Ларгсса нюжмардий МахIачкъалалив хьунни Дагъусттаннал Печатьрал ва информациялул агентствалул коллегия. 2025 шиналсса хIасиллу дуллалисса ва гьашину цукунми масъалартту хьхьичIун лавсъссарив ххал бигьлагьисса.
Заседаниялул дайдихьу дуллалисса махъ лахълай, республикалул бакIчинал ва хIукуматрал администрациялул хъунаманал хъиричу Рашид Акавовлул кIицI лавгунни, къабигьасса чIунну духьурчагу, агентствалул даву сантирайн руртун душиву, лябуккулий СМИ-лул реформарду дуршиву ва творчествалул зузалтран харжру гьаз бувансса чараннах луглай бушиву, электрон ресурсру ишла дурну, кказит-журналлу гьаз буллан аьркинсса чарабакъашивугу душиву.
Дагинформрал каялувчи Арсен Юсуповлул бувсунни, республикалул СМИ Дагъусттаннал бакIчи Сергей Меликовлул сипталийну цIакь дурсса Миллатирттал мазру буруччаврил ххуллийсса программалуву хьхьичIунну гьуртту хьунтIишиву. Ва документ властьрал, элмулул, кIулшиву дулаврил ва граждан обществалул хIарачат цачIун бувсса хъанахъишиву, гьанумур даву СМИ-лул дуван багьлай бушиву. Бувсунни ларгсса шинал медиасфералуву дурсса дахханашивурттая, вайннувух 2023 шинал дайдихьу дурсса холдингру хIасул даврия. Оьрус мазрайсса СМИ цачIун дурсса «Дагмедиа» хIасул даврицIун, цIусса Медиалул институтгу хIасул бувшиву, итабакьлай бушиву СВО-лул тема аьч дуллалисса «Zащитник» тIисса журналгу. Луттирду итабакьайсса издательстварттугу цачIун дурну, «Даггосиздат» тIисса ца хIасул дуршиву. Бувсунни ванал экстремизмалийн ва терроризмалийн къаршисса давугу гужлан дуршиву, 50-нния лирчусса видеосуратру, мукунна документал журалул киносуратру хIадур дуршиву.
– Аьмну итабавкьуну бур жул учреждениярттал 107 лу, 30 азаллий 850 экземпляр тиражрал бусса. Буттал кIанттул цIанийсса Хъунмасса дяъвилий Ххувшаву ларсун 80 шин шаврин ва Ватан дуруччул шинан хасну 15 лу итабавкьуну бур 9000 экземпляр бусса. Мукунма СВО-лий Аьрасатнал Вирттаврал цIардан лайкь хьусса дагъусттанлувтурал гьунардая кутIану бусласисса дуклаки оьрчIансса тетрадьругу, 15 000 тетрадь аьмну. Сочилий хьусса СМИ-лул форумрай , 700 аьралийчуная ва миннал кулпатирттая бусласисса «Помним СВОих» тIисса луттирал презентация дуссия», – увкунни ванал.
Бувсунни гьашину республикалул бюджетрава 200 миллион итабакьинтIишиву кказит-журналлал комплекс цIу буккан бан, мукунма журналистътурал харжру гьаз бувансса хIарачат бувантIишиву.
Дурсса давурттая гьарза-гьартану бувсунни «Дагестан» РГВК-лул директор Камила ХIамзатовал, Дагъусттаннал Журналистътурал союзрал хъунама МахIаммад Ибрагьимовлул.
Мероприятиялул ахирданий Агентствалул ва Аьрасатнал Журналистътурал союзрал чулухасса ХIурматрал грамотартту ва Барчаллагьрал чагъарду буллунни хьхьичIунну зузиминнан. Вайннавух наградарттан лайкь хьунни «Илчилул» корреспондент Бадрижамал Аьлиева ва корректор Аминат АхIмадова. Бадрижамал чIярусса шиннардий «Илчилул» корректоршивугу дурсса, лакку мазрал грамматика бюхъан бавриву биялсса бутIа бивхьусса душри. Вава ххуллийх, вава хIарачатрай нанисса Аминатгу гьунар бусса шаэргур. Лайкьссар душру вайннунгу, вайннуяр хъуними наградарттангу.
ПатIимат Рамазанова
