Вай гьантрай Дагъусттаннал экономикалул министр ХIажи Султановлул агьали кьамул бунни. Ванащал бия ДР-лул Экономикалул министерствалуцIунсса Жяматийсса советрал член, хасъсса аьралий операциялул гьурттучинал кулпат Рада Мурадова.
МахIачкъалалив ялапар хъанахъисса ишбажаранчи Асият ХIасанован кIул хьуну ччай бия бизнесран аьркин дансса оборудование машан ласаврин кумагрансса хIукуматрал чулухасса хIаллихшиннардая.
ХIажи Султановлул балжину бувсунни миннуя, кIицI ларгунни «Социально-экономическое развитие горных территорий Республики Дагестан» тIисса, зунттал районну ядаву мурадрайсса паччахIлугърал программалул лагрулий ишла дан бюхъайсса каширду.
Шяраваллил хозяйствалуха, чIиримур ва дянивмур бизнесраха зузиминнаща бюхълай бур цала давриву ишла дансса дянивсса лагрулул техникалух 50% субсидиярттал ласун. Мунийну, хъунмасса мюнпат хъанахъиссар зунттал районнайсса шяраваллил хозяйстварду цIу дуккан даврин.
ХIажи Султановлул цачIанма бувкIсса агьалинал масъаларттах личIлулну вичIигу дирхьуну, бувчIин бунни ми щаллу баврил ялув ацIаву цала бакIрайн ласунтIишиву.
Имара Саидова
