Ватан дуруччул кьинилул хьунийн Гъумук хьунни ватандалул ххуллий чувшиврий жанну дуллуми дакIнин бичлачисса мероприятияртту. Ми дайдирхьунни Совет Союзрал Виричу Якьуб Сулаймановлул гьайкалдануцI тIутIив дишаврия.

Мичча райондалул администрациялул каялувчитал, идарарттал зузалт ва бувкIсса хъамал лавгунни Вирттаврал чIирацIгу тIутIив дишин. Хъирив Буттал КIанттул цIанийсса Хъунмасса дяъвилия зана къавхьуминнан дацIан дурсса гьайкалдануцI тIутIал шалкагу бивхьуну, хьунни митинг.
Райондалул бакIчи Зураб Куччаевлул кIицI лавгунни тарихрал аьпа никирая никирайн буруччаврил агьамшиву.

– Жува бавтIун буру Буттал кIанттул цIанийсса Хъун дяъвилий Ххувшаву ларсми дакIнин бичин, хIакьинугу ватандалул мурадру буруччаврил ххуллий жард къакуну талатиминнал чIарав бацIан. Ряхазару­нния ливчусса чиваркI лавгун бур жула райондалия Ватан душма­нная дуруччин, ххюцIаллийсса жагьилтал гьуртту хъанай бур хIакьину хасъсса аьралий операциялий. Жува тайнная пахрулий буссару! Аьпа баннав чувшиврий жанну дуллуминнал!» – увкунни Куччаевлул.

– Ватан дуруччул кьинилул цачIун буллалиссар цинявппагу яхI, чувшиву, ватандалухсса ччаву дакIниву думи. Жула армия дакIнил кьуват ххисса аьралли, буттахъал виричушиврул кьимат ва аьпа буручлай буссаксса, жува бух бан къахьунтIиссару! – увкунни Лакрал ва Ккуллал районнал аьралий комиссар Аьли ГъазимахIаммадовлул.
Ва кьинилул мурадрацIун бавхIусса махъ лавхъунни Лакрал райондалул Хъунисриннал советрал председатель Юсуп Рамазановлул.
Хасъсса аьралий операциялий талатиминнал цIания бавтIми барча бунни «Память Гор» ккурандалул кIанттул отделениялул ва СВО-лул Ветерантурал ккурандалул каялувчи Ярагъи Дандамаевлул.
Ватандалул цIаний жанну кьурван дурминнал рухIирдая кьулгьу-алхIам бувккунни райондалул Имамтурал советрал хъунама ХIабиб Батталовлул.
Муния махъ цинявппа лавгунни Гъумучиял школалул хIаятраву хасъсса аьралий операциялий жанну дуллуми­ннан цIа кусса Аьпалул багъраву мемориалдануцI тIутIив дишин.