Вай гьантрай «Дагестанская правда» кказитрал редакциялий хьунни Дагъусттаннал миллатирттал мазру ябаврил хIакъиравусса ккуркки стол. («Языки народов Дагестана:цифровизация языковой среды, роль СМИ в популяризации национальной речи, проблемы преподавания»).
Шикку гьуртту хьунни Дагъусттаннал Халкьуннал Мажлисрал председательнал хъиривчу АьбдулвахIид Лабазанов, Дагъусттаннал педуниверситетрал Дагъусттаннал филологиялул факультетрал декан Зайнав Оьма­рова, «Нур» кказитрал хъунама редактор Байрам Аьбдуллаев, «ХIакьикьат» кказитрал корреспондент, учитель Шамай Казанбиева, Аьрасатнал элмурдал академиялул ДФИЦ-рал (Дагъусттаннал федерал ахттаршиннарал центр) мазрал ва литературалул институтрал элмийсса зузалт: филологиялул элмурдал кандидат Даниял МахIаммадов, Шарапуттин Дашдемиров, филологиялул элмурдал кандидат Умсалимат Аьбдуллабекова( ва хъанай бур терминал ва орфографиялул комиссиялул къумукьнал группалул членгу), «Илчи» кказитрал отделданул редактор, терминнал ва орфографиялул комиссиялул лакрал группалул член Андриана Аьбдуллаева.

«Дагестанская правда» кказитрал корреспондент Хасайбат Маджидовал мероприятие тIиртIуну махъ, кIицI лавгсса масъалалул хIакъираву циламур пикри бувсунни вава кказитрал хъунмур редактор Бурлият Токболатовал.
– ХIакьину жува буру ми­ллатрал мазру буруччаву мурадрай паччахIлугърал цичIар дуллай бакъар тIий. Къарязийра. ХIукуматрал циява багьаймур буллай бур. Цамуния къатIурчагума, хIакьину жучIава буклай бур миллатирттал мазурдийсса луттирду, кказит-журналлу. Школардай дихьлай бур ниттил мазрал дарсру. Жува, мазрал заллухъру, буллай бурув шаймур жулва маз ябан ? Мунил пикри бувара. Ттун чIявуну баяй, нитти-буттал, чIявучин ниттихъал, оьрчIру ниттил мазрал дарсирдайн гьан къабувну, миннун кIанай цайми дарсирдайн гьан буллай бур тIий. Мазрал заллухъру цивппа маз буруччин, му оьрчIайн, оьрчIал оьрчIайн биян бан хIарачат буллай бакъахьурча, властьрал хIукмурдайну, амрурдайну, постановлениярттайну маз буруччин къашайссар. Бургияра хIакьину журналистътурал дянив ци тагьар дурив. Миллатир­ттал мазурдий буклакисса кказит-журналлай зузисса журналистътал бур 70-ку шиннардил никирал инсантал. Гьанссар ми цаппара шиннардива давурттая. Буссарив миннал кIану бугьансса литературийсса ниттил маз кIулсса инсантал жагьилсса никираву? – увкунни ванил.
Мазру ябаву, мунил сий гьаз даву мурадрай Халкьуннал Мажлисрал зузи группалул хIадур бувсса маслихIатирттащал кIул бунни гьурттучитал АьбдулвахIид Лабазановлул:
– оьрчIал багъирдаву гъалгъа тIун ниттил мазурдий;
– зана дан учительтал хIадур байсса дянивмур профессионал образование;
– дипломрай чичру дуллан: «Ниттил мазрал дарсру дишин ихтияр дуссар» тIисса;
– хIадургу дурну, кьамул дан ниттил мазурдий дарс дихьлахьи­сса учительтуран ва тарбиячитуран кабакьу баврил хIакъиравусса ­региондалул программа;
– ххишала дан ниттил мазрал дарсирдал ссятру школардай, профильданул ссузирттаву ва вузирттаву;
– личIи-личIисса миллатирттал оьрчIру бусса школардай 1-4 классирттаву дарсру дихьлан миллатирттал мазурдий;
– ниттил мазру лахьхьаву ва миннул сий гьаз даву мурадрай щаллу дан цифрардал ­платформа.
Зайнав Оьмаровал бувсунни цала факультетрал аьркинссаксса кадрарду итабакьайшиву, амма ми харжру мюрщисса буну, школардай зун най бакъашиву.
Гьурттучитурал мукунма гьаз бунни школардай ниттил мазрал учебникру ва методикалул пособияртту биялну бакъашиврул масъала.
Ихтилат хьунни утти цIуну кьамул дантIисса ниттил мазурдил терминнал ва махъру тIайлану чичаврил кьяйдардал сводраягу.
Миннувугу чIявуми уттигу цалийн бувкIун бакъар.

Андриана Аьбдуллаева