Ватан дуруччул кьинилул хьунийн Дагъусттаннал паччахIлугърал халкьуннал хозяйствалул университетраву хьунни хасъсса аьра­лий операциялул гьурттучи, азаруннийн бивсса аьралийтурал оьрмурду ххассал бувсса хирург, медициналул къуллугърал лейтенант Давид Учуевлущалсса хьунабакьаву.

Студентътал мукIру хьунни Давид, анжагъ, цIараву щавурду дирминнан цалчинсса кумаг буллалисса хIакин акъасса, захIматсса тагьардануву аьралийтуран цанмагу, цала чIаравминнал оьрмурду хха­ссал бан лахьхьин буллалисса насихIатчи ушиву.
«Дяъвилул шартIирдаву яла аьркинсса цир – анавархъиндарай цалчинсса кумаг баву. Аьра­лий иширттаву щаву дирманал оьрму чIаравманал бюхъу-кIулшивурттал биялалухьри бу­сса. Мунийн бувну, ттула буржну чIалай бур, цумацагу солдатнан цала аьралий гьалмахчу бивкIулуща ххассал ан бюхъан­сса кIулшивуртту дулаву», – тIий ур Давид.

Студентътал гъирарай вичIидирхьуну бия аьралий хIакиннал бусласимуних: жула аьра­лийтурал виричушивурттая, аьралий шартIирдаву оьрмурду ххассал баврия.
ЧIявуя суаллугу: «Аьрай хьхьичIххуттай яла аьркинмур цир?», «Цалчинсса кумаг бан бюхъаншиврул ци кIулшивуртту дикIан аьркинссар?», «Яла дакIний личIансса иш цукун­сса хьуна?»

Давидлул бусаврийн бувну, яла захIматмур иш архIала гьаркIанттай икIан бюхълай бакъашиву. «ЦIунцIия хьуманан цалчинсса кумаг баншиврул яла кIулну бикIан аьркинмур чурх тIайлану бишин ва оь бацIан бан. Нярайсса гьиву духIан тIурча кумаг бай ттула даврил агьамшиврул ялувсса жаваблушинна дурчIлачIаврил», — тIий ур аьралий хIакин.
Студенътурал бусаврийн бувну, ва хьунабакьаву укуннасса «чувшиврул ссят» дакъаяча, никирттал дянивсса ихтилат бия, аудиториялул ва азарда километралул архну хъанахъимунил дянихсса ламу бия.

Студентътурал хьхьичI ия аькьлу бусса, ухха-азу хьуну ухьурчагу, лакъахIайсса, цала даврийн дакI тIайласса пишакар.
Лекциялия махъ чIявуми гъан хъанай бия хIакьсса виричунал ка чIувин дурну, барчаллагь учин, ялагу ца суал булун.

Давид Учуев лавгунни махъунай, аьралийтурал оьрмурду ххассал бу­ллан, студентътурал дакIурдиву хъамакъабитайсса пикрирдугу загьир бувну – хIакьсса элму дикIан аьркиншиву халкьуннаха къу­ллугърай, чувшиву тIурча, душиву хьхьичIра-хьхьичI жавабувшинна. Ва ялагу вирттал – жула дянив бушиву тасттикь бан.
Давидлун цIуллушиву ва тIайлабацIу чIатIий, студентътал буслай бур ссавур дакъа ялугьлан тIий бушиву хъиривсса хьунабакьаврих.

Зулайхат Тахакьаева