Вай гьантрай «Аьрасат -ттул тарихри» тIисса паркраву «Хиджабрал кьинилун» хас дурсса «Хъуннабава, нину ва на» мероприятие хьунни. Ванил сиптачитал ва сакиншинначитал бия Дагъусттаннал Муфтиятрал просвещениялул хъаннил отдел, «Мариям» тIисса Хъаннил рувхIанийсса центрданущал ва «Гьидаят» тIисса Исламрал кIулшивуртту дуллалисса центрданущал уртакьну.
Зал бувцIуну бия миллатирттал лаххиялувусса хъаннил. ОьрчIи-кIурисса бузмардал ва лачакирттал ссурулккуртри ппив бувну бия залданувух. Куннияр кув авурсса аьнтIикIахъал занакьулушиндарал хъирив лечлачисса яру гьанай бия. Нава оьрчIзаманнайсса хъатIуйн багьсса кунмасса иш бия. Унгу-унгунусса байрандалул хIахI бия. Кьиматрайсса лачакру ккаккиялун дирхьуну дия. Хъуннабавахъал буттукьри ппив бувну, ябивхьуну бия. Так тамаша буван бавтIун бакъаяхха, бия хъаннил паргалшиврул ва гьунардал бяст-ччалгу.
Ххюра командалул ичIаллил кушулул ва канил пагьмурдал усттаршиву ккаккан дунни хъуннабавахъул, ниттихъул ва душру гьурттуну. Программалуву дия творчествалул конкурсгу.
Цалчинмур кIану буллунни Бущихъиял райондалиясса РахатIиял шяраваллил душвавран, кIилчинмур – ТIилитIиял шяраваллил душвавран ва шамилчинмур – УнцIукIуллал душвавран.
Цуксса хIайпнугу, мероприятиялий гьуртту хъанай бунугу, лакралми душру конкурсрай гьурттушинна дуллай бакъая.
Сакиншинначитурал кIицI лавгунни конкурсрал гьанумур мурад, Дагъусттаннал кулпатирттал аьдатру ядаву ва цIу дуккан даву душиву.
«Жува чIявуну хьхьичIара нитти-буттал тарбия ххуйсса дулайва, хъуниминнал хIурмат бия тIун бикIару. ПпухълунначIа кьиматраймур, культура дикIу, аьдатру дикIу, ялун нанисса никирачIагу кьиматрай дикIаншиврул вайннуя буслангу, укунсса мероприятияртту дуллангу аьркинни. Ва ялагу, ва аьдатрайсса ислам лахьхьин даврил ххуллийсса давугу хъанахъиссар», – увкунни Дарбантлия бувкIсса лаккудуш Шамсият ХIажимусиловал.
Щаллагу дунияллий «Хиджабрал кьини» кIицI лагайссар фераль зурул 1-нний. 2013 шиная шийннай ва байран кIицI лагай Аьрасатнал регионнайгу. Махъсса шиннардий ва байран Дагъусттаннайгу сийлувун дагьавай дур. МахIачкъалалив дакъагу, цаппара районнай ва шяраваллавугу кIицI ларгунни.
ПатIимат Рамазанова
