Яла захIматсса шартIирдайгума кьадарданул инсаннан хар-хавар бакъасса тIааьнсса бахшишру дай.

Мукунсса бахшишну хьунни кIия шяравучунал, даврил уртакьтурал хасъсса аьралий операциялийсса хьунабакьаву. Сулайман Рамазанов ва Мухтар Шайхаьлиев бур ЦIуссалакрал шяравасса. Хасъсса аьралий операциялийн гьаннин Сулайман ивкIун ур ЦIуссалакрал райондалул бакIчинан кIанай, Мухтар тIурча муначIа водительну. Ватандалул мурадру буручлан аьркинсса чIун дуркIукун, кIинналагу аьрайн гьансса хIукму бувну бур. Мухтардул цува рязийну чирчуну дур контракт. Ванан бувчIлай бивкIун бур цува чун наниссарив, амма ватан дуруччин аьркинну душиву чIалай, хъисвагу щак къакуну, лавгун ур. Хасъсса аьралий операциялий Мухтардуйн захIматсса щаву дирну дур, ччаннай ацIайхту, махъунай зана хьуну ур.
Сулайман увкIун ур хасъсса аьралий операциялийн «Каспий» хушрайсса батальондалуву. Ча дакIнин багьанссия вайннан аьрай, захIматсса шартIирдай хьунабакьинссару куну. Укунсса хьунабакьаву, гьай-гьай, тачIав дакIния къадукканссар. Ватандалия архну, биту-ххиту нанисса дяъвилул шартIирдай шяравучу хьунаакьаву – ца лахIзалийсса паракьатсса оьрмулийн, шавайн кIураавсса кунмасса иш бур. КIиягу жагьилнан ва хьунабакьаврил, мяйжаннугу, шардалу дакIнин дуртун дур, дакI тирх учин дурну дур. Цал ялагу дакIнин бувтун бур цивппа ватандалул, буттал къатлул, цахва ялугьлагьиминнал цIаний талай бушиву. Укунсса иширттал аьралийтуравун хъиннува гьавас бутайссар, дакI дайссар.
Ххувшавугу ларсун, цIуллуну, сагъну цала кулпатирттавун зана хьуннав.

Андриана Аьбдуллаева