МахIачкъалалив Нацгвардиялул хасъсса моторизованный полкрал аьралийтал бивунни Ленинградуллал блокадалуву бивкIсса Марина БессаловачIан ва барча бунни ва немец-фашистнал блокадалува Ленинград ххассал бувну 82 шин шаврицIун.

Марина Владимировнал бувсунни хъамаллурахь блокадалувусса шагьрулул агьалинал бакIрачIан дуркIсса оь кьинирдая.
Марина ниттищал ва ­хъунна баващал Васильевский проспектрай ялапар хъанай бивкIун бур. Ппу дяъвилий ивкIуну ур. 1942-ку шинал Марина цаймигу оьрчIащал шагьрулува буккан бувну бур. Хъуннабава ­аьпалул хьуну дур. Нину тIурча, захIматну къашай хьуну, шагьрулуву лирчIун дур. Хъунма хIал къавхьуну, вагу диркIуну дур. Марина хIаласса оьрчIру тIайла бувккун бур Майкоп шагьрулийсса оьрчIал къатлувун. Цахъи махъ ва цанма душ бан ца кулпатрал бувцуну бур. Амма кулпатрал бакIчи аьрайн уцайхту, Марина цIунилгу интернатрайн багьну бур.

Дяъви къуртал хьуну урчIра шинава, Марина зун бивкIун бур Кановка тIисса поселокрайсса Сталиннул цIанийсса колхозраву. 1956-ку шинал ва бувкIун бур МахIачкъалалив. Шикку бувххун бур паччахIлугърал Профессионально-техническое училищалувун. Дуккаву къуртал хьуну махъ Маринан шиккува бацIан пикри хьуну бур. Зий бивкIун бур III-мур Интернационалданул фабрикалий, «Металлист» заводрай.
Росгвардиялул зузалтрал, полкрал командир, полковник Шамил Ахкубековлул цIания буллунни Марина Владимировнан Барчаллагьрал чагъар, тIутIал кацI ва дакIний личIансса бахшиш.

– Ленинградуллал блокада хьуссар билаятрал тарихраву ца яла къювумур ва къучагъмур ишну. Блокадалуву бивкIсса шагьрулул агьалинал чувшиву никирая никирайн буслай, абадлий дакIний дикIантIиссар, – увкунни Маринан цIуллушиву чIа тIий полкрал командирнал хъиривчу, подполковник Роберт Аюбовлул.
Марина Владимировнал барчаллагь увкунни Росгвардиялул зузалтрахь ветерантурахсса къулагъасрахлу.

Андриана Аьбдуллаева