Февраль зурул 15-нний МахIачкъалалив, Аьралийтурал — Интернационалистътурал паркраву хьунни совет аьрал Авгъаннава буккан бувну 37 шин шаврин хас дурсса аьдатравун дагьсса акция.
Мероприятиялий гьуртту хьунни Дагъусттаннал ХIукуматрал председательнал хъиривчу Рамазан ЖахIпаров, авгъан дяъвилул ветерантал, хасъсса аьралий операциялул гьурттучитал, Дагъусттаннал Халкьуннал Мажлисрал депутатътал, республикалул ХIукуматрал ва шагьрулул администрациялул вакилтал.
Цинявппагу ихтилатчитурал кIицI лавгунни Авгъанисттаннай аьралий бурж лахълай бивкIсса дагъусттанлувтурал къучагъшиву. ЧIурчIав дунни миннал чувшиву жагьилсса никиран эбратну хьун аьркиншиврий.
ЦIанасса чIумалгу авгъан дяъвилул ветерантал гьуртту хъанай бур хасъсса аьралий операциялий, тIайла буклай бур гуманитар кумаг, чялишну гьуртту хъанай бур жяматийсса иширттаву ва жагьилтал ватан ххирану тарбия баву мурадрай дуллалисса давурттаву.
Акциялул лагрулий гьурттучитурал дирхьунни тIутIив авгъан дяъвилий жанну дулусса дагъусттанлувтурансса гьайкалдануцI.
ДакIнин бутан, авгъан дяъвилуву гьуртту хьуссар 3500-нния ливчусса дагъусттанлувтал. Миннава 41 инсаннал жан дуллуссар, 600-нния ливчусса лайкь хьуссар личIи-личIисса орденнан ва медальлан. КIиннан – Абас Исрапиловлун ва Нухидин ХIажиевлун дуллуссар Совет Союзрал Виричунал цIа.
Андриана Аьбдуллаева
