Вай гьантрай Региондалул навтлил ва газрал колледжраву хьунни паччахIлугърал ишккаккултращалсса дакIний личIансса хьунабакьаву. Студентътуращал хьунабакьин бувкIун бия бусравсса хъамал: Дагъусттаннал Халкьуннал Мажлисрал председательнал хъиривчу Камил Давдиев ва МахIачкъала шагьрулул депутат НурмахIаммад ХIабибуллаев.
Агьаммур ихтилат хьунни Аьрасатнал президент Владимир Путиннул хьхьичI ххуттайн лавсъсса масъалалул, билаятрал даража гьаз баврил, иш бачин баврил хIакъиравусса. 2026-ку шин президентнал баян бунни Аьрасатнал Халкьуннал цашиврул шинну. Цала ихтилатирттаву спикертуралгу кIицI лавгунни так цинявппагу аьрасатлувтурал цашиврийн хъар хъанахъишиву билаятрал гуж-цIакь. Жагьилтуращалсса ихтилатирттаву хъамаллурал мукунна чIурчIав дунни жула халкьуннал никирая никирайн нанисса аьдатру дуруччин аьркиншиврий, хъунанал хIурмат бикIан аьркиншиврий. Бунни мюнпатсса маслихIатру ва насихIатру.
– ЦIана, чIявусса баргълагавал билаятру Аьрасатнайн данди бавцIусса, хасъсса аьралий операция нанисса чIумал халкьуннал цашиврул бияла хъунмассар. Так цаннал чIарав ца бавцIунур жущава ччимур тагьарданий билаятрал гуж-цIакьгу, тархъаншивугу дуруччин хьунтIисса, – увкунни ихтилатчитурал.
КIицI лаган, укунсса хьунабакьавуртту Региондалул навтлил ва газрал колледжраву цалчин дакъар хъанахъисса, вай аьдатравун дагьну дуссар. Камил Давдиев тIурча колледжрал муданасса вихшаласса хъамаличури. Хъунмур никирал ва властьрал вакилтурал бусласимуних студентътурал мудангу гъирарай вичIи дишай.
Ихтилатру къуртал хьуну махъ колледжрал директор Аьлишер КьурбанмахIаммадовлул барчаллагь увкунни бусравсса хъамаллурахь.
Андриана Аьбдуллаева
