Гьарцагу бусурманчувнан ххирасса, хъуннасса агьамшиву дусса, мубараксса Рамазан барз байбишин личIлай бур ацIнияхъайсса гьантри. Жулва буржгу ва зуруйн багьайкун хIадур шавур, Аллагьнащалсса жулла дахIаву, арарду цIакь давриву шайссаксса хъуннасса даву дан хъирив лаяншиврул, ва зуруй жунна дуллусса рувхIанийсса хIикматшивурттая шайссаксса хъунмасса мюнпат ласуншиврул.
* * *
КIулсса куццуй, исламраву гьарцагу дувансса ва дуллалисса даврицIунсса ца агьаммур бутIану ният хъанахъиссар. Ният дувара Рамазан барз диндалул аьдат-эбадатирттал чулухагу, рахIму-цIимилул, мюхтажминнансса ка-кумаграл чулухагу шайссаксса барачатну гьан буван.
* * *
Инсан та-ухьурчангу хIарачат буллан аьркинссар бунагьмуния архну икIан, кIулну-къакIулну цалва бувсса бунагьирттая пашман хъанан, Аллагьнахь ялтту учIу, хIалал ити тIун, укунсса зурул хьхьичIрив – хъиннува, марцIсса, паракьатсса дакIнищал ва чаннасса пикрирдащал айишиншиврул бусурманчувнай буржлувсса аьдат-эбадатру щаллу дуллай.
* * *
Дувара Рамазан барз байбишиннин дуван аьркинсса давурттал сияхI.
БакIравунияр, чагъарданий, яруннил хьхьичI, сияхI дусса чIумал бигьассар даву дуллай айишин, дурмунил ялтту аьш дуккан, дакIнин дагьмур сияхIрайн ххи дуван.
* * *
Кьянкьасса низамирайн дуцара чак буллалаву, цила чIумуй къабуллалаву ягу лях гьан битлатаву кьадиртун.
* * *
Кьуран буккин кIулхьурча, цIанава байбивхьуну хъинссар гьарца кьини ца бунугу аят, хIадис ккалай, Аллагьнал цIарду дакIний ритлай. Аьрабрай буккин къакIулминнангу – лахьлай байбишин, Рамазан зуруйннин щаллуну къалахьхьирчагу, чан-кьанссавагу, ца-кIира хIарпрагу кIулну дикIан. КIулсса куццуй, мубараксса зуруй гьарца хIарпирахлуссагу, гьарца бувккумунихлусса бахшишгу цукссагу ларай хъанахъиссар.
* * *
КIулсса куццуй, Рамазан зуруй бувсса хъинбалалухсса чиригу, итххявхсса гъалатIрахсса, бунагьрахлусса танмихIгу хъинну хъунма хъанахъиссар. Мунияту, ккалакки хIадисру, луттирду, макьаларду, цавугу бусласисса Рамазан зуруй цукун къуццу тIун аьркинссарив.
* * *
ЦIуллу-сагъшиврулсса, бюхъавай, ва барз байбишиннин бувну хъинссар, хаснура ккарччацIун дархIуми давуртту.
* * *
Зума дургьусса чIумал дукра даву чан-кьансса дунугу захIмат шай. Мунияту хъинссар дукралувун дичинмур (чимус, къур, калан) цIанара мюрш дурну микIлачIун дуван. Мукунна микIлачIун дуван шайсса дукрарду (ххункI, гьавккури, дурмарду ва ц.), цIанара дурну, морозильникрал чIамурдай дишин.
* * *
Зума дургьусса чIумал къабигьану бикIай захIматсса давуртту дуллан, архсса аьрххирдай буклан. Мунияту, ва кIанттулгу пикри буван аьркинссар, мубараксса барз байбишиннин хьхьичI-хьхьичIми мурадру бартбигьин.
* * *
Агана инсаннай ци-бунугу бурж бухьурча, мугу щаллу бувну, лавхъун хъинссар, муницIунсса пикрирдахух къалаглай, Рамазан зуруй дуваймур чаннасса бакIращал ва куклусса дакIнищал дулланшиврул.
Буциннав жува Аллагьнал тIайласса ххуллийх, кабакьиннав дуллалисса гьарцагу даврицIун.
ХIадур бувссар
Бадрижамал Аьлиевал
