Нацгвардиялул аьралуннал МахIачкъалаллал соединениялул базалий хьунни Ватан дуруччул кьинилун хас дурсса «Мы – граждане России» тIисса акция.

Акциялул лагрулий «Цалчинминнал Суккушиннаравусса» 20 жагьилнан буллунни Аьрасатнал гражданиннал цалчинсса паспортру. Мероприятие дайдирхьунни Аьрасатнал, Дагъусттаннал ва «Цалчинминнал Суккушиннарал» ттугъру буккан баврийну. Гьурттучитурал щаллу дунни ­Аьрасатнал ва Дагъусттаннал гимн. Дуклаки оьрчIал шадлугърал даражалий бувккунни Аьрасатнал гражданиннал хъа.

ОьрчIахьхьун паспортру буллунни Росгвардиялул МахIачкъалаллал соединениялул командирнан кIанайсса полковник Максим Апаровичлул, бригадалул командирнал хъиривчу, подполковник Олег Паклул, соединениялул командирнал ­ветерантуращалсса даврил кумагчи, отставкалийсса полковник Тажуттин Жабраиловлул, «Цалчинминнал Суккушиннарал» Региондалул отделениялул советрал председательнал хъиривмур Екатерина Абакаровал. Максим Апаровичлул барча бунни оьрчIру агьамсса документ ласаврищал ва чIа увкунни Ватандалул цIаний лайкьну къуллугъ буллан.

– Паспортрал ­дуллалиссар зухьхьун хъунисса каширду, тIитIлатIиссар зул хьхьичI чIявусса ххуллурду. Зула каши, бияла ишла бувну, ккаккан бувара зула бюхъурду ва гьунарду, – увкунни Екатерина Абакаровал. Паспортру лавсун махъ, хъамаллуран ккаккан дунни хаснура вайннан тIиртIусса ярагъуннил ва аьралий техникалул выставка.