Ххюя лаккучунал интернационал бурж бартбигьлай къучагъшиврий жанну дуллуссар. Зана хьумигу дяъвилий ккаккан дурсса къучагъшиврухлу лайкь дурсса личIи-личIисса наградарттащал бувкIссар. Миннавасса ца ур ГьунчIукьатIатусса Мурад ХIажиев.
Увну ур Мурад 1961-ку шинал ГьунчIукьатIрал шяраву. Шикку ряхва класс къуртал бувну бур. Гихунай ва дуклай ивкIун ур МахIачкъалаллал 30-мур школалий. Школа къуртал бувну махъ, 1980-ку шинал, увххун ур Ветеринар медициналул Санкт-Петербургуллал университетравун (танийсса Ленинградуллал ветеринар институт). 1985-ку шинал, дуккавугу дяличIан дурну, аьралуннаву къуллугъ бан увцуну ур.
Май зуруя октябрьданийн ияннин Мурад къуллугъ буллай ивкIун ур Самаркьаннайсса учебный частьраву. Октябрьданий шичча Авгъаннавун тIайла увккун ур. Ва ивкIун ур Къундуз провинциялийсса частьраву, 201-мур мотострелковый дивизиялул 252-мур личIисса связьрал батальондалуву. Хьхьу-кьини къаувкуну, частьравугу, аьралий операциярду нанисса чIумал частьрал кьатIув, личIи-личIисса кIанттурдайгу, дахIаву руцан къаритлай цIакьну бавцIуну бивкIун бур.1987-ку шинал Мурад лайкьну аьралий буржгу лавхъун, зана хьуну ур.
Авгъаннал аьрщарай интернационал бурж лахълай ивкIун тIий лайкь хьуну ур «От благодарного Афганского народа» тIисса ва совет аьрал Авгъаннава буккан бувсса юбилейрдал медальлан.
Зана хьуну хъиривмур шинал Мурадлул къуртал дурну дур цала дуккаву. Гихунмайсса захIматрал ххуллий ва зий ивкIун ур личIи-личIисса къуллугъирттай.1988-1997-ку шиннардий Карелиянал Республикалий Лопухский райондалул ветеринар станциялул хъунаманугу, райондалул хъунама ветеринар хIакиннугу. Цаппара шиннардий вара республикалий хъунама зоотехникнугу, Шокша тIисса шяраваллил хозяйствалул предприятиялул хъунаманал хъиривчунугу ивкIун ур. Мунияр махъ чансса хIаллай частный предприятиялийгу зий ивкIун, 2004-ку шинал увкIун ур Санкт-Петербургуллал паччахIлугърал ветеринар къуллугърайн ризкьилул хIакинну. ЦIанасса чIумалгу шиккува зий ур. 2005-ку шинал Мурадлул къуртал бувну бур ПаччахIлугърал къуллугърал Северо-Западная академиялул юридический факультет.
Цала даву ххуйну кIулсса ва жаваблувшинна дусса зузала бусравну ва хIурматрай ур къуллугърал хъуниминначIа ва даврил уртакьтурачIа.
Андриана Аьбдуллаева
