Дагъусттаннал Муфтиятрал вакилтурал баян бунни цинявппагу бусурманнан яла ххирамур Зумаритавал барз февраль зурул 19-нний байбишинтIий бушиву.

Мукунма, республикалул имамтурайн тапшур бувшиву, февраль зурул 17-нний маркIачIанмай барз буккаврил хъирив бавцIуну, мяълумсса бази буван. Дурусну цумур кьини байбихьлай буссарив кIул буваншиврул. Ва ишираву цалийн къабучIаврил ялув аьраттал буклан бикIай агьали, амма аьлимтуран барз буккаврих къулагъас дурну, бази буван багьай. Ца гьантлул махъун-хьхьичIун багьаврийну дуниял къалекьанссар, ссавурданий ялугьланну аьлимтурал баян баврих. Цалссарив, февраль зурул 19-мур кьини байбишин бюхъайшиву бувсунни. Ци-бухьурчангу, Зумаритавал зурул дайдишавугу «Илчилул» буккултрахь барча дуллай, чIа тIий буру зумарду дугьлансса цIуллушивугу, хъиншивуртту-хъинбалартту буллансса гъирагу, кашигу.
Ва нанисса шин Аьрасатнаву Цашиврул шиннугу баян бувну бухьувкун, Рамазан барзгу агьалинал цашиву цIакьгу, куртIгу дуллалисса барз хьунссар тIисса умудрай буру. ЦIакь хьусса аьдатрайн бувну, цачIун бавтIун, ца урцIух ккуркки лавгун зума итадакьлансса чятирду хIадур буллай бур республикалий. Рамазан зурул ца ххуйшиву вагу.

ПатIимат Рамазанова