Ттигъанну аьпалул хьунни жулла республикалий фармацевтика, аптекарттал сеть хьхьичIуннай давриву хъунмасса захIмат бивхьусса пишакар, СССР-данул цIуллу-сагъшиву дуруччаврил отличник, ДАССР-данул цIуллу-сагъшиву дуруччаврил лайкь хьусса зузала, лавайсса даражалул провизор, Шахьуйннал шяравасса Къандаев Чавтара Аьбдуллагьлул арс.

Кьурандалий бур «инсантураву яла ххуйма – му инсантуран хайр-мюнпат биян буллалимари» тIисса махъру. Чавтарагу, аьпа биву, ия мукунсса, цайминнан цащава шайсса ка-кумаг буллалисса. Аьркинсса, нажагь бакъа къабирияйсса даруртту лякъингу, цIуллу-сагъшиврийн багьайсса цайми-цайми масъалартту щаллу бангу ванал мудангу ка-кумаг бувайссия гъан-маччаминнангу, шяраваллил инсантурангу, кIулминнангу, хаснува хьхьичIва, дарурттал чулухагу, гьарца чулухагу ссуссукьусса шиннардий. ХIакьину республикалийгу, республикалул хъун-шагьрулийгу сийлийсса аптекардал сетьру сакин дуллалисса ппурттуву чIарав Чавтара Аьбдуллаевич ивкIссар, учитель ва насихIатчи хIисаврай, цащава шайсса ка-кумаг буллай. Шяравун увкIсса чIумаллив, ЧавтарачIан инсантал бачайссия цалла-цалла къашайшивурттая бусан, маслихIат ккаккан, ванахь дарув-дарман бува учин.

Увну ур Чавтара 1939-ку шинал Харьковрай Шахьуйннал шяравасса Аьбдуллагьлул ва БатIил кулпатраву. Буттал кIанттул цIанийсса Хъунмасса дяъви байбишайхту, ватан дуруччин лавгун бур Чавтарал ппугу, шама буттауссугу: Аьбдуллагьгу, ванал уссу Аьбдурашидгу зана къавхьуну бур. Мукун, Чавтарагу хъуна хьуну ур дяъвилул чIявусса ятинтуравасса цану.

Буттал шяраву мукьва, КIундив арулва, ГьунчIукьатIув ацIва классгу бувккуну, Чавтара 1959-ку шинал увххун ур Каспийскаллал медициналул училищалувун. КIилчинмур курсирая айивхьуну Каспийскаллал шагьрулул азарханалий фельдшерну зун ивкIун ур.
Медучилищагу бувккуну, Чавтара сайки щалва оьрмулий зий ивкIссар цалла дакIнил лавсъсса пишалий. Дайдихьурив дурну дур УнцIукIуллал участокрал азарханалий фельдшерну зузаврия. Шикку ХарачIи тIисса шяраву ванал тIивтIуну бур ФАП-гу, аптечный пунктгу. Армиялийн гьаннин зий ивкIун ур УнцIукIуллал амбулаториялул хъунаману. Къуллугъгу бувну, зана хьуну махъ зий ивкIун ур ЦIуссалаккуй, бакIрайва – Шушияв ФАП-рай, махъ – ЦIуссалакрал райсанэпидстанциялул хъунама хIакиннал кумагчину. 1966-ку шинал увххун, Чавтарал къуртал бувну бур Харьковуллал фармацевтикалул институт. Шиву дуклай унува, хьхьувай, дежурствартту ласлай, зий ивкIун ур Харьковуллал областьрал клиникалул азарханалийгу, шагьрулул Анаварсса кумаграл станциялийгу.
Дуккавугу къуртал хьуну, провизорнал квалификациягу ларсун, Чавтара зана хьуну ур Дагъусттаннайн, тийха ацIу тIий, зун Ворошиловградрайн (Луганск) гьан уллай бивкIнугу.

Тарихийсса ватандалийн зана хьуну махъ медициналувусса агьаммур даврицIун Пединститутраву фармакологиялул ва латIин мазрал дарсру дихьлайгу ивкIун ур.
Чавтара зузисса кIанттурду чIявуну баххана шайсса бивкIссар. Цалла даву ххуйну кIулсса лавайсса даражалул пишакар ца кIаная цамур кIанайн гьан увайсса ивкIссар, махъун дагьлагьисса участок хьхьичIуннай дуван аьркинсса чIумал. Ванал каялувшиндаралу зузисса идара хьхьичIунминнувух шайсса бивкIссар. Ва ялагу, республикалун биял хъанай къабивкIссар фармацевтътал. Мукун, ­Чавтара аптекарттай ва Анаварсса кумаграл станциялий зий ивкIссар республикалул личIи-личIисса кIанттурдай: Щурагь, Лаващав, Южносухокумскалий, МахIачкъалалив ва м.ц. Чув зий унугу, зузиминнал ва къашайшалтрал дянив ванал хIурмат лавайсса бивкIссар. Чавтара Аьбдуллаевичлул каялувшиндаралу Дагъусттаннай тIивтIуссар 8 аптека ва 2 оптика.
1984-ку шинал Чавтара ивтссар Республикалул Аптечный управлениялул Центральный аптечный складрал хъунаману.
Махъ ва зун ивкIссар ДАССР-данул ЦIуллу-сагъшиву дуруччаврил министерствалул базалул хъунаманал хъиривчувну. Цимирагу шинай ивкIссар Дагъусттан Республикалул ЦIуллу-сагъшиву дуруччаврил министерствалул коллегиялул членнугу.
Цанма кIулмуний, цалла дурмуний гьашиву къадувайсса Чавтарал Киеврай медициналул институтраву ва Пятигорскалий фармакадемиялуву бувккуссар пишакаршиву ларай даврил курсру, лавсъссар лавайсса категориялул провизорнал свидетельство.
ХIалал дурссар чIярусса наградартту ва цIарду: вайннувух СССР-данул цIуллу-сагъшиву дуруччаврил отличник (1984 ш.), Дагъусттан Республикалул цIуллу-сагъшиву дуруччаврил лайкь хьусса зузала (1999 ш.), захIматрал ветеран (2000 ш.). 1999-ку шинал ванан буллуссар Дагъусттан Республикалул ХIукуматрал чулухасса Барчаллагьрал чагъар, му шинал республикалий хъанай бивкIсса аьралий иширттаву бувсса кумаграхлу.
Медициналия тархъансса чIун Чавтарал гьан дувайссия аьрщараха зий, за дугьлай, дургьумуниха къуллугъ буллай, хаснува Лаккуй, буттал шяраву. Ххирассия шяраваллил жямат. Гьарца бивкIу-буккулий, жяматийсса иширттаву хьхьичIунминнавух икIайссия.
Цува кIулну ивкIминначIа Чавтара Аьбдуллаевичлул кьабивтссар цаявасса чаннасса аьпа.
Чавтара аьпалул шаврил жижарагу буллай ванал ичIувацириннахь, гъан-маччанахь, ванал рухI хъинний дишиннав учинсса акъа лякъиншиву къакIулли. Бувтун тIий ванал инсантуран мюнпатрансса оьрму.
Бадрижамал Аьлиева