Февраль зурул 15-мур кьини щаллагу дунияллий кIицI лагай ОьрчIал ракрал кьини хIисаврай. Вай гьантрай Дагъусттаннал парламентрал хъунама Заур Аскандаров, МахIачкъалаллал мэр Жамбулат Салавов, ванал хъиривмур Эмилия Ражабова ва цаймигу бусравсса инсантал бивунни Кураевлул цIанийсса Республикалул оьрчIал азарханалийн онкологиялул ва гематологиялул отделениялий хъин хъана­хъисса оьрчIачIан. Вайннахь бия оьрчIансса ссайгъатругу, байран дувансса аниматорталгу.

Палатардавух бувккун, хъамаллурал чIава къашайшалтрахь ва вайннал нитти-буттахь цIухху-бусу бунни. Отделениялул хъунмур Индира Юнусовал бувсунни хIакьинусса кьини азарханалий цукунсса тагьар дуссарив, цукунсса захIматшивуртту хьунадакьлай дуссарив. Ванил барчаллагь увкунни спикернахь онкологиялул къашавайсса оьрчIан мудан буллалисса кумаграхлу. Ва ххуллухьгу Заур Аскандаровлул санкциярду багьана хьуну, жулва билаятрай лякъин къахъанахъисса, химиотерапиялунсса даруртту лявкъуну, дузал унни чIивисса оьрчI Юсуп. Ванал бувсунни, шанма зуруй ­къазузисса МРТ-лул аппаратрал детальлу машан ласунгу икьрал дуршиву.

Мэр Жамбулат Салавовлулгу бувсунни, цалва хьхьичIва тапшур бувшиву кIива палаталуву ремонт дуван. Ххал дунни ремонт чун дирну дурив. Индира Юнусовал кIицI лавгунни, линолеум, плинтусру даххана дуршиву, магъив, чIиртту хIулухIлай бушиву, даву сантирай най душиву ва февраль зурул ахирданийннин къуртал дувансса пикри бушиву.

«Жул мурад – ва отделениялий хъин хъанахъисса мюрщисса къашайшалтран къулайсса шартIру дузал дувавур. Ремонт къуртал шайхту, цIу буккан бувсса палатардавун цIусса матахIгу дучIантIиссар. ЗахIматсса азар хъин дурсса оьрчIру аьркинмунил дузалну бикIан аьркинссар, вайннаха аякьа дуллантIиссару уттиния тинмайгу», – увкунни ванал. Бусан ливчIунни, хъамаллурал ххюва цIусса телевизоргу пишкаш бувшиву палатардаву бишин, мукунма оьрчIру итххяххан бан кумаг буллалисса тIуркIурдал набордугу.
Ахирданий аниматортурал тяхъасса тIуркIурдайну ва конкурсирттайну чIавасса къашайшалтрал дакIру тирх учинсса байран дунни.

ПатIимат Рамазанова