Мирза МахIанмадов
Къабуччиннав цув ччаврил
На вийн хаин хьуссар тIий,
Ххирамур, вихь щил бувсри?
Циван буракьай аьтIий,
Вих машара, щялмахъри.
Бувсхьурча му вихь бургъил,
Баргъ ттуруллул бугьаннав.
Бувсхьурча вихь цIузурул,
ТакIуй ккуркки къахьуннав.
Агар вихь му бувсхьурча
Энадрай чIаххувдушнил,
Зайгу къаучиннача,
Къабуччиннав цув ччаврил.
Аьли Айдаев
Кьини ацIийлва щинав
Кьини ацIийлва щинав
Кьурван-ПатIимат лагай.
АцIилвагу ганища
Ибрагьиннул щин хIачIай.
Чун ххилай бурвав ххуй душ,
Пяп-чарил дуллай бурвав?
Чун рутIлай урвав ххуй оьрчI,
Хханххираву цIу дурвав?
Казбек Мазаев
КIурукIуй ятIул тIутIив
– Агь, тIутIив, ятIул тIутIив,
КIурукIуй ятIул тIутIив,
НякIми тIутIайх дирчуну,
Зу циванну ларкьусса?
– НякIми тIутIайх дирчунни –
Ина Лаккуйва уну,
Жугу тIутIайх дичинну,
Зана шайхту вил ччисса.
Бадави Рамазанов
ЯтIул нур дия чIалай
ДакIний бакъар вил чурххай
ЯтIул гьухъа бивкIшиву,
ЯтIул нур дия чIалай
Вил чанна сипатраву.
ДакIний бакъар вил ччаннай
ЛухIи ттуплив бивкIшиву,
ДакIнивун бия кьутIлай
Вил лухIисса жавгьарду.
ДакIний бур гикку ина
ДакIнива бувсса гъалгъа,
Бяълилул ранггу хъанай,
БакIччаннавун буруглай.
Абакар Мудунов
Ихтилат
– Ххярхривав, къаххярхривав
Марщай къирмузи-тIутIив,
Жуннийн та бучIанавав
Жигьан – хъюрухъ багь чIантIив?
– Къирмузи-тIутIив марщай
Цакьнира хъя увкунни,
Жигьан жалинну лавгун,
Нюжмар чIарах дурккунни.
Чув ивкIра, багьадурай,
ТIутIал кьанкь лялияннин,
Чил хъаралу ччиссаннул
КIукIлусса кюру баннин!
Абачара ХIусайнаев
ШамайчIансса чагъар
Ца-ца чIумал архсса аьзиз зунттавун
Щугълурдал гьухъаллу итадаркьувкун,
Аьжаивну ххуйсса тIааьндалувух
Аьзизсса сипатру дачай ттул хьхьичIух.
Вай итталун дагьсса сипатирттавух
Хьурча ина аьлтту, кагьраба чIантIив,
Хъамаритай виха щалла дуниял,
Сукку шай ттул мурччив вихь ихтилат бан.
Ттуршвахъул ккулларду чIарах гьарчагу,
ИкъавчIайний дакъа, щаву къархьунни.
Минардал цIалцIалгу цIими буннихха:
Ва вил ччаврил гужрив, ттула бахттирив?
Аьбдул Мирзаев
Вил бавал ттухь куссия
Вил бавал ттухь куссия:
«Бархъаллал душнил хъирив
ЧIярусса хъус дулайссар,
Душнил хъирив дулунсса
Хъус на тIалав дуваннин,
Ссавур дуван багьанссар».
Вил бавал хъус дуваннин
На ссавур къадурссия,
Инанияр ххирасса
Ттун цамур ци дуссия?
МахIаммад-Загьид Аминов
Вил чалагъайгу – ссихIир
Вил чалагъайгу – ссихIир,
Чаргас яругу – ссигъа,
ЧIарав бакъанийгума,
ЧIалачIин дакъар виха.
Нажагь архIал бизарча,
АрхIала цама шара:
Аьрщарая ссав хьуну,
Аьсса-Ххуллийх ачара!
КъакIулли вил мукъулгу
Цими дикIайрив мяъна,
МикIлачIавай, ассавай,
АцIва жура шара на.
Цанни вил иттархъенну
ЛяличIину лахъисса?
Цанни миннул гьарца липI
Ттул дакIний личIлачIисса?
Агь, ва макIрив, ва чIихьрив,
Юхсса чIихьрасса макIрив:
Вих буруглан ттуршва я
Хъякуну бур ттул дакIний!
Мирза Давыдов
Чалагъай кIутIу матIра
Бюхтту-бюхттулнингу лахълай,
Чалагъай кIутIу матIра,
Чалагъайлийн муниллича
Ва ттул дакI дуккан дурсса.
ПалцIатIи буллай хIаллурду,
МурчIи-чIавкI маулларда,
Миннул лахъишивруллича
Дяйкьин дурсса ттул хьхьурду.
АвцIуни ттул чIарах бацIлай,
Цуркни мабуругларда,
Ми лухIи ярунналлача
Авцусса на щалава.
Вил ниттил мархь кIутIу буллай,
Ина ка галай дуллай,
ВичIа ччисса ва ттул чурххай
Валлагь хIал къаливчIунни.
