Ва зурул 6-нний, ца шинал хьхьичI, лавмартсса бивкIулул жула дянивату лавсуна, ттул хъинсса маччачугу, ца ттула чIивима уссу кунасса дусгу, СантIуев Башир.
ОьрчIнияцIава жу буттахъал (вай ссурахъал бия) тарбия бувнав хъинну куннах кув ччаву дуну. Шяраву давуртту чан къашайвахха, жул кулпатру мудан дуллалимуниву цачIу, чIарав бикIайва. Башир кулпатраву личIинура карчI дакъасса, яхI бусса, ссаячIав нигь дакъасса ия.
Цалчинмур ЦIувкIуллал школалул комсомол организациялул хъунаманугу увчIуна. Школа къуртал бувну махъ Киев шагьрулий, ларайсса кIулшивугу ларсун, зий уссия. Дагъустаннайн зана хьуну махъ жул уссушиврул ара хъиннура цIакь хьуна. Гъинттул чIумал цIан-чаннаву хьхьирийн буккайссияв, муния махъ паркираву мадарасса заназин дайссия. КIинттул чIумал ччя-ччяни дуссух, мандолинагу сукку бувну, оьрчIругу къавтIутIи бувну, бигьалагайссяв. Жу цанная цаннал цичIав кьюлтI къабайссия. Навалу хъатIуй, бивкIулий ккаккарчан, Башир акъархха чайва, мунахьгу мукунма цIуххайсса бия.
Башир къуртал шавугу ттула чIарав, язисса бивкIулий щябивкIсса кIанай хьуна. Ми гьантрай кказитрайн ца-кIива махъ чичинсса гъира бакъая. Башир ттуна утти тачIав къаккаккантIишиву дакIнил кьамул буллай бакъая. ЧIун лагайхту, дакI паракьат шайссар чай, амма шинал мутталий жагьилсса оьрмулий цал ххаллилсса куяв МахIаммада, кулпатраву яла чIивима, яла ххирама уссу МахIаммад, вайннала хъирив Баширгу аьпалухьхьун лагаву жул агьлу-авладран бухIан захIмат хьунни.
Алжан нясив баннав шамуннанвагу, хъинну куннан кув ххирассия цивппагу ца оьрмулулгу бухьувкун.
Шинал хьхьичIвасса шеъригу, Башир къуртал хьуну махъсса гьантрай чивчусса, чан-кьансса дахханашиврущал буллай ура.
***
Инарив лавгунна
вина бигьану,
МахIрумну кьабивтун
ххаллилсса арсру.
Зирзунни ххирасса
кулпатрал хъару,
Ччувччунни жяматрал
алвагьсса кьаму.
Кьадиртун эбратран
карчI дакъашиву,
Ва буттал улклухсса
кьянкьасса ччаву,
Кьадрулий жяматрал
чIарав ацIаву,
Мюхтажнал ка дугьан
махъал къашаву.
Ххирасса ттула дус
чIарав акъаний,
Уссийхь къабусаймур
тти щихь буслава,
Каниву бивгьусса
махъва-махъсса ссихI,
Бакъякъин, чув бивхьун,
на ябуллава?
КъакIулли, уссу,
на буванмур цирив,
Сайр бай хьхьирил щатIахь
чуври чинссарив.
Ягу шяравунмай
ссапар бавхIукун,
Винма ххира зунттахь
ци бусанссарив.
Уссушиврий гьантри гьан
бувссар чинна,
Уссаксса давраннай
яхьуссар чинна,
Буттахъал ирсирай
тарбия бувсса
Ххаллилсса шама арс
кьаивтссар чинна.
Янил ляпI учиннин
шингу ларгунни,
Вих луглай арснал душ
«чаннацIа» хьунни.
Арснал арс Баширдул
ниттихь пиш кунни,
ДакIнийсса щавумур
ттул хъин къархьунни.
Алжаннул ардарав
тти ухьунссара,
Чийн був хъинбаларттал
хъаттирдай лехлай.
Жул дакIурдивугу сагъну уссара,
МакIурдивух укIлай,
жухь банмур буслай.
Супиян Оьмаров
* * *
Хъуннасса кьурчIишивугу кIидачIлай, дакIнийхтунусса жижара буллай буру жущала архIал зузисса Аьлиева Аминатлухь, Аьлиев Къапланнухь, вайннал оьрчIахь, чIярусса шиннардий учительшиву, директоршиву дуллай ивкIсса, жуна цинявннан бусравсса ва хIурмат ххисса инсан ХIажиакбар аьпалухьхьун лагаврийн бувну.
Цал бунагьирттал аьпа баннав, алжаннул ххари аннав, махънал оьрмурдай барачат бишиннав.
Ккуллал 2-мур школалул коллективрал цIания
школалул директор Кьурбан Губулов
