Нюжмаркьини Совет Союзрал Виричу Муса Маннаровлул цIанийсса Гъумучиял школалул актовый залдануву, чIявусса агьлугу бавтIун, лайкьсса даражалий хьунни Аьрасатнал Халкьу­ннал цашиврул шин тIитIаврицIун ва Ниттил мазрал кьинилуцIун дархIусса хъуннасса байран.

Школалул жанахIраву дирхьуну дия лакрал шаэртурал суратирттал ва луттирдал стендру, миллатрал аьдатру ва багьу-бизу ккаккан буллалисса ичIаллил кьай-кьуй. Лакрал аьдатру кка­ккан дуллай (ппал дуцлай, дюхлай, кIунулий жуларду дуллай, къама пас буллай) щябивкIун бия райондалул магьирлугърал къатлул зузалт.
Байрандалул бусравсса хъамаллуравух бия ДР-лул Халкьуннал Мажлисрал депутатътал, ведомстварттал каялувчитал, магьирлугърал ва жяматийсса ишккаккулт.
Байран тIитIлай, Лакрал райондалул бакIчи Зураб Ку­ччаевлул кIицI лавгунни жямат цIачIун баврил агьамшиву.

– Ххирасса ватанлувтал, хIурмат лавайсса хъамал, зун хъунмасса барчаллагь жущал цачIу ва байран дан бучIаврихлу. Жунма даин дакIний бикIан аьркинссар жула гуж чIявусса ми­ллатирттал цашивруву бушиву. Аьрасатнал Халкьуннал цашиврул шинну баян бувсса шинал цал ттигу тасттикь баннав жунма жува аьмсса тарихрал цачIун бувсса халкь бушиву, жула ялун бучIантIимургу аьмсса бикIан аьркиншиву. Халкьуннал цашиврул шин жува Ниттил мазурдил кьинилуцIун дархIуну тIитIлай бушиврулгу хъунна­сса агьамшиву дуссар, мазравур миллатрал дакIгу, рухIгу дусса! – увкунни Зураб Куччаевлул.

ДР-лул Жяматийсса Палаталул хъунаманал хъиривчу Сапар Аьбдуллаевлул чIурчIав дурунни шагьрурдай цала мархрая ятну хъун хъанахъисса никиран ниттил маз лахьхьин баврил агьамшиврий. Бувсунни оьрчIан лакку маз лахьхьин баврил ххуллий МахIачкъалалив тIивтIусса жула хъунасса аьлимчу Ися Аьбдуллаевлул цIанийсса центрдания. Ва центр цуппагу тIивтIуссар Сапар Аьбдуллаевлул кабакьулуцIух.

ХIакьинусса шартIирдай ниттил маз буруччин аьркиншиврия ихтилатру бунни Халкьуннал Мажлисрал депутат Марат Илиясовлул, ДР-лул транспортрал министрнал хъиривчу Саэд Рамазановлул, Аьрасатнал лайкь хьусса артист Аслан МахIаммадовлул, Роспотребнадзорданул Дагъусттаннайсса управлениялул каялувчи Залимхан Оьмариевлул, «Илчи» кказитрал хъунама редактор Руслан Къардашовлул, ДР-лул Музыкантътурал союзрал хъунама Хан Башировлул, Лакрал театрданул хъунама режиссер Аслан МахIаммадовлул, Ися Аьбдуллаевлул цIанийсса Лакку маз лахьхьин баврил центрданул хъунмур ПатIимат Аьлиевал, Гъумучиял школалул директор Соня Макьаевал.
Цинявппагу кIицI лаглай бия Аьрасатнал Халкьуннал цашиврул ва миллатирттал мазру ябаврил бушиву цIакь буллай жула ялун бучIантIимунил гьану.
Ниттил мазран хас дур­сса байрандалий хъунмур къулагъас дурну дия лакрал шаэр МахIаммад-Загьид Аминовлул творчествалух. Байран цурдагу дайдирхьунни ванал «Ниттил мазрахасса» шеърилийну. Экрандалий ккаккан бувунни шаэрнаясса киносуратрал лахIзарду.

Байрандалий гьуртту хьунни «Живая классика» тIисса конкурсрай цалчинмур кIану бувгьусса дуклаки оьрчIру: ХIажиева СултIанат (Кьубиял школа), ХIасанов Аьбдулаьзиз (Гъумучиял школа), Кьурбанова КьурбанпатIимат (Щардал школа). Аминовлул творчествалун хас дурну дия Ниттил мазрал кьинилун цIа кусса шеърирду буккаврил конкурсгу. Ваний ххув хьусса Ибрагьимова Наргизлул (Гъумучиял школа), Ибрагьимов Кьурваннул (Щардал школа), Гьарунов Юнуслул (Уриннал школа), Ибрагьимова Самирал (Щардал школа) байрандалийгу бувккунни шеърирду.

Ниттил мазрал кьинилун ва Аьрасатнал Халкьуннал цашиврул темалуцIун даркьусса яргсса ва авадансса программа хIадур дурну дия райондалул Магьирлугърал къатлул зузалтрал ва Гъумучиял ОьрчIал магьирлугърал школалул.
Балайрду увкунни «Вирттал» тIисса арамтурал ансамбльданул ва «Вайлар» тIисса хъаннил ансамбльданул. Халкьуннал инструментирттал ансамбльданулщаллу дунни халкьуннал макьанну. Лакрал халкьуннал къавтIаву «Къиссу» щаллу дурунни Гъумучиял оьрчIал къавтIаврил ансамбльданул.
ХIакьинусса кьинилуцIун лап бавкьусса, буттал улчагу, ниттил мазгу буруччара тIисса мяъна-мурадрал вибувцIусса мукъурттий балай увкунни райондалул магьирлугърал къатлул директор АьлихIажи Щамхаловлул.

Аьрасат билаятран хас бувсса балай увкунни Нажвадин Халиловлул.
Байрандалул сий хъун дурунни Дагъусттаннал халкьуннал артистка Лариса ХIажиевал ва Дагъусттаннал лайкь хьусса артист Карин Кьадинаевлул.
Байран дайлиртIунни Лакрал гимн щаллу даврийну.
Ниттил мазрал кьинилун ва Аьрасатнал Халкьуннал цашиврул шин тIитIаврин хас дурсса мероприятияртту хьунни райондалул гьарцагу школалий, библиотекарттай, детсадирттаву.