчI. ХIабибуллагьлул душ Шансубани бур «Нину-Виричу». Вайннал ца душ аьпалул хьуну бур, ялами сагъну-саламатну бур. Цинявппагу оьрчIру бур нитти-буттаха лавхьхьусса, захIмат ххирасса, итххявхсса, дурккусса.
Шансубани дунияллия лавгун бур 67 шинаву, Щамхал ­аьпалухьхьун лавгун ур 2006-ку шинал.
– Жул ппу хъярч-махсара бан кIулсса ушивруцIун, ххаллилсса тарбиячигу ия. Буттал жуйх, арсурваврайх, давуртту дачIайва. Оьнма бацIан ихтияр дакъассия. Душругу ниттил лагма лавгун, кумаг буллай аьдат бувну бия. Ппу мукунсса къаивкIссания, шайссияв тай захIматсса шиннардий 12 оьрчI бакI буккан бувну, оьрмулул ххуллийн тIайла бацIан бан. Нинугу тарбиялул ялув цIакьну дацIайва. Жу, куннал кув хIурмат буллай, ­хъунаманал увкумур чIивиманал щаллу буллай, вардиш бувнав. Хъуниминнал янна-ус мюрщиминнан лаххан дуллай, оьрчIру янна-калул ва дукиялул щаллу байвав. Мунияту, жул кулпатрава бувкмигу захIмат ххирасса, инсаншиврул бутIа ххишалану буллусса хьунни, – тIий, буслай ур База.
Укун, яргсса оьрмулул ххуллу бивтун бур лачIунукку, фронтовик, цIакьсса зузала, 12 оьрчIал ппу, тIабиаьтралва буллусса гужирал заллу, цала махъ ххаллилсса наслу ­кьабивтсса Щамхал. Аьпа баннав цал.

ХIусайн Давыдов,
ш. ЧIурттащи