Бюхттул цIияллайнгу лавхъун,
ЗункIуллай мабацIларда,
БавцIукун, ттухьгу булуси
На чув ацIантIиссарив.
Алекси Аьбдуллаев
ЧIаххувщар ва на
Личай дагьанттува
Бургъил яргсса цIай,
ЧIаххуврал ларзулу
Яргсса цIай бацIай.
Дуккай курчIущаргу
Ларзулун шадну,
Кьасттиращал бугьан
Ттул бургъил чIелму.
Ттул дакъари щарсса,
Акъар танил лас,
Акъара на жагьил,
Тагу бакъар душ.
Цалчин ччаву дурсса
ОьрчI ва душ кунма,
Цанъявав махъ бусан
Сикъасласисса?
ТалихIрал нур дусса
Ца интнил кьини
Ккуру битав махъру
ХIадур къабувсса:
Ттул дакъари щарсса,
Акъар вилгу лас,
Бачу цачIу дугьан
Оьрмулул хъарас!..»
ХIасан КIурухов
Ттун ца пиш гьа шай
Чаннаву хъюлчай тIий, чIурдаву гьанай,
ЧIимучIалттул кунна, кьини лахъара.
ЦIан-чани хъячиннин вил цIа тIий занай,
ЦIурттигу, цIубарзгу бизар бувара.
Рангру, рангру дачIлай, ттуршва жура шай
Бургъил тIиму щусса щинал кIунтIгума,
Ттунгу, туну, ххирай, вил ца пиш гьа шай,
Щала кьини занан Зал-идавс куна!
МахIаммад Щекьиев
КьабикIу
КьабикIу, матIра ттухь
кIинтнил дякъия!
Ттун ччай бур гъалгъа тIун
щюлли хьхьирия,
Мусил оьрчIшиврия,
чанна ччаврия,
Ччай дур хьхьирил лагма
тIутIал хIашия.
КьабикIу, матIра ттухь
ссутнил мурчая!
ДакI аьчух дуваймур
гъилисса гъия,
Ттун ччай бур гъалгъа бан
ххяххабургъия,
Хиял гьуркку буллай,
ларчIсса гъарая.
Исмяил ХIусманов
Щюлли къур
Агь, щюлли къур.
Цумари
Вих ябитан хьул бакъу?
Хьурдай къурув
Ца гьаз бан
Бархъарадушнил къукъу!
Къуппан-тIутIив
Мяш тIисса
Ххаллилли вил чIюлушин.
Агь, щюлли къур,
Уца на
Хьхьемавух ккуру ишин!
Сибирбаг Кьасумов
ЧIарагъи
Ккавкссарив дус, вин ссуттил
Гъинтнил гьантта цIу лавгун,
Хъахъи ларгсса хъу-лухччи
ЦIуницIа вирин дирзун?
Агь, дуккайча цакуну
Ца дакI мяшсса кьинирду,
Лазатсса дюхлулувух
Гъили буллан бургъилу…
Интнил дукъарччу дакIнийн
Ттуршилул дяркъу щуну,
Дуссия ттулгу чIантIив
ЧIун дакъа силул хьуну.
Мусил лачIал лизурдах
ЦIуницIа вийн я щуну,
ЧIарагъи дайдирхьунни
Гъапул ларгсса дакIниву.
Сулайман Чугуев
Ва щала дуниял – инагу, нагу
Агь, хьхьунил ххуйшиву, цIурттал яргшиву!
Гьавасрал тIуркIу бур кайп хьу дакIниву,
Ттул чурххайх бивщунни виясса хIукъу –
ХIавчIссаксса хьуннахха шарабрал къукъу.
Ттул мурччай ливккунни вил ччаврил зурзу,
Ххябувккун лавгунни хIаярал гьухъа,
Жуйхва кай-кай хьуну куклусса кувку,
Караматрал чIануйн бивтунну ккуру.
Арцул хъазам шюшлай – зурул чанигу,
Ччанавкку кIизувух – хьхьунил дюхлугу,
Ва щала дуниял – инагу, нагу,
Гьарзадрал мяънагу – ца вил мукъуву.
Аьвдулмажид Исмяилов
Вил дакIнил макьан
Хьхьемал пар бивщусса
Мюрщисса чIапIив,
Кьанийх ца-ца дагьсса
ЧIюлусса тIутIив:
ТIутIал дянивухсса
Ххуллийх ялавай
Най бура инагу
Оьллааривппай.
Уртту-тIутIал хъюлчу –
Вил дакIнил макьан…
БучIиссарив, ххуй душ,
Вил хъирив лаян?
Рамазан Рамазанов
Щюлли къурув
Ххяххабаргъ.
Неххал зума.
Хьамара бивчу щатIив.
Ттул «хьурдайгу» кIюрххилва –
Дуллай кIяласса тIутIив.
Щюлли къур.
Дюхлул къатта…
Зурзу тIий – урттуй чани.
КIункIу тIий мурчал хъирив
ЛухIи-цIансса хаятIив…
ХIажиаьли Аьбдуллаев
Ина тIий личIан
Бити, душ, вийну ттун
Мурад къабулун,
Оьрмул-оьрмулухун
Ина тIий личIан.
Так на талихI бакъун
Ккалли маара,
Вихсса ччаврил хIасрат
Ттул талихIрича.